ژبه‌ر په‌كه‌كێ تویته‌ری ئه‌كاونتا «مه‌زلووم عه‌بدی» ره‌ش كر

كۆمپانییا تویته‌ری ئیرۆ رۆژا شه‌مبی 4\4\2020ێ ئه‌كاونتا مه‌زلووم عه‌بدی فه‌رماندارێ هێزێن سووریایا ده‌مۆكراتیك هه‌سه‌دێ، ل تركیێ ره‌ش كر و ئه‌گه‌ر ژ بۆ هه‌بوونا په‌یوه‌ندییا وی ب په‌كه‌كێ ڤه‌ ڤه‌گه‌راند.

كۆمپانییا تویته‌ری، ئیرۆ و ل سه‌ر داخوازییا ده‌وله‌تا تركیێ، ئه‌كاونتا مه‌زلووم عه‌بدی فه‌رماندارێ هه‌سه‌دێ، ل تركیێ ره‌ش كر و ئێدی د شیان دا نابیت ل وی وه‌لاتی ئه‌كاونتا وی بهێت دیتن، به‌ره‌ڤاژی وه‌لاتێن دی.

ئه‌گه‌را رازیبوونا كۆمپانییا تویته‌ری ل سه‌ر داخوازا تركیێ ژ بۆ په‌یوه‌ندییا مه‌زلووم عه‌بدی ب پارتییا كاركه‌رێن كوردستانێ په‌كه‌كێ ڤه‌ ڤه‌دگه‌ریت، هه‌موه‌خت مه‌زلووم د لیستا داخوازكریێن تركیێ دایه.‌

ل گۆر یاسایێن كۆمپانییا تویته‌ری، حكوومه‌تێن وه‌لاتان ماف هه‌یه‌ داخوازییا ره‌ش كرنا ئه‌كاونتان بكه‌ن.

پاش هێرشا داگیركارییا تركیێ ل سه‌ر رۆژئاڤایێ كوردستانێ ل ئۆكتۆبه‌را سالا رابووری، ناڤ و ده‌نگییا مه‌زلووم عه‌بدی ده‌ركه‌ت، ب تایبه‌ت پاش كو هنه‌ك په‌یوه‌ندی ل گه‌ل سه‌رۆكێ ئه‌مه‌ریكایێ دۆنالد ترامپ كرین.

پارتییا كاركه‌رێن كوردستانێ په‌كه‌كێ، ژ ڤێ ناڤوده‌نگییا مه‌زلووم و جه‌نه‌رالبوونا وی نه‌رازیبوو، ژ به‌ر كو د ناڤا په‌كه‌كێ دا، ژ بۆ كه‌سێ نینه‌ رێیا به‌رنیاسبوونێ یان رێبه‌ریێ بگریت، له‌وما ل ڤێ داویێ جاره‌كا دی ئه‌ڤ ناڤوده‌نگییا مه‌زلووم ل كێمێ دایه‌ ڤه‌.