ته‌ڤگه‌را تالیبانێ ئه‌شكه‌ره كر، رێبه‌رێ وان مه‌لا هیبه‌توللا ئاخاوه‌ند زاده، تووشی ڤیرۆسا (كۆڤید-19)ێ هاتییه، لێ پێگه‌ها فۆرن پۆلیسی ئه‌شكه‌ره كرییه، ئه‌و ب ڤیرۆسێ مرییه.
ل گۆر راپۆره‌كا پێگه‌ها كۆڤارا فۆرن پۆلیسی، به‌رپرسیارێ له‌شكری یێ ته‌ڤگه‌را تالیبانێ، مه‌وله‌وی محه‌مه‌د عه‌لی جان ئه‌حمه‌د گۆتییه: رێبه‌رێ ته‌ڤگه‌رێ مه‌لا هیبه‌توللا ئاخاوه‌ند زاده و هه‌ژماره‌كه دن یا سه‌ركرده‌یێن تالیبانێ ب ڤیرۆسا (كۆڤید-19)ێ كه‌تنه.
هه‌ر چه‌ند كو مه‌له‌وی عه‌لی جان ژ بۆ فۆرێن پۆلیسیێ ئه‌شكه‌ره كرییه كو رێبه‌رێ تالیبانێ مه‌لا هیبه‌توللا نها تێ ته‌داوی كرن، لێ به‌لێ هنه‌ك چاڤكانیێن دن یێن ته‌ڤگه‌رێ ژ باژاری كویتا یێ پاكستانی ژبۆ هه‌مان پێگه‌هێ گۆتنه كو رێبه‌رێ تالیبانێ ب سه‌ده‌ما (كۆڤید-19)ێ جانێ خوه ژ ده‌ست دایه.
مه‌وله‌وی دبێژه: هیبه‌توللا زاده ژ بۆ ته‌داویێ بۆ نه‌خوه‌شخانێ هاتبوو ڤه‌گوهاستن، ره‌ت نه‌كر ژی كو ئه‌و ل پاكستانێ چاره‌سه‌ریێ وه‌ردگره.
هه‌ر ل ڤێ ده‌ربارێ ده، حكوومه‌تا ئه‌فغانستانێ ئه‌شكه‌ره كر كو هه‌ژماره‌كه زێده یا به‌رپرسیارێن تالیبانێ ژ وان یێن ئۆفیسا ده‌وحه یا پایته‌ختا قه‌ته‌رێ وهه‌یا به‌رپرسیارێن كو ته‌ڤلێ گۆتوبێژێن ل گه‌ل ئه‌مه‌ریكایێ دا بوون، ب كۆڤیدێ كه‌تنه.
