هێزێن ده‌وله‌تا داگیركه‌را ترك، ئیرۆ ل باژارێ ئه‌ده‌نه‌یێ ئۆپه‌راسیۆن ل دژی شانه‌یێن ووندا یێن پارتییا كاركه‌رێن كوردستانێ پێكئانین و 10 كه‌س بن چاڤ كرن.
ئیرۆ رۆژا یه‌كشه‌می 14/6/2020ان، هێزێن ئه‌وله‌كاریێ یێن ده‌وله‌تا ترك، د ته‌عقیبا شانه‌یێن ووندا یێن په‌كه‌كێ ده، ئۆپه‌راسیۆن ل ئه‌ده‌نه‌یێ پێكئانی و 10 كه‌س كو سووچا ئالیگرییا په‌كه‌كێ پێره‌یه، هاتن بن چاڤ كرن.
ل گۆر ئاگاھیێن پێگه‌ها «داركا مازی»، تیمێن برێڤه‌برییا دژی تەرۆرێ ل ئه‌ده‌نه‌یێ ئه‌ڤ ئۆپه‌راسیۆن ل ھەمبەری کەسێن كو بەشداری ئێریشا سه‌ر پۆلیسان ب کەڤر، تەقەمەنیێن دەستەچێکری و مۆلۆتۆفان كرنه، هاتن بن چاڤ كرن.
ب سووچا په‌كه‌كێ و چالاكیێن ڤێ پارتیێ، پۆلیسێن تركان بێ ناڤبه‌ر ئۆپه‌راسیۆنان ل سه‌ر مالێن كوردان پێك تینن و ژ ده‌ستپێكا ڤێ سالێ ڤه، ب سه‌دان كه‌س هاتنه بن چاڤ كرن.
