هەر کو دەم زێدەتر دەرباس دبە، ل سەر ئێریشا دەولەتا داگیرکه‌ر یا ترکیێ ل سەر باشوورێ کوردستانێ، تۆزا ل سەر مەبەستا راستەقینە یا داگیرکه‌ران زێدەتر رادبە و دیمەنێ پیلانا داگیرکارانه و دژمنانە یا کوردستانێ و پرسا وان یا نەتەوه‌یی و حەق زێدەتر خوەیا دبە، یا کو جهێ داخێ د ڤێ پیلانێ دە ئەڤە کو کلۆخێ هنەک خائینێن گەمار ئێن کورد ژی تێ دیتن.
دەولەتا ترکیێ، هەبوونا په‌كه‌كێ کرییە بەهانە ژ بۆ كو ل بەر چاڤێن دنیایێ ئێریشەکە داگیرکه‌ر ل سەر باشوورێ ولات ئەنجام بدە، ل گۆر گۆتنا داگیرکه‌رێن ترک، خاکا باشوورێ وەلات بوویە «هێلینا تەرۆریستان» و ئەنقەرە ژی ب مافێ خوە دزانە بۆ ژناڤبرنا تەرۆرێ، هیزێن خوە ب حه‌ركینه و سەروەرییا خاکا باشوور بن پێ بکە.
وها خوەیا دبە کو ئەڤ گۆتن ل دەڤێ وان شرین هاتییە و هەر ب ڤێ بەهانەیێ بوویە کو خاکا رۆژئاڤا کوردستانێ داگیر کری، نها ل رۆژئاڤا رۆژانە ب سه‌ده‌ما لەشکرێ فاشیست و کرێ گرتیێن رادیکال، رۆمه‌تا کوردان دشکێنن، مالێن وان تالان دکن، جوانێن کورد درەڤینن، زیندانی و ئیشکەنجە دکن و پشتره جه‌سه‌دێن د ئاڤێژن چۆلێ، هەر وها چاند و بهایێن نەتەوه‌یی یێن کوردان ژ ناڤ دبن، خوە پەرەیێ بێ بها یێ ترکان ژی ل سەر گەلێ رۆژئاڤا د سەپینن.
باس کرن ل تەرۆرێ ژ بۆ داگیرکرنا کوردستانی پرۆپاگندەیەک بێ ناڤەرۆکە و دگەل عەقلی دە ناگونجە
ل دەستپێکێ کو ئایا ترکیێ د ئه‌ساس دە ل دژی تەرۆرێ شه‌ر دكه و دژاتییا تەرۆرێ دکە، مژارەک پر ب گۆمانه، ل دەما داعشێ دە، پارتییا ئیسلامی یا دەستهلاتدار ل ئەنقەرێ ب یەک ژ به‌رگۆمانێن سەرەکە یێن دامەزرینەر و پالپشتێن ڤێ رێخستنا تەرۆری دهات باسکرن، هه‌موه‌خت ژ بۆ ئێریشا ل سەر رۆژئاڤا ژی باس ل خەتەرەیێن وەکە وان دگۆت «کۆریدۆرا تەرۆرێ» دکر، لێ مە ب چاڤێ خوە دیت کوهه‌موو گرۆپێن چه‌ته‌یان كو رۆژئاڤا ولات مل ب ملێ تركیێ داگیرکه‌ریێ و کریارێن دژە مرۆڤاتیێ ل همبەر کوردان ئه‌نجام دایین، ژ گرۆپێن تەرۆریستی یێن هه‌ری دیار یێن شەرێ سووریێ نە، ئانکو باس کرن ل تەرۆرێ ژ بۆ داگیرکرنا کوردستانی کو ئەو ب خوە پشتەڤان و بەنکا سەرەکە یا تەرۆریستێن جیهانێ نە، د ئه‌ساس دە پرۆپاگندەیەک بێ ناڤەرۆکە و دگەل عەقلی دە ناگونجە.
بەهانەیەکە دن کو رایەدارێن ترک ژ بۆ ئێریشێن خوە ل دژی خاکا باشوورێ کوردستانێ ب کار دئینن، ژ ناڤ برنا په‌كه‌كێ یە، ل ڤر چەندین سەدەم هەنە کو دبێژن مە «ترکیە د ئه‌ساس دە بۆ ژناڤبرنا پەکەکێ، ته‌ڤ ناگه‌ره».
ترکیێ ئەو قاس جینایەتێن دژە مرۆڤاتیێ ئەنجام دانە، کو تو کەس نکارە زیندی هیشتنا ئۆجالان ژ بال ترکیێ ڤە وەکە مرۆڤ دۆستییا حکوومەتا فاشیست یا ئەنقەرێ بزانە
یا یەکەم ئەڤە کو گەر ترکیێ خواستبا پەکەکێ ژناڤ ببە، سەرۆکانیا بریار و فەلسەفە و هزر و رێکارێن پەکەکێ ل زیندانا ئیمرالیێ رانەدگرت و دا وی بدارڤە کن، ژبەرکو گەر ترکیە زێدە ساویلکە ژی بە باش دزانە کو ب بدارڤەکرنا کەسێ یەکێ ژ هەر رێخستنەکێ، ئەو رێخستن ب قاسی ژ دەست دایینا هەزاران ئەندامان “گەریلایان” وێ زرار پێ بگەهە.
بۆ میناک شۆرشێن کوردان پرانییا وان ژ بەر بدارڤەکرنا سەرکردەیێن وان راستی شکەستنێ هاتن، تاکە کۆمارا کوردی ل رۆژهلاتا کوردستانێ، بەرخوەدانا وێ په‌رچه‌یا کوردستانێ ژ بۆ دەمەکی بەرچاڤ راوەستاند و نها هێدی هێدی بەر ب سەر ژ نوو دەستپێکرنێ ڤه دچە، هه‌موه‌خت ترکیێ ئەو قاس جینایەتێن دژە مرۆڤاتیێ ئەنجام دانە، کو تو کەس نکارە زیندی هیشتنا ئۆجالان ژ بال ترکیێ ڤە وەکە مرۆڤ دۆستییا حکوومەتا فاشیست یا ئەنقەرێ بزانە.
دژە کورد بوونا حکوومەت و جڤاکا ترکیێ ئەو قاس ل بەر چاڤە کو ئەو ب خوە ژی نە تەنێ حاشاتی ناکن، بەلکو ب شانازی دزانن ل سەر گوهدار کرنا سترانەکە کوردی مرۆڤەکی بکوژن و رێڤینکەکێ ل ولاتێ خوە ل سەر وێنەیەکێ ئالا کوردستانێ د فەیسبۆکێ خوە دە، ل بالەفرخانەیێ راگرن و رۆمه‌تا وی بن پێ بکن.
ژبەر ڤێ یەکێ بدارڤەنەکرنا ئۆجالان نکارە نیازپاکییا ترکیێ ژ بۆ پرسگرێکا کوردان یان ژی چاند و بهەڤرە ژیانا جڤاکا ترکیێ وێنه بکە، ئانکو زیندی مایینا ئۆجالان ب مە رە دبێژە کو حکوومەتا ترکیێ د ئه‌ساس دە ناخوازە پەکەکێ ژناڤ ببه.
«دبه مە پەز نەدیتبە، لێ مە پشکل پڕ دیتنە»!.
چما سەرکردەیێن پەکەکێ تو جاران نەبوونە ئارمانجێن ئێریشێن ترکیێ
پەکەکێ، ژ بلی ئۆجالان، کۆنسەیا سەرۆکاتیێ هەیە کو ژ دەما ئەو هەیی هەیا نها برینەک سڤک ژی ل سەر بەدەنا وان دروست نەبوویە، ئانکو د راستی دە سەرکردەیێن پلە بلندێن پەکەکێ تو جاران نەبوونە ئارمانجێن ئێریشێن دەولەتا ترکیێ، ژناڤبرنا پەکەکێ ب شەهیدخستنا شڤان و جۆتکارێن هەژار یێن باشوورێ کوردستانێ نایێ ئەنجام دایین، گەر ترکیێ خوەستبا ڤێ رێخستنێ ژناڤ ببە وێ دەمێ دا کۆنسەیا سەرکرداتییا ڤێ رێخستنێ ئارمانج کەت و ناڤەندا وان یا بریاردانێ ژناڤ بەت. پڕ نەلۆژیک گەر باوەر ب حکوومەتەکی بکین کو دبێژە ئەز دخوازم رێخستنەکێ ژ ریهۆریشال ژناڤ ببم، لێ بەلێ بۆ جارەکی ژی رێڤەبەرێ بلند یێ ڤێ رێخستنێ هەدەف نەکەت!! وەکە کورد دبێژن «دبه مە پەز نەدیتبە، لێ مە پشکل پڕ دیتینە»!.
گەر ب راستی دەولەتا ترک بریار دایە پەکەکێ ژ ناڤ ببن ژ خوە پەکەکە ل ئیرانێ ژی هەیە، گەلۆ چما ل ئیرانێ پەکەکە نایێ بۆمبەبارانکرن؟!
سه‌ده‌مه‌كه دن کو ژ مەرە دبێژە ئارمانجا سەرەکە یا ئێریشێن ترکیێ، هەرێما کوردستانێ و پرسا رزگاریخوازانە و سەربخوەخوازییا کوردستانێ یە، ئەڤە کو گەر ب راستی دەولەتا ترک بریار دایە پەکەکێ ژ ناڤ ببن ژ خوە پەکەکە ل ئیرانێ ژی هەیە، گەلۆ چما ل ئیرانێ پەکەکە نایێ بۆمبه کرن؟!
د دەما رابووری دە «سلێمان سۆیلو» وەزیرێ ناڤخوە یێ ترکیێ، د سەرەدانەکی دە ژ بۆ ناڤچه‌یا سینۆری یا د ناڤبەرا باکور و رۆژهەلاتێ کوردستانێ دە، د داخوەیانییەکێ دە ل باژارێ ئاغری دە راگهاند، «زیدەتر ژ 100 چەکدارێن پەکەکێ ل ناڤچەیا دەمبات ل نێزی باژارێ ماکۆ ل ناڤا خاکا رۆژهلاتێ کوردستانێ دە هەنە، هەڤدەم سۆیلو تەکەز کر کو ئه‌و دکارن د دەمەکی كن دە وان چەکداران هەموویان ژ ناڤ ببن».
گەلۆ گەر ئارمانجا ترکیێ ژناڤ برنا پەکەکێ یە، چما بنگەهێن پەکەکێ یێن ل ناڤچەیا ماکۆ بۆمبه ناکە؟ گەلۆ پەکەکەیی یێن ئالیێ ئیرانێ خوینا وان سۆرترە یان ژی ئارمانجا سەرەکە ژ ناڤ برنا هەرێما کوردستانێ یە و پەکەکە ب تەنێ بەهانەیەکە؟ ل سینۆرێ د ناڤبەرا باشوور و رۆژهلاتێ کوردستانێ ژی پرانییا بنگەهێن گرینگ یێن پەکەکێ دکەڤن ئالیێ رۆژهەلاتێ کوردستانێ و د ناڤا خاکا داگیر کری ده ب دەستێ دەولەتا ئیرانێ دا نە، ترک گەر ب راستێ دخوازن پەکەکێ ژ ناڤ ببە چما وان ناڤچەیان بۆمبه ناکە؟! دبە ئەڤ یەک بێ گۆتن کو ئێریشکرن ل سەر ئیرانێ شکاندنا سەروەریا ڤی ولاتی بە، لێ بەلێ ژ خوە ئێریش کرن ل سەر باشوورێ کوردستانێ ژی ل گۆر یاسایێن ناڤدەولەتی ب بن پێ کرنا سەروەرییا ئیراقێ تێ زانین و د ڤێ چارچووڤێ دە چەندین ولاتان ب داخوەیانییان ئەڤ کار پرۆتەستۆ کر.
ترکیێ راگهاند کو ب ره‌زامەندی و ئاگاهدارییا ئیراقێ ئێریش دەست پێ کرینە، گەلۆ چما ره‌زامەندییا حکوومەتا ئیرانێ ژی وه‌رناگره داکو ل ناڤا خاکا رۆژهلاتێ کوردستانێ و ئیرانێ ژی بنگەهێن پەکەکێ بکە ئارمانجێن ئێریشێن خوە یێن ئاسیمانی؟ ئەرێ ئیرانێ ده‌ستوورێ پێ نادە؟ ما قەی پەکەکە نە رێخستنەکە کو دخوازە کوردان بکە خوەدی دەولەتەک سەربخوە و گەر ئەو نەمینە کورد ژی وێ ژ ناڤ بچە؟ گەر وهایه چما ئیران وێ رازی نەبە پەکەکە ژ ناڤ بچە؟ بەرسڤ ئەو قاس روهن و ئەشکەرەیە کو پێویستی ب تو شیرۆڤەیان ناکە.
لێ بەلێ وها دیارە کو ترکیە ژی پشتراست بوویە ژ ئەگەرا ژ ناڤ چوونا کۆمارا ئیسلامی یا ئیرانێ و دخوازە ئەو 100 گەریلایێن پەکەکێ ل ور بمینن داکو د بەشەکە دن یا وێ پیلانا کو ل ئیمرالیێ تێ سێرڤیس کرن، د پێشەرۆژێ دە پرسگرێکان ژ بۆ رۆژهلاتێ کوردستانێ ژی دروست بکە و وەکە رۆژئاڤا و باشوورێ وەلات بەشەکی ژ خاکا وان ب بەهانەیا وان گەریلایان ژ خوە رە داگیر بکە.
ئانکو ئارمانجا ترکیێ ژ ئێریشکرنا سەر باشوورێ کوردستانێ، بۆ ژناڤبرنا پەکەکێ نینە، بەلکو ئەمبارگۆخستنەکە دنە ل سەر باشوورێ کوردستانێ و ژ بۆ سەرخستنا ڤێ پیلانێ پێویستی ب پەکەکێ هەیە داکو ب تو ئاوا ل رۆژئاڤا رێ ژ بۆ وێ خوەش کر ل باشوور ژی رێیێ ژ بۆ وێ خوەش بکە داکو حکوومەتا هەرێما کوردستانێ لاواز بکن و کاری بۆ ژ ناڤ برنا ستاتۆیا هەرێما کوردستانێ بکە کو بێ گۆمان رۆژەک وێ وەرە بگهیژە سەرخوەبوونا خوە.
چما د ڤێ دەمێ دە؟
یەکگرتنا کوردێن رۆژئاڤا ب هه‌ولێن سەرکرداتییا باشوورێ ولات داگیرکه‌ر نەرەحەت کرنە
داگیرکه‌ران ژ بەر ڤێ یەکێ د نها ده ئێریشێن خوە ل سەر هەرێما باشوورێ کوردستانێ پێتر کرنە، ژ بەر کو دزانن پشتی چەندین سالان ژ شەرێ پر خوین یێ دگەل تەررۆیستێن داعشێ، وەختە دکەڤە سەر هێلا پێشڤەچوونێ د هەموو ئالییەکێ دە و نە ب تەنێ ئەو ب تەنێ دەمە بهێزتر دبە، بەلکو بوویە هێڤییەک ژ بۆ کۆم کرن و ئێکختسنا بزاڤا رزگاریخوازا په‌رچه‌یێن دن یێن کوردستانێ ژی، بێ گومان یەکگرتنا کوردێن رۆژئاڤا ل سەر بنیاتێ وان بزاڤێن سەرکرداتییا سیاسی یا هەرێما کوردستانێ ده و پشتەڤانییا دەولەتێن زلهێز یێن جیهانێ بوو و ڤێ یەکێ داگیرکه‌رێن کوردستانێ نەرەحەت کرنە.
ترکیە و ئیران باش فێم دکن ل رۆژئاڤا کوردستانێ ئێدی مالا هەڤالبەندێ وان پەکەکێ ب تو ئاوایی نەمانە، د رەوشەکی دە کو بەشار ئەسەد دگەل کریزەکە دن ئا نوو روو ب روو بوویە کو خوە خزمێن وی یێن نێز ژی داخوازا ژ ناڤ چوونا رەژیما وی دکن، بێ گۆمان وێ ڤالاهییەک دروست بە کو هیزەکە یەکگرتی یا کوردان دکارە باشترین قازانجێ ژێ وەرگرە و د ئەگەرا ژ ناڤ جوونا رەژیما ئەسەد دە، بەر عاقل نینە حکوومەتا پێشەرۆژی یا سووریێ رێ ب داگیرکه‌رییا زێدەتر یا ترکیێ ل رۆژئاڤا کوردستانێ بدە، ئانکو هەموو ئێماژە بەر ب وێ یەکێ دچن کو دامەزراندنا ستاتۆیەک سیاسی یا وەکە ستاتۆیا باشوورێ کوردستانێ ل رۆژئاڤا، دژمن باش فێم دکن کو گەر ئەڤ ستاتۆ ل رۆژئاڤا وەرە ئاڤاکرن هەیاکو هەولێر ل سەر لنگان بە ئەو ژی وێ خوە ل سەر لنگان بگرە، ژ بەر ڤێ یەکێ دخوازن ب لێخستنا هەولێرێ و لاواز کرنا وێ، رێ ل دروستبوونا ستاتۆیەکە دن یا کوردستانێ بگرن.
ژ بلی ڤێ ژی یاسایