ل گۆرەی راپۆرەکا رۆژنامەیا “واشنتۆن پۆست” رایەدارێن ئامەریکایێ راگهاندینە کو ئامەریکا، سیستەمێن نوو یێن دژە ئێریشێن ئاسیمانی ل ئیراقێ ژ بۆ پاراستنا هێزێن خوە و هەڤپەیمانیا ناڤدەلەتی بجی کرینە.
ڤان رایەداران هەر وەها ئەشکەرە کریە کو سیستەما دژە ئێریشێن ئاسیمانی یا ب ناڤێ “پاتریۆت” و دو سیستەمێن مۆشەکی یێن مەودا کورت ل بنگەها خوە یا سەربازی ئا ب ناڤێ عەین ئەسەد، و هەر وەها پێگەها خوە یا سەربازی ئا ل هەولێرا پایتەختا هەرێما باشوورێ کوردستانێ بجی کرینە.
پشتی کوشتنا قاسم سولەیمانی فەرماندارێ سوپایێ قودس یێ سەر ب سوپایێ پاسدارێن ئیرانێ ڤە هەر وەها کوشتنا مەهدی ئەلموهەندس سەرکردەیێ شیعە ژ لایێ بالەفرەک بێ پیلۆت ئا ئامەریکایێ ڤە ل بالەفرخانەیا بەغدا یا ناڤدەولەتی و پەیرە ئێریشا تۆلڤەکرنا ئیرانێ بۆ سەر بنگەهێن سەربازی یێن ئامەریکایێ د ناڤا ئیراقێ دە و ئێریشێن بەردەوام یێن ملیسێن سەر ب ئیرانێ ڤە ل سەر هێزێن ئامەریکایێ، رایەدارێن سەربازی یێن ئامەریکایێ بریار ل سەر بجی کرنا سیستەما پاتریۆت ئا دژە ئێریشێن ئاسیمانی ل ئیراقێ دا.
پێش ئێریشا مۆشەکی یا ئیرانێ کو ب مەبەستا تۆلهلدانا قاسم سولەیمانی ئەنجامدای، رایەدارێن ئامەریکایێ ل سەر وێ باوەرێ بوون کو چ پێویستی ب دانینا سیستەما دژە ئێریشێن ئاسیمانی ل بنگەهێن وان ل ئیراقێ نینە، لێ نها ئەڤ سیستەما لهاتینە بنەجی کرن و کارا کرن ئەڤ یەک ژی پاش گەف و ئێریشێن بەردەوام یێن گرۆپێن چەکدار یێن سەر ب ئیرانێ ڤە هات کو بەردەوام ئێریشی سەر بنگەهێن سەربازی یێن ئامەریکایێ د ناڤا ئیراقێ دە دکن.
