سه‌را «ئۆجالان» چه‌كداره‌كێ ئاساییشا په‌یه‌دێ تێ كوشتن

هه‌ژماره‌كه‌ چه‌كدارێن ئاساییشا پارتییا یه‌كێتییا ده‌مۆكراتیك په‌یه‌دێ، ل ناڤه‌ندا قامشلۆ هاتن كوشتن و بریندار كرن، وه‌ختا كو ئاهه‌نگ ب هه‌لكه‌فتا رۆژا ژدایكبوونا «ئاپۆ» د گێران.

چاڤكانیێن پێگه‌ها «داركا مازی» ل رۆژئاڤا كوردستانێ، ئه‌شكه‌ره‌ كرن، ل رۆژا شه‌مبیا رابووری 4-4-2020ێ، ئه‌ره‌به‌یه‌كا له‌شكری یا ره‌ژێما به‌شار ئه‌سه‌د، ل ناڤه‌ندا باژارێ قامشلۆ، گوللـه‌ به‌ردانه‌ خاله‌كا پشكنینێ یا ئاساییشا په‌یه‌دێ و زرارێن جانی پێره‌ خستن.

هه‌روه‌ها ده‌ست نیشان كرن، ئه‌ڤ بوویه‌ر ل دۆریانا ب ناڤێ «سه‌بع به‌حرات» یا ناڤه‌ندا قامشلۆ روودا، وه‌ختا كو سه‌ربازێن ره‌ژێما سووریێ گوللـه‌ به‌رداینه وێ خالا ئاساییشا په‌یه‌دێ و د ئه‌نجاما ڤێ بوویه‌رێ ده‌، چه‌كداره‌كێ ئاساییشێ تێ كوشتن و 2 یێن دن بریندار كه‌تن.

چاڤكانیێن پێگه‌ها «داركا مازی» ئه‌شكه‌ره‌ كرن، پاش كو وی چه‌كدارێ ئاساییشا په‌یه‌دێ هنه‌ك كارێن (ئیستفزازی) كرین ده‌ما كو ئاهه‌نگ ب هه‌لكه‌فتا رۆژا ژدایك بوونا عه‌بدوللا ئۆجالان رێبه‌رێ زیندان كری یێ په‌كه‌كێ د گێرای، سه‌ربازێن ره‌ژێمێ گوللـه‌ تێ به‌ردانه‌ و هه‌ر راست كوشتییه‌، هه‌روه‌ها 2 هه‌ڤالێن وی بریندار كرنه‌.

پاش ڤێ بوویه‌رێ و چێبوونا ئالۆزیێ، ده‌وریه‌كه‌ پۆلیسێن سه‌ربازی یا رووسیا فه‌ده‌رال گهیشته‌ جیێ بوویه‌رێ ژ بۆ كو ئالۆزی به‌رفره‌هـ نه‌به‌.

تێ زانین رێژه‌یه‌كا مه‌زن یا باژارێ قامشلۆ ل ژێر ده‌ستهلاتا پارتییا یه‌كێتییا ده‌مۆكراتیك په‌یه‌دێ یه‌ (بالێ په‌كه‌كێ یێ سووریێ)، ته‌نێ ناڤچه‌یا ب ناڤێ «چارگۆشه‌یا ئه‌وله‌هیێ» نه‌به‌ كو ئه‌ڤ جیه‌ ل ژێر ده‌ستهلاتا ره‌ژیما سووریێ ده‌ یه‌.