باله‌فرێن تركیێ ده‌ڤه‌را گاره‌ی بۆردۆمان كر

باله‌فرێن تركیێ ده‌ڤه‌را گاره‌ی بۆردۆمان كر

باله‌فه‌رێن جه‌نگ یێن ئارته‌شا داگیركار یا ده‌وله‌تا تركیێ، ئیرۆ جاره‌كه‌ دن ئێریشێن ئاسیمانی ل باشوورێ كوردستانێ ل دژی په‌كه‌كێ پێكئانین و ناڤچه‌یه‌كا سینۆرێ پارێزگه‌هییا دهۆكێ بۆردۆمان كر.

چاڤكانیێن «پێگه‌ها داركا مازی» ل باشوورێ كوردستانێ ئه‌شكه‌ره‌ كرن، ئیرۆ رۆژا ئینی 17-4-2020ێ، باله‌فرێن جه‌نگ یێن تركیێ، ئێریشی ئاقارێ گوندێ «بیركیات» یێ گرێدای ناڤچه‌یا ب ناڤێ چه‌مانكێ ل سینۆرێ پارێزگه‌هییا دهۆكێ یا باشوورێ وه‌لات كر.

هه‌روه‌ها زه‌لال كرن، باله‌فران د ته‌عقیبا حه‌ره‌كه‌تێن گه‌ریلایێن پارتییا كاركه‌رێن كوردستانێ ده‌ كو ژ حه‌فتییا رابووری هاتنوچوونا خوه‌ ل ناڤ و نێزی گوندان پێتر كرنه‌، 2 مۆشه‌ك ل ئاقارێ گوندێ بیركیات دانه‌.

چاڤكانیێن «داركا مازی» ده‌ست نیشان كرن، ئه‌ڤ ئێریش ئیرۆ ل ده‌مژمێر 10:15 سپێدێ ل گوندێ ناڤبووری یێ ده‌ڤه‌را گاره‌ی چێبوویه‌.

گه‌ریلایێن په‌كه‌كێ، ژ ته‌باخا سالا رابووری و پاش دژواربوونا ئێریشێن تركیێ ل باشوورێ كوردستانێ، حه‌ره‌كه‌تێن خوه‌ ڤه‌گوهاستنه‌ ناڤا گوندان، هه‌مولاتی ژی ژ ڤێ یه‌كێ دلگرانن و به‌رده‌وام ژ په‌كه‌كێ دخوازن خوه‌ نێزی گوندێن وان نه‌كن ژ بۆ كو نه‌ بن ئارمانجا باله‌فرێن تركیێ.