رۆژهلاتا كوردستانێ ل دژی په‌كه‌كێ ده‌ست ب راپه‌رینێ كر

مالباتا قوربانیێن دەستێ پەکەکێ ب رێیا ڤیدیۆ و گەلێ رۆژهلاتێ کوردستانێ ژی ب داخوەیانییان، کارێن قرێژ یێن پەژاکێ پرۆتەستۆ دکن.

كارڤه‌دانێن کەسێن بژاردە و چالاکڤانێن رۆژهلاتێ کوردستانێ، ل سەر کوشتنا جوانێن ڤێ پەرچەیا کوردستانێ ژ ئالیێ پارتیا کارکەرێن کوردستانێ پەکەکێ ڤه‌ بەردەوام دکن و ب دەهان چالاکڤانێن سیاسی، نڤیسكار، رۆژنامەڤان و مامۆستەیێن زانینگەهێ، د داخوەیانییەکێ دە، هەڤدەم دگەل پرۆتەستۆکرنا کوشتنا جوانێ کورد «سۆران ئەختەر سەمەر» ژ ئالیێ پژاکێ ڤە، داخواز دکن ئەڤ یەک ببە داوی کریار ژ وان کریارێن تەراژەدیک یێن کو ژ ئالیێ کوردان ڤە ل دژی کوردان دهێن ئەنجام دایین.

هەڤدەم ڤیدیۆیا باڤێ «سۆران ئەختەر سەمەر» و دایکا «سامان دانیشوەر» کو زارۆیێن وان ژ ئالیێ پژاکێ ڤە ب ئاوایەک هۆڤ و دوور ژ مرۆڤاتیێ هاتینە کوشتن، ژ ئالیێ کوردێن رۆژهلاتێ کوردستانێ د سۆشیال مەدیایێ دە ب ئاوایەک بەرفره‌هـ هاتینە پارڤە کرن و داخواز دکن پەکەکە ل ناڤچەیێن وان دوور ببن و ل ور نەمینن.

هەر وەک پێش نها د پێگه‌ها «دارکا مازی» دە مە راپۆرەک ل سە پارڤەکری، جوانەک کاسبکار و بێ تاوان یێ ناڤچەیا مەریوانێ ل رۆژهلاتێ کوردتستانێ، ل سەر ڤێ یەکێ کو نەدکاری باجێ بدە پەکەکێ، ژ ئالیێ گریلایێن پەژاکێ ڤە، باسکێ رۆژهلاتێ ولات یی پەکەکێ، ب فێل ژ گوند دوور دکن و ب ئاوایەک نە ئینسانی و هۆڤ دکوژن و جه‌سه‌دێ وی پاش خوە دهێلن.

ناڤچەیێن مەریوانێ و هەورامانێ، په‌كه‌كێ ب هەڤپەیمانا رەژیما داگیرکه‌را ئیرانێ دزانن

كارڤه‌دانێن کوردێن رۆژهلات ل همبەر ڤی کارێ دژە گەل یێ پژاکێ/پەکەکێ، هێژان بەردەوام دکن و گەلێ رۆژهلاتێ کوردستانێ و ب تایبه‌ت یێ ناڤچەیێن مەریوانێ و هەورامانێ، پارتییا کارکەرێن کوردستانێ ب هەڤپەیمانییا رەژیما داگیرکه‌را یا کۆمارا ئیسلامی یا ئیرانێ دزانن و داخوازا دەرکرنا وان ژ ناڤچەیێن خوە دکن.

ب دەهان چالاکڤانێن سیاسی، نڤیسكار، رۆژنامەڤان و مامۆستەیێن زانینگەهێ ل رۆژهلاتێ کوردستانێ، ل ژێر ناڤێ «نە ژ بۆ کوشتنا کوردان ب دەستێ کوردان، بەلێ ژ بۆ پاراستنا کەرامەتا کوردان»، بانگەوازەک ژ بۆ هەڤ هەلویستی و یەکدەنگییا کوردان ل ڤێ بارێ دە پارڤەکر، سەرەرایێ ڤێ یەکێ کو ئەڤ کارێ هووڤ و نە ئینسانی یێ کوشتنا «سۆران ئەختەر سەمەر» ب دەستێ پژاکێ/پەکەکێ پرۆتەستۆ کر، ئەڤ پرسە ژ ڤێ رێخستنێ کر: «ل ڤر پرسیارەک ئەخلاقی و پر گرینگ سەرهلددە، گەلۆ ئینسانێ کورد کو ب شەڤ و رۆژ ل ژێر ستەم و زولما بێ داوی یا دەولەتا ئیرانێ دا یە، ئینسانەک کو ئەدەبیات و زمان و چاند و کەلتۆرا وی د ناڤا قەفەسەکێ دە هاتییە زیندان کرن، ئینسانەک کو ئاڤ، خوەزا، سامان و سرۆشت و هەموو شوونوارێن دیرۆکی و بیردانکا دیرۆکی لێ هاتییە ستاندن، ئینسانەک کو پیویستی یێن وی یێن ژیانکرنا سبە مسۆگەر نینە، ئینسانه‌ك کو خوەدی تو سازییەک فەرمی نینە و ل سەر روویێ ڤێ دنێ بێ دەولەت و بێ هێڤی مایە، هوون ب تو پیڤەرەک ئینسانی و ئەخلاقی رێ ب خوە ددن دەنگی وی تونە بکن، وی بترسینن، کەرامەتا وی بشکێنن و ل داویێ ژیانا وی ژێ بستینن؟».

گه‌لێ رۆژهلات دخوازه‌ كوشتنا سۆران ئه‌خته‌ر بكن وه‌رچه‌رخانه‌ك دیرۆكی

د بەشەکە دن یا ڤێ بانگەوازیی دە هاتییە: «سەرەرای پرۆتەستۆکرنا ڤی کارێ هووڤ، ئەم داخواز دکین کوشتنا سۆران ئەختەر سەمەر، بکین وەرچەرخانەکە دیرۆکی و ئاوایەکی نوو یێ تێگهیشتن ژ ئەخلاق و جڤاکا….» د بەشەکە دن یا بانگەوازیێ دە هاتییە: «گەلێ رۆژهلات ل همبەر دوبارەکرنا کارەک ب ڤی ئاوا بێدەنگ نابە و وێ هەلوەستەک پر توند نیشان بدە».

هەڤدەم پشتی کو پژاکێ د داخوەیانییەکێ دە وەکە هەر جار خوەستی خوە بێ گونەهـ نیشان بدە ژ ئەنجامدایینا ڤی کارێ هۆڤ و حاشا ژ کوشتنا ڤی لاوێ بێ تاوان یێ باژارێ مەریوانێ کری، باڤێ «سۆران» د ریکۆردەک ڤیدیۆیی دە هۆرگلی یێن کوشتنا کورێ خوە ژ لایێ پژاکێ ڤە پارڤەکر، ڤیدیۆیا باڤێ «سۆران ئەختەر سەمەر» د سۆشیال مەدیایێ دە ب ئاوایەک زیدە هاتییە پارڤە کرن.

«پەکەکە و باسکێن وێ، دەستکێن وان بڤرانن کو د دارستانا هزری یا سه‌رۆکێ خوە دە هاتینە و مزگینییا ئاڤدانا دار و گولین ڤی نیشتیمانی ددن»

ڤیدیۆیەک دن کو د ڤان رۆژان دە ب ئاوایەک زیدە تێ پارڤە کرن، ئا تایبەتە ب دایکا قوربانییەکی دن یێ دەستێ پەژاکێ.

دایکا «سامان دانشوەر» کو کورێ وێ پشتی 10 سال خزمەتکرن ب پەکەکێ، سالا رابووری د ناڤا باغچەیێ خوە دە و ل پێش چاڤێن باڤ و دایکا خوە هاتبوو کوشتن، د ریکۆردەک ڤیدیۆیی دە هەڤدەم دگەل سەرەخوەشی کرن ل مالباتا «سۆران ئەختەر سەمەر» باس ل کوشتنا کورێ خوە دکە ژ ئالیێ پژاکێ/پەکەکێ ڤە و ب گرۆپەک تەرۆریستی ب ناڤ دکە.

کوردێن رۆژهلات د نڤیساندنێن خوە دە باس ل ڤێ یەکێ دکن کو پژاک ب ناڤێ کوردایەتیێ دخوازن کوردێن رۆژهلات و خەباتا وان یا رزگاریخوازانە ژ ناڤ ببن و دنڤیسن: «پەکەکە و باسکێن وێ، دەستکێن وان بڤرانن کو د دارستانا هزری یا سه‌رۆکێ خوە دە هاتینە و مزگینییا ئاڤدانا دار و گولین ڤی نیشتیمانی ددن».

ئه‌م رێنادن رێڤه‌به‌رێن په‌كه‌كێ رۆژهلاتا كوردستانی ب ده‌ردێ رۆژئاڤا ببه‌ن

کوردێن رۆژهلات تەکەز کر کو ئەو ب تو ئاوا رێ نادن پەکەکە ب هەڤکاری د گەل کۆمارا ئیسلامی یا ئیرانێ دە پێشەرۆژا رۆژهلاتێ کوردستانێ ژناڤ ببن و دبێژن رێڤەبەرێن پەکەکێ د شاشتییەک مەزن دە نە، گەر وەها بفکرن کو ئەو دکارن پێشەرۆژا رۆژهلاتێ کوردستانێ وەکە رۆژئاڤا کوردستانێ لێ بکن.