راستییا كریزا «زینی وه‌رتێ» ژ ده‌ستپێكێ تا دوماهیێ

لاهۆر جه‌نگی باش فام دكر كو ده‌ركه‌تن ژ رێ و فه‌رمانێن ئه‌مه‌ریكایێ، دێ چ كاره‌ساته‌كێ ژ بۆ وی و دژه‌ تیرۆرا وی و حه‌تا حزبا وی ژی چێكه‌ت

پارتییا كاركه‌رێن كوردستانێ ژ ده‌ما پێڤاژۆییا ئاشتیێ یا سالا 2013ێ و هاتنا وان بۆ هه‌رێما باشوورێ كوردستانێ، وه‌كه‌ مه‌ د نڤیسێن خوه‌ یێن به‌رێ ژی ده‌ ئه‌شكه‌ره‌ كری، هه‌ر وه‌ختا كریزه‌ك چێبوو، ژ بۆ خۆ ب ده‌رفه‌ت دبینیت و به‌را هه‌ر تشتی پارتییا ده‌مۆكرات یا كوردستانێ و حكوومه‌تا باشوور پێ توهمه‌ت بار دكه‌ت، د كریزا «زینی وه‌رتێ» ده‌ ژی ئه‌ڤ یه‌ك ب باشی كر.

پێتری حه‌فتییه‌كێ یه‌، بابه‌تا «زینی وه‌رتێ» و له‌شكه‌ركێشییا پارتی و یه‌كێتیێ ژ ئالییه‌كی و ژ ئالییه‌كێ دی دانانا هنه‌ك ره‌بیێن په‌كه‌كێ، مژارا گه‌رم یا نووچه‌یێن هه‌رێما باشوورێ كوردستانێ و ته‌نانه‌ت ئیرانێ ژی بوو تا راده‌یه‌كی، راستییا بابه‌تی ئه‌گه‌ر چ حكوومه‌تا باشوورێ كوردستانێ د به‌یانه‌كا‌ فه‌رمی دا زه‌لال كرییه، لێ به‌لێ وه‌ك‌ هه‌ر جار په‌كه‌كه‌ ب رێیا ده‌وله‌تا داگیركار یا ئیرانێ هاته‌ د ڤێ كریزێ دا، ژ بۆ كو په‌ده‌كێ و حكوومه‌تا باشوور بێخیته‌ د ره‌وشه‌كا «موحرج» دا، لێ به‌لێ د راستیێ دا بابه‌ت جه‌نگه‌كا‌ مه‌دیایی یه‌، زێده‌تر ژ كو جه‌نگه‌ك بیت ل ناڤبه‌را په‌ده‌كێ و یه‌نه‌كێ.

ئیران و دۆستێن ئیرانێ ل باشوور شكه‌ستن و ئه‌مه‌ریكا سه‌ركه‌ت

ژ بۆ كو كریزا «زینی وه‌رتێ» ب دروستی بهێته‌ زه‌لال كرن و كانێ بۆچی ئه‌ڤ ناڤچه‌یه‌ كو چ گرنگییه‌كا ستراتیجی نینه‌ بوو ناسیارترین ناڤچه‌یا باشوورێ وه‌لات، پێدڤییه‌ ئه‌ڤ بوویه‌رێن د ئیسال دا ل ئاستا ئیراقێ و ناڤچه‌یێ رووداین بهێنه‌ باس كرن، ژ به‌ر كو بابه‌تا «زینی وه‌رتێ» په‌یوه‌ندییه‌كا راسته‌ راست پیڤه‌ هه‌یه‌.

ل ده‌ما رابووری ئه‌مه‌ریكایێ هێزێن خوه‌ ژ سه‌ربازگه‌ها «كه‌ی وه‌ن و تاجی» یێن كه‌ركووكێ و به‌غدایێ ڤه‌كێشانه‌ سنۆرێ هه‌ولێرێ یا پایته‌ختا باشوور، هه‌ر چه‌ند كو حه‌شدا شه‌عبی و هێزێن كو ل سه‌ر ئیرانێ دهێن حه‌ساب كرن، داخوازا ڤه‌كێشانا ب یه‌ك جاری كرن، لێ به‌لێ ل گه‌ل جیگیر بوونا هێزێن ئه‌مه‌ریكایێ ل هه‌ولێرێ و دانانا سیسته‌ما به‌رگرییا ئاسیمانی یا «پاتریۆت»، ل ڤێره‌ فشارا ئیرانێ و ترسا وێ پێتر لێ هات و ئه‌ڤێ چه‌ندێ وه‌كر كو ناڤچه‌یا زینی وه‌رتێ ببیته‌ ناسیارترین ناڤچه‌یا باشوورێ كوردستانێ بۆچی؟ ژ به‌ر كو ئه‌ڤ ناڤچه‌یه‌ ته‌نێ ژ بۆ باله‌فرخانه‌یا «حه‌ریرێ» ستراتیجی یه‌ و ب جهـ بوونا هه‌ر هێزه‌كا گرێدای ئیرانێ ل وێ ناڤچه‌یێ دێ د شیان دا بیت باله‌فرخانه‌یا حه‌ریرێ بكه‌ته‌ ئارمانج.

ئه‌مه‌ریكایه‌ دخوازیت «زینی وه‌رتێ» ژ هێزێن نێزیكی ئیرانێ ڤالا بكه‌ت، نه‌ په‌ده‌كه‌

«زینی وه‌رتێ» ژ روویێ سیاسی ل ژێر ده‌ستهلاتا یه‌كێتیێ یه‌، ژ روویێ كارگێری گرێدای وان ناڤچه‌یانه‌ كو د ده‌ست په‌ده‌كێ دا ‌نه‌، لێ به‌لێ یا راست په‌كه‌كێ ئه‌و ناڤچه‌ داگیر كرییه‌، وه‌ك‌ مه‌ ل سه‌ری ئاماژه‌ بۆ كری، ناڤچه‌یا «زینی وه‌رتێ» ئه‌و گرنگییا ستراتیجی نینه‌ كو ببیته‌ ئه‌گه‌را جه‌نگا حزبی، ئه‌ڤ ناڤچه‌یه‌ ب دووراتییا 36 كیلۆمه‌تران ژ ره‌واندزێ دووره‌ و 30 كیلۆمه‌تران ژ رانیێ، پاش هاتنا هێزێن ئه‌مه‌ریكایێ ژ باشوور و ناڤه‌راستا ئیراقێ بۆ هه‌ولێرێ، ئه‌مه‌ریكایێ خواست هه‌ر چ ناڤچه‌یه‌كا ل سه‌ر باله‌فرخانه‌یا حه‌ریرێ زال ژ هێز و هه‌ڤپه‌یمان و دۆستێن ئیرانێ ڤالا بكه‌ت، ئه‌ڤا ل «زینی وه‌رتێ» ژی روودای ته‌نێ ئه‌ڤه بوو، ژ به‌ر كو هه‌گه‌ر «زینی وه‌رتێ» ل ژێر هه‌ژموون و ده‌ستهلاتا ئیرانێ بیت، چه‌كێن سڤك یێن ئیرانێ دێ گه‌هن باله‌فرخانه‌یا حه‌ریرێ و ئه‌مه‌ریكا ب چ ئاوایه‌كی ئه‌ڤێ قه‌بوول ناكه‌ت.

شێخ جه‌نگی شاشی كر و هه‌ر زوو په‌نا ژ بۆ نێچیرڤان بارزانی بر

ژ به‌را ده‌ست پێكرنا كریزێ، حكوومه‌تا باشوورێ كوردستانێ هێزه‌كا هه‌ڤبه‌ش یا وه‌زاره‌تا پێشمه‌رگه‌ی ب فه‌رمانا سه‌رۆكێ هه‌رێمێ و وه‌زاره‌تا پێشمه‌رگه‌ بۆ ناڤچه‌یا «زینی وه‌رتێ» هنارت، ل گه‌ل ڤێ یه‌كێ لاهۆر شێخ جه‌نگی هه‌ڤسه‌رۆكێ یه‌نه‌كێ و فه‌رماندارێ دژه‌ تیرۆرا سلێمانیێ ل 25 مه‌ها رابووری هێزه‌ك ب ئاراسته‌یا «زینی وه‌رتێ» هنارت، لێ به‌لێ هه‌ر د زوو دا ئه‌مه‌ریكایێ په‌یوه‌ندی پێ كر و پاشڤه‌ زڤراند، لاهۆر شێخ جه‌نگی فام كر كو ئه‌و شاشییا وی كری گه‌له‌ك مه‌زن بوو، ژ به‌ر ڤێ سه‌ده‌مێ وی په‌نا بۆ نێچیرڤان بارزانی سه‌رۆكێ هه‌رێما باشوورێ كوردستانێ بر، ژ بۆ كو روویێ وی ل گه‌ل ئه‌مه‌ریكایێ ره‌ش نه‌بیت.

ل ڤێره‌ شێخ جه‌نگی باش فام كر كو هه‌ر گاڤه‌كا شاش یا ئه‌و ل دژی ئه‌مه‌ریكایێ بهاڤێژیت، دێ ئه‌و ب هێزێن خوه‌ ڤه‌ كه‌ڤیته‌ به‌ر سزایێن ئه‌مه‌ریكایێ و ئه‌مه‌ریكا ئێدی دێ وه‌كه‌ میلیشیایه‌كا گرێدای ئیرانێ ره‌فتاری ل گه‌ل كه‌ت.

ئه‌وێن كو په‌یوه‌ندی ب لاهۆر كرین و هێزا وی ژ به‌را بگه‌هیته‌ زینی وه‌رتێ راگرتی، جێگرێ هاریكارێ وه‌زیرێ ده‌رڤه‌یێ ئه‌مه‌ریكایێ بۆ ل ئۆفیسا رۆژهلات و هه‌روه‌ها جێگرێ یه‌كه‌مێ هاریكارێ وه‌زیرێ ده‌رڤه‌یێ ئه‌مریكایێ بوو، واته‌ بابه‌ت ژ بۆ ئه‌مه‌ریكایێ جددی بوو، هه‌گه‌ر هێلا سۆر نه‌بیت.

