ژ بلی ئیراقێ، ته‌رۆریستێن داعشێ ل سووریێ ژی چالاکیێن خوە زێدە کرنە و د داوی ئێریشا خوه دا كو ل دێرازۆرێ كرییه، 4 كه‌س كوشتنه.
نه‌رینگه‌ها سووری یا مافێن مرۆڤان ئیرۆ رۆژا دوشه‌می 18/5/2020ێ ئه‌شكه‌ره كر كو چەکدارێن سەر ب رێخستنا تەرۆری یا داعشێ ڤه ل سووریێ رێیا شامێ بۆ دێرازۆرێ قوت کرن و 4 کەس کوشتن.
چەکدارێن داعشێ رێیا شامێ بۆ دێرازۆرێ ل دەڤەرا «کەباجب» قوت کر و ئەرەبەیەک کو ئەفسەرەکی رژێما سووریێ، 2 له‌شكر و ژنەک تێدا بوون، دەستەسەر کرن.
رەوانگەھا سووری یا مافێن مرۆڤان ئەڤ یەک ژی ئەشکەرە کر، چەکدارێن داعشێ هەر 4 کەسێن د وێ ئەرەبەیێ دا کوشتن.
پاش کو داعشێ رێ یا د ناڤبەرا شامێ بۆ دێرازۆرێ دا قوت کری، رژێما سووریێ ھێزەکا مەزن شاندە وێ دەڤەرێ و ھەیا نھا شەر و پەڤچوون ل ور بەردەوامە.
ھەڤپەیمانیا ناڤدەولەتی و ھێزێن سووریایا دەمۆکراتیک د مەھا ئادارا 2019ێ دا داوی سەنگەرێن چەکدارێن داعشێ ل رۆژھلاتێ دێرازۆرێ کۆنترۆل کربوو و سەرکەفتنا سەربازی ب سەر داعشێ دا راگھاندبوو، لێ بەلێ ئەڤ بۆ دەما سێ مەهانە چالاکیێن ڤێ رێخستنا تەرۆری ل ناڤچەیێن د ناڤبەرا پارێزگەھا دێرازۆرێ و حومسێ دا زیدە بوونە، هەر ب ڤێ سەدەمێ چەندین جارن شەر و پەڤچوون د ناڤبەرا ھێزێن رژێما سووریێ و چەکدارێن داعشێ دەرکەفتیە.
