ھاک-پار: پشتگرییا یەکتییا سییاسیا کوردێن رۆژاڤایێ کوردستانێ دکە

ھاک-پار: پشتگرییا یەکتییا سییاسیا کوردێن رۆژاڤایێ کوردستانێ دکە

پارتیا ماف و ئازادییان ھاک-پار ێ دەربارێ رێکەفتنا ENKSê  و  PYNKêدە داخویانیەک بەلاڤ کر و د وێ داخویانیێ دە راگھاند ئەو پشتگریێ ل یەکیتیا سیاسییا کوردێن رۆژاڤایێ کوردستانێ دکن.

داخویانیا ھاک- پارێ وھایە:

خوەشحالین کو پشتی گەلەک دان و ستاندنان، د رۆژا ١٦.٠٦.٢٠٢٠ ئان دە، ھێزێن کوردێن رۆژاڤایێ کوردستانێ یێن سیاسی گاڤەکە گرنگ ئاڤێتن. تەقەز ڤێ گاڤا پیرۆز دلێ تەڤاھیا کوردان خوەش کرییە و ئەو ھێڤییا ئەنجامەکە ئەرێنی نە و پشتگرییا ڤێ پێڤاژۆیێ دکن. مرۆڤ دکارە ڤێ ھەولدانێ وەک گاڤەکە دیرۆکی بپەژرینە.

ئەنجومانا نیشتمانی یا کورد ل سوورییێ (ئەنەکەسە) و پارتییێن یەکتییا نەتەوییێن کورد (پەیەنەکە) د رۆژا ١٦.٠٦.٢٠٢٠ ئان دە، دەرکەتن پێش چاپەمەنی و رایا گشتی و ئەشکەرە کرن، کو وان ل سەر گەلەک خالان ل ھەڤ کرنە. ھێژایی گۆتنێیە، کو لھەڤ کرنا وان ل سەر بنگەھا پەیمانا دوھۆکێ یا سالا ٢٠١٤ ھاتییە پێک ئانین.

خالێن کو ھێزێن کوردان ڤێ گاڤێ ل سەر ل ھەڤکرنە، دکارن ببن بنگەھەکە تەکووز ژ بۆ بەرفرەھ کرن و جی ب جیھ ئانینا ڤێ پەیمانا گرنگ. وان خالێن گرنگ یێن کو د سالا ٢٠١٤ان دە، د پەیمانا دوھۆکێ دە جیھ گرتبوون، خالێن وەک رێڤەبەری، شریکاتی، ئەولەکاری و چاوانییا  پاراستنییێ بوون. ئەگەر ھەردو ئالی ژ دل ل سەر ڤان خالانا کارێ خوە ئاڤا بکن، یەکیتی یا د ناڤبەرا کوردێن رۆژاڤایێ کوردستانێ دە وێ د دەمەکە کورت دە بگێژە ئەنجامێ و ئەمێ ژی پێ دلخوەش بن و ھەیا کو ژ دەستێ مە بێ ئەمێ ببن ئالیکار.

تشتێ ھەری بالکێش ئەوە، کو د بەیانێ دا تێ گۆتن کو، ھەر دو ئالییان ل سەر “رامانا ھەڤپار یا ژ بۆ پێک ئانینا یەکتییا نەتەوی یا کورد“ ل ھەڤ کرنە. دیسا ھاتییە گۆتن، کو ھەردو ئالی یێ د پێشقەدەمێ دە، پەیمانەکە بەرفرەھتر دەستنیشان بکن. ھەلبەت ئەڤ گۆتن ھێڤییەکە مەزن ددن تەڤایێ کوردان. ئەڤ گاڤا گرنگا بەر ب یەکیتییێ، د گەل پشتەڤانی و چاڤدەرییا کۆالیسیۆنا ناڤنەتەوی، پێک تێ و ئەڤ یەک بێ گومان وێ دەستێ ھێزێن کورد بەرامبەر دەولەتا زۆردارا سوورییێ ژی، خورتتر بکە. پێکھاتنا یەکیتییا کوردان ل رۆژاڤایێ کوردستانێ، دەستکەتییێن ھێژا و ماییندە ب خوە رە تینە. ئەڤ دەستکەتی لازمە ب خوەدیتی و بەرپرسییارییەکە ھەڤپار و ب ئاستەکە نەتەوی وەرن پاراستن.

جیھێ شانازیێ یە، کو ھەر دو ئالییان گەلەکی ئەشکەرە دلخوەشی و سپاسداری یێن خوە ژ بۆ وان کەسایەتی یێن کو، ژ بۆ ڤان گاڤێن یەکتییا د ناڤبەرا ھێزێن سییاسی یێن رۆژاڤایێ کوردستانێ بوونە ئالیکار، ئانین سەر زمان. شێورمەندێ کۆئالیسیۆنا ناڤنەتەوی برێز وڵام رۆباک ژی د دەما راگیھاندنێ دا بەشداربوو و وی تایبەتی رۆلا سەرۆکێ برێز مەسود بارزانی و سەرۆکێ ھەرێما کوردستانێ برێز نێچیرڤان بەرزانی یا د ڤێ ل ھەڤ کرنێ ب ئەرێنی نرخاندن.

ئەم وەک پارتییا ماف و ئازادییان / ھاک-پار ھەردو ئالییان پیرۆز دکن و د ھەمان دەمێ دا ھێڤی دکن کو تەڤایا خالێن پەیمانا دوھۆکێ بێنە جی. یا ھەری باش ئەوە کو کورد پێش ھەموو تشتی، ب ھەڤرە ئاشت بژین، ھەر تم بھەڤرە بشێورن، ھەڤکاری و یەکیتییەک پێت پێک بینن.

پوستێن ھەمان بەش