پاش ڤێ بوویه‌رێ ره‌وش ئارام بوو، لێ بۆچی كریزێ ده‌ستپێكر و كێ ئاگرێ وێ خۆش كر

ئیرانێ كارتێن خوه‌ ل باشوورێ كوردستانێ «په‌كه‌كه‌ و یه‌كێتی» بكار ئینان

ئه‌و هێزا هه‌ڤبه‌ش یا كو ژ بۆ ناڤچه‌یا «زینی وه‌رتێ» هاتییه‌ شاندن، ب فه‌رمانا هه‌ڤبه‌ش یا سه‌رۆكاتییا باشوورێ كوردستانێ و حكوومه‌تا باشوور بوو، ئه‌ڤ هێز مه‌شقدایێن ئه‌مه‌ریكایێ نه‌، لێ به‌لێ پاش راگرتنا هێزا لاهۆر شێخ جه‌نگی، ئارام بوونا ناڤچه‌یا «زینی وه‌رتێ» ب دلێ ئیرانێ نه‌بوو، ل ڤێره‌ ئیرانێ كارتا خوه‌ ل باشوورێ كوردستانێ بكار ئینا و پارتییا كاركه‌رێن كوردستانێ هه‌ر د زوو دا ل دووڤ گازییا ئیرانێ هات و ده‌ست ب ئالۆزكرنا ره‌وشێ كر.

ئیرانێ ژ بلی په‌كه‌كێ فشاره‌كا زێده‌ ل یه‌كێتیێ ژی كر، لێ به‌لێ لاهۆر شێخ جه‌نگی نه‌شیا ژ بۆ ڤێ گوهـ بده‌ت ئیرانێ، ژ به‌ر كو وی باش فام دكر كو ده‌ركه‌تن ژ رێ و فه‌رمانێن ئه‌مه‌ریكایێ چ مه‌ترسییه‌ك بۆ وی، دژه‌ تیرۆرا وی و حزبا وی ب خۆ ژی د دووڤ دایه‌، له‌وما ته‌نێ په‌كه‌كه‌ د مه‌یدانێ دا ما و ب فه‌رمانا ئیرانێ ئالۆزی دروست كرن، ئه‌ڤێ یه‌كێ ژی هێجه‌ت ژ بۆ تركیێ چێ كر كو باره‌گه‌هێن په‌كه‌كێ ل «زینی وه‌رتێ» بۆردۆمان بكه‌ت و ئه‌ڤ چه‌نده‌ ل چارشه‌مبا رابووری چێبوو وه‌ختا كو فه‌رماندارێ په‌كه‌كێ «زنار سیسۆن» و هه‌ژماره‌كا گه‌ریلایان د وێ بۆردۆمانێ دا هاتینه‌ ئارمانج كرن.

یه‌كێتیێ چ گاڤ نه‌هاڤێتن، لێ جه‌نگا مه‌دیایی و تۆمه‌تبار كرنا په‌ده‌كێ ده‌ستپێكر

ژ بۆ كو یه‌كێتیێ گه‌له‌ك ئارمانجان ب ده‌ست بێخیت، وه‌كه‌ ڤه‌شارتنا وێ شه‌رمه‌زارییا راده‌ست كرنا «مسته‌فا سه‌لیمی»، ب هاریكارییا مه‌دیایا په‌كه‌كێ و ئیرانێ تومه‌ت ژ بۆ په‌ده‌كێ دروست كرن و نووچه‌ و مژارێن وه‌ها وه‌شاندن كو په‌ده‌كه‌ یا هێزێن حزبی ژ بۆ «زینی وه‌رتێ» دشینیت، لێ به‌لێ مه‌سروور بارزانی سه‌رۆكێ حكوومه‌تا باشوورێ كوردستانێ هه‌ر زوو به‌رسڤا ئه‌ڤان هه‌ولێن ب ئارمانج دا و د به‌یانه‌كا‌ فه‌رمی دا گۆت كو ئه‌ڤ هێز یێن وه‌زاره‌تا پێشمه‌رگه‌ی نه‌ و حكوومه‌تا موماره‌سا ده‌ستهلاتێن خوه‌ كرینه‌، ره‌خنه‌یێن دژوار ژی ل په‌كه‌كێ گرتن كو بزاڤا ئالۆز كرنا ره‌وشێ دكه‌ت.

پاش پۆلیتبیرۆیا په‌ده‌كێ ژی د به‌یانه‌كا‌ فه‌رمی دا به‌رسڤا توهمه‌تێن یه‌نه‌كێ و په‌كه‌كێ دان و ئه‌ڤ جه‌نگا مه‌دیایی یا وان كرییه‌ سه‌ر په‌ده‌كێ وه‌ك مه‌له‌كرنێ د گۆما شێلی دا‌ ب ناڤ كرن.