رێڤەبەریا خوەسەر داخوازێ ژ ھەڤپەیمانیا ناڤدەولەتی دکە ھەول بدە، د جیبجیکرنا یاسایا سەزار دە ل سەر سووریێ، باندۆر ل ناڤچەیێن وان نەبە.
رێڤەبەریا خوەسەر و باکورێ رۆژھلاتێ سووریێ د داخویانییێ دە راگھاند، جیبجیکرنا یاسایا سەزار، نە تەنێ، دێ باندۆرێ ل ناڤچەیێن د دەستێ رەژیما سووریێ دە بکە بەلکو دێ زیانێ بگھینە ناڤچەیێن د دەستێ رێڤەبەریێ دە ژی.
ب گۆتنا وان، پێوەندی د ناڤبەینا بەشێن سووریێ دە ب تەڤاھی ھەیە لەوما جیبجیکرنا وێ یاسایێ، دێ زیانێ بگھینە ناڤچەیێن وان و دێ پرسگرێکێن مەزن دەرخە نەمازە د ڤێ رەوشا ئالۆز، ئا کو ناڤچەیێن وان تێ دە دەرباس دبە.
دیار ژی دکە، جیبیجیکرنا وێ یاسایێ، دێ باندۆرەک راستەراست ل شەرێ ل دژی داعشێ ژی بکە.
رێڤەبەریا خوەسەر داخواز ژ ھەڤپەیمانیا ناڤدەولەتی، جڤاکا ناڤدەولەتی و دەزگەھێن ناڤنەتەوەیی کریە، کو ھەول بدن، باندۆرا وان سزایان لسەر ناڤچەیێن رێڤەبەریا خوەسەر نەبە، کو ب گۆتنا وان دگەل ھەبوونا ئاستەنگیان، دێ دەرفەت ژ بۆ داعشێ چێبە، کو ژ نوو ڤە ھێزێن خوە رێکبخە.
