چاڤکانیێن ئەولەهی و مەدیایێن لۆکالی یێن ئیراقێ ئیرۆ رۆژا دوشەمی ٦/٤/٢٠٢٠ان خەبەر ژ ئاڤێتنا چەندین مووشەکان دا بۆ سەر شیرکەتەکە ئامەریکی ئا تایبەتمەند ب پەترۆلێ ل باژارێ بەسرا ئێ باشوورێ ئیراقێ.
ل گۆرەی ڤان چاڤکانیان سەرێ سبێ یا ئیرۆ هەژمارەک ژ شیرکەتێن پەترۆلێ یێن بیانی ژ وان شیرکەتەک ئامەریکی د ناڤچەیا “برجسیە” و “باژارێ ووزێ” ل باژارێ بەسرا، کەتن بن ئێریشا مووشەکێن کاتیۆشا و چەند گولە تۆپەکان.
ڤان چاڤکانیان راگهاند هەری کێم سێ مووشەکێن کاتیۆشا ل وێ ناڤچەیا کو ئامۆرێن دەرهێنانا نەفتێ تێدەنە، کەتنە.
چاڤکانیێن ئیراقی راگهاند ڤێ ئێریشا مووشەکی شیرکەتا ئامەریکی یا ب ناڤێ “هالبرتۆن” کو دکەڤە رۆژئاڤایێ باژارێ بەسرا ل باشوورێ ئیراقێ ئارمانج کریە. ل گۆرەی ڤان چاڤکانیان ڤێ ئێریشێ ت زیانەکە مادی و مرۆڤی نەبوویە.
ژ ئالیەک دن شانەیا راگهاندنا ئەولەهی یا ئارتەشا ئیراقێ د رۆپەلا خوە یا تویتەرێ دە ئەشکەرە کر، هێزێن ئەولەهیا ئیراقێ ل باژارێ بەسرا کەسێن سووچبار کو ٣ مووشەکێن کاتیۆشا ئاڤێتینە ئامۆرێن بەرهەمئانینا پەترۆلێ ل باژارێ بەسرا دەستنیشان کرینە و هێزێن ئیراقێ نها ل پەی وان دگەرن داکو بهێن دەستەسەرکرن.
شانەیا راگهاندنا هێزێن ئەولەهیا ئیراقێ هەر وەها راگهاند، ئامۆرەکێ ئاڤێتنا مووشەکان ل ناڤچەیا مووشەک لێ هاتینە ئاڤێتن کو ١١ مووشەکێن ئامادە ژ بوو تەقاندنێ تێدە بوون ژ ئالیێ هێزێن ئیراقێ ڤە هات دەست ب سەرداگرن.
پشتی کوشتنا قاسم سولەیمانی فەرماندارێ سوپایێ قودس ئێ سەر ب سوپایێ پاسدارێن ئیرانێ ڤە و ئەبومەهدی ئەلموهەندس سەرۆکێ سازیا حەشدا شەعبی ل ئیراقێ، ل بالەفرخانەیا ناڤدەولەتی یا بەغدایێ ژ ئالیێ بالەفرێن بێ پیلۆت یێن ئامەریکایێ ڤە، پەڤچوون دناڤبەرا ملیسێن چەکدار یێن ئیراقی ئێن سەر ب ئیرانێ ڤە دگەل ئامەریکایێ هەر کو دچە زێدەتر دبە.
