بەردەڤکێ وەزارەتا تەندروستیا ئیرانێ ئیرۆ رۆژا پێنج شەمی ٢/٤/٢٠٢٠ان داوی زانیاری ل سەر ڤیروسا کۆرۆنا و کەسێن ب ڤێ ڤیروسێ کەتی ل ناڤا ئیرانێ دە راگهاندن.
کیانۆش جەهانپۆر ل دوور داوی ئامارێن ڤیروسا کۆرۆنا ل ئیرانێ راگهاند: «ژ نیڤرۆژا دوهی هەیا ئیرۆ ل گۆر وان تەستێن ژ بۆ نەخوەشێن کۆرۆنایێ ل ئیرانێ هاتی ئەنجامدان تەسبیت بوو کو ٢٨٧٥ حالەتێن نوو یێن تووشبوون ب ڤیروسا (کۆڤید ١٩) ل ئیرانێ زیدە بوونە و سەرجەما کەسێن ب ڤێ ڤیرۆسێ کەتی گهیشت ٥٠ هەزار و ٤٦٨ کەسان».
بەردەڤکێ وەزارەتا تەندروستیا ئیرانێ هەر وەها راگهاند: «هەیا نها ١٦ هەزار و ٧١١ کەسێن ب ڤیروسا کۆرۆنا یا نوو کەتی تەداوی بوونە و ڤەگەریانە ناڤا مالباتێن خوە».
کیانۆش راگهاند ژی: «جهێ دلگرانیێ یە کو د دەما ٢٤ ساعەتێن رابووری دە، ١٢٤ کەس ژ نەخوەشێن ب ڤێ ڤیروسێ کەتی ل ئیرانێ جانێ خوە ژ دەست دایە و سەرجەما قوربانیێن ڤێ نەخوەشیێ ل ئیرانێ گهیشت ٣١٦٠ کەسان».
ناڤبووری د بەردەوامیا ئاخافتنا خوە دە تەکەز کر کو «٣٩٥٦ کەس ژ ڤان نەخوەشان نها د رەوشەک پڕ خەتەر دانە».
