عه‌دنان زورفی سه‌رۆكوه‌زیرێ راسپاردی یێ حكوومه‌تا فه‌ده‌رال، پێكهاته‌یا حكوومه‌تا نوو ب داوی ئینایه و دایه په‌رله‌مانی ژ بۆ كو روونشتنا په‌ژراندنا وێ بهێته ساز كرن، فراكسیۆنێن كوردستانی ژی دێ ده‌نگی ب ئه‌رێ ژ بۆ ده‌ن.
دانوستاندنێن عه‌دنان زورفی، سه‌رۆك وه‌زیرێ راسپاردی یێ ئیراقێ ل گه‌ل ئالیێن شیعه به‌رده‌وامه و ئیرۆ رۆژا ئێكشه‌مبێ 5-4-2020ێ هه‌ڤپه‌یمانییا نه‌سر، ئه‌وا حه‌یده‌ر عه‌بادی سه‌رۆكاتییا وێ دكه‌ت راگه‌هاند كو پێتر ژ 200 په‌رله‌مانتاران دێ ده‌نگی ب ئه‌رێ ژ بۆ كابینه‌یا زورفی ده‌ن.
هه‌روه‌ها ده‌ست نیشان كر، دانوستاندنێن سه‌رۆكوه‌زیرێ راسپاردی نها ل گه‌ل ئالیێن شیعه ب تایبه‌ت یێن هه‌ڤپه‌یمانێتییا فه‌تح و ده‌وله‌تا یاسا به‌رده‌وامن و ل رۆژێن بهێن روونشتنا په‌ژراندنا حكوومه‌تێ دێ هێته گرێدان.
ل گۆر داخویانییا هه‌ڤپه‌یمانییا نه‌سر، ئالیێن سوننه و كورد دێ ده‌نگی ب كابینه‌یا زورفی ده‌ن، هه‌روه‌ها فراكسیۆنێن كوردستانی ژی هێژان چ ره‌ت كرن ژ ئالیێ وان ڤه نایێ دیتن.
ل ده‌ربارا هه‌لوه‌ستا ئالیێن كوردستانی ل ده‌ربارا ئه‌رێ كرنا حكوومه‌تا تازه ب سه‌رۆكاتییا زورفی، نێچیرڤان بارزانی سه‌رۆكێ هه‌رێما باشوورێ كوردستانێ ل دو رۆژێن رابووری راگه‌هاندبوو كو ئالیێن كورد كێشه ل گه‌ل زورفی نینه، لێ به‌لێ كێشه‌یا كابینه‌یا نوو ل ناڤبه‌را مالا شیعی دایه و هه‌روه‌ها گۆت: كورد دێ ده‌نگی ژ بۆ ده‌ن.
ل گۆر پێزانینێن هه‌ڤپه‌یمانێتییا نه‌سر هه‌تا نها پێتر ژ 220 په‌رله‌مانتاران هه‌نه كو بریار دانه ده‌نگی ب ئه‌رێ ژ بۆ كابینه‌یا تازه یا حكوومه‌تا فه‌ده‌رال بده‌ن.
