حكوومه‌تا باشوورێ كوردستانێ ئیرۆ، ل ده‌ربارا برینا مووچه‌یێن فه‌رمانبه‌ران به‌رسڤا حكوومه‌تا ئیراقا فه‌ده‌رال دا و راگهاند كو برینا مووچه‌یێن فه‌رمانبه‌ران چ شه‌رعییه‌ته‌كا یاسایی و ده‌ستووری نینه.
دیوانا سه‌رۆكاتییا ئه‌نجوومه‌نا وه‌زیرێن هه‌رێما باشووری كوردستانێ د نامه‌یه‌كێ ده كو ئاراسته‌ی ئه‌میندارییا گشتی یا ئه‌نجوومه‌نا وه‌زیرێن ئیراقێ كرییه، ب به‌لگه‌یێن یاسایی به‌رسڤا حكوومه‌تا فه‌ده‌رال یا ئیراقێ ل ده‌ربارا نه‌یاساییبوون و نه‌ده‌ستوورییا بریارا برینا مووچه‌یێن فه‌رمانبه‌رێن باشوورێ كوردستانێ دایه.
د به‌رسڤێ ده كو چه‌ندین خشته ل گه‌ل ده هاتنه هه‌ڤپێچ كرن، ئاماژه هاتییه كرن كو برینا مووچه‌یێن مووچه‌خۆرێن هه‌رێما باشوورێ كوردستانێ، پێشێلكرنه ژ بۆ مافێن یاسایی و ده‌ستووری یێن مووچه‌خۆرێن هه‌رێما كوردستانێ كو هه‌ڤئاوایێ مووچه‌خۆرێن دن یێن ئیراقێ ئه‌ركێن خوه د خزمه‌تا گشتی ده ئه‌نجام ددن.
گرنگترین خالێن به‌رسڤا حكوومه‌تا هه‌رێما باشوورێ كوردستانێ:
برینا مووچه‌یێن مووچه‌خۆرێن هه‌رێما باشوورێ كوردستانێ نه‌یاسایی و نه‌ده‌ستووری یه.
حكوومه‌تا ئیراقێ ل سالا 2019ێ پێشوه‌خت پارێ راده‌ست نه‌كرنا 250 هزار به‌رمیلێن په‌ترۆلێ ژ هه‌رێما كوردستانێ برییه.
هه‌ر چه‌نده پێشمه‌رگه ل گۆر ده‌ستوورا ئیراقێ به‌شه‌كه ژ سیسته‌ما به‌رگرییا ئیراقێ و رۆلێ سه‌ره‌كی و گرنگ د شه‌رێ دژی تیرۆرێ دا دیتییه و قوربانیێن زۆر داینه، لێ به‌لێ هه‌تا نها حكوومه‌تا ئیراقێ چ مووچه و مافێن دارایی ژ بۆ پێشمه‌رگه‌ی نه‌مه‌زاختنه.
حكوومه‌تا هه‌رێما كوردستانێ تا نها مێهڤاندارییا پێتر ژ ملیۆن په‌نابه‌ر و ئاواره‌ییان كرییه، ب تایبه‌ت ئاواره‌یێن پارێزگه‌هێن ئیراقێ كو ب ته‌نێ به‌رپرساتییا مه‌زاختنێن وان ب ستۆیێ خوه‌ڤه گرتنه و حكوومه‌تا ئیراقێ د ڤێ ده‌ربارێ ده هیچ هاریكارییه‌ك پێشكێش نه‌كرییه.
حكوومه‌تا هه‌رێما كوردستانێ خشته‌یه‌ك ب سه‌رجه‌م وان زیانان هه‌ڤپێچ كرییه كو حكوومه‌تێن یه‌ك ل دووڤ یه‌كێن ئیراقێ ژ سالا 1963ێ تا 2003ێ ب هه‌رێما كوردستانێ گه‌هاندینه كو ئه‌ڤ زیانه دگه‌هن ( 384.698.302.600 ) سێسه‌د و هه‌شتێ و چار ملیار و شه‌ش سه‌د و نۆت و هه‌شت ملیۆن و سێسه‌د و دو هزار و شه‌ش سه‌د دۆلاران.
