قارایلان نووچەیێن ANFێ درەو، رەد و رەخنە کر

موراد قارایلان نووچەیێن ANFێ درەو، رەد و رەخنە کر

ل رۆژا سێشەمی 3 خزیرانێ نووچەیەک ژ ھێلا ئاژانسا نووچەیان ئا فراتێ کو یەک ژ دەزگەھێن راگھاندنا ل سەر پەکەکێ یە، ب سەرنڤیسا «میت-پەدەکە ئامادەکارییا پرۆڤاقسیۆنێ دکن» نووچەیەک بەلاڤ کربوو.

 ل سەر مەدیا جڤاکی پر کەسان ئەڤ نووچە وەکە درەو شیرۆڤە کرن و رەخنێن توند برن سەر مالپەرێ ANFێ. ئیرۆ موراد قارایلان ژی ل سەر ڤێ نووچەیا درەو رەخنە ل ANFێ گرتن.

د راپۆرا ANFێ  ل 3 خزیرانێ دە ب کورتاھی وەھا ھاتبوو نڤیساندن: «ئەندامەکی ئاساییشا دھۆکێ کو نەخوەست ناڤێ خوە ئاشکەرا بکە گۆتییە د ئۆتێله‌كا دھۆکێ دە، میت و پاراستنێ کۆمبوونەک چێکرییە، د ڤێ کۆمبوونێ دە گۆتنە دێ گرۆپەک ب جلێن گەریلایان بکەڤە ناڤا باژارێ دھۆکێ دە و مرۆڤێن مەدەنی و ترکوومەنا بکوژە، ژ بۆ ڤی کاری ژی 200 جلێن گەریلایان ھاتنە ئاما دەکرن، پشتی ڤێ کۆمکوژی کو وێ وەرە کرن، دێ پەکەکە بھێتە تاوانبارکرن».

ئەڤ نووچەیا ANFێ د ناڤا تۆرێن جڤاکی دە پر ھات رەخنە کرن و وەکە کریارەکی ئازرێنه‌ر ھاتە ب ناڤ کرن، ئیرۆ موراد قارایلان ژی ئەڤ نووچە رەخنە کر.

موراد قارایلان کو دوھ تەڤلی رادیۆیا مەزۆپۆتامیایێ ببوو، بەرسڤ دا پرسێن کو ژ وی ھاتینە کرن، یەک ژ وان پرسان ل سەر نووچەیا ANFێ بوو، پێشکێشکەری گۆت: «میت و پاراستنێ جڤینەک چێکرییە و د جڤینێ دە تێ ئیدیئا کرن کو لھەڤکرنەک ژ بۆ چالاکییەکێ وەرە کرن پێکھاتنە، گەلۆ پێویست دکە کو ئەڤ ئیدیئا مجد وەرە گرتن»؟

 موراد قارایلان ب توندی ئەڤ ئیدیئا رەد کر و وھا بەرسڤ دا: «ل گۆری زانیاریێن دەست مە دا ئەم نکارین ڤێ نووچەیێ پشتراست بکین، د دەست مە دا چ ئاگاھی ل سەر ڤی بابەتی نینن، ئەرکێ راگھاندنێ ئەوە کو ھەکە پلانێن ڤەشارتی ھەبن، وان ئیفشا بکە، لێ بەلێ دەزگەھەکی راگھاندنێ پێویستە ل سەر ڤان ئاگاھییان لێکۆلینێن باش بکە، سەرلێدانێ ل ھنەک دەزگەھێن دنێن راگھاندنێ بکە و ھەول بدە کو ڤان ئاگاھییان راستییا وێ فەھم بکە، ل گۆری نه‌رینا من ل سەر ڤی بابەتی ھنەک کێماسی ھەنە، پێویستە راگھاندن پر ھشیاری کارێ خوە بکە، نووچەیێن  وەھا مژارێن جددی نە.«

ب تایبەتی ANFێ ڤان دەمێن داویێ دە پر نووچەیێن دره‌و و ئیستفزازی بەلاڤ کرن، د ناڤا رایا گشتییا کوردی دە ژی ئەڤ نووچەیێن درەو پر دھێنە رەخنە کرن، ئەو نووچەیێن ل سەر ناڤێ چاڤکانیێن وان نە دیار تێنە چێکرن، ھەموو ژی ئەو مژارن کو جڤاکا کورد تێ ھەستیارە، ب تایبەتی ژی رێڤەبەرییا ھەرێما کوردستانێ د ڤان نووچەیان دە تێ ئارمانج کرن، لێ مەدیا جڤاکی ڤان درەو و پیلانێن فورات نیۆزێ پر زوو ئاشکەرە و رەخنە دکە.