ئیسماعیل قائانی و لاهۆر شێخ جه‌نگی دێ كۆم بن

ئیسماعیل قائانی و لاهۆر شێخ جه‌نگی دێ كۆم بن

فه‌رماندارێ گشتی یێ فه‌یله‌قا قودسێ یێ سپایێ پاسدارێن ئیرانێ، ئیرۆ گهشتییه‌ به‌غدایێ، ئه‌ڤ یه‌ك هه‌موه‌خته‌ ل گه‌ل سه‌ردانا لاهۆر شێخ جه‌نگی، هه‌ڤسه‌رۆكێ یه‌كێتییا نشتیمانییا كوردستانێ.

ئیسماعیل قائانی، فه‌رماندارێ فه‌یله‌قا قودسێ یێ گرێدای سپایێ پاسدارێن ئیرانێ، ئیرۆ رۆژا چارشه‌میێ 3/6/2020ان گهیشتییه‌ به‌غدا پایته‌ختا ئیراقێ، قائانی ل گه‌ل وی شاندێ ئیرانێ هاتییه‌ كو ئیرۆ ب سه‌رۆكتییا وه‌زیرێ ووزێ گهیشتنه‌.

مه‌دیایا ئیراقێ ده‌ست نیشان كرنه‌ كو قائانی ب به‌فه‌رمی داخوازا ڤیزایا ئیراقێ ژ وه‌زاره‌تا كارێن ده‌رڤه‌ كربوو.

ل گۆر چاڤكانیێن پێگه‌ها «داركا مازی» ل باشوورێ كوردستانێ، لاهۆر شێخ جه‌نگی هه‌ڤسه‌رۆكێ یه‌كێتییا نشتیمانییا كوردستانێ ژی ئیرۆ سه‌ردانا به‌غدایێ كرییه‌، ئه‌ڤ سه‌ردان هه‌موه‌ختا گهیشتنا ئیسماعیل قائانی بوو.

لاهۆر شێخ جه‌نگی ل به‌غدایێ ل گه‌ل سه‌رۆكێ پارلمه‌نا ئیراقێ محه‌مه‌د حه‌لبووسی جڤیایه‌ و هه‌روه‌ها وێ ل گه‌ل هنه‌ك رایه‌دارێن دن یێن ئیراقێ بجڤه‌.

چاڤكانیێن پێگه‌ها «داركا مازی» ل باشوورێ كوردستانێ ئه‌شكه‌ره‌ كرنه‌، لاهۆر شێخ جه‌نگی و ئیسماعیل قائانی وێ ل به‌غدایێ بجڤن.

پاش كوشتنا قاسم سوله‌یمانی، فه‌رماندارێ به‌رێ یێ سپایێ پاسداران ل نێزی باله‌فرخانه‌یا به‌غدایێ، رابه‌رێ شۆرشا ئیسلامی یا ئیرانێ ئایه‌توللا عه‌لی خامنه‌یێ، ئیسماعیل قائانی ل وێ پۆستێ وه‌زیفه‌دار كر، ئه‌ڤ ژی دبه‌ سه‌ردانا دوویه‌م یا ڤی رایه‌دارێ به‌رزێ ئیرانی ژ بۆ ئیراقێ.