حه‌فته‌ر خوە وەکە سەرۆکێ لیبیایێ دا ناساندن

حەفتەر خوە وەکە سەرۆکێ لیبیایێ دا ناساندن

ل گۆر راپۆرێن مەدیایێن لۆکالی یێن لیبیایێ، گەنەرال خەلیفە حەفتەر، ل ئێڤارا رۆژا رابووری 27/4/2020ان د پەیامەک ڤیدیۆیی دە کو ل مەدیایێن لیبیایێ دە هات وەشاندن راگهاند: «ل گۆر خواستەکا هەمولاتییان، لهەڤهاتنا سوخەیرات کو ل سالا 2015ان دە ل مەغربێ هاتبوو ئیمزە کرن تێ هەلوەشاندن، ژ بەر کو ئەڤ لهەڤهاتنا سیاسی بوویە سەدەما وێران بوونا وه‌لات و وه‌لات بەر ب پاشەرۆژەک پر خەتەر دبە».

گەنەرال حەفتەر هەر وەها راگهاند: «ل گۆر خواستەکا هەمولاتییان، ئەز وەکە فەرماندارێ ئارتەشا نەتەوی یا لیبیایێ، بەرپرساتییا رێڤەبەرییا کارێن وەلات وەردگرم و وێ بخەبتم کو پرسگرێکێن گەلێ لیبیایێ کێم بکم و بەرەڤانیێ ژ مافێن وان یێن رەوا بکم».

د بەشەکە دن یا پەیاما خوە یا ڤیدیۆیی دە، گەنەرال حەفتەر ئەشکەرە کر، ئەو وێ خەباتێ بکە کو رەوشەک باش ژ بۆ پێکئانینا هکوومەتەکە نەسەربازی و ل گۆر خواستەکا گەل بێ ئاڤا کرن.

حەفتەر هەروەها راگهاند، ئەمێ بەردەوام بن ل سەر بزاڤا خوە ل دژی دەولەتا ویفاق، هەیاکو ب تەمامی هەموو خاکا لیبیایێ ئازاد بکین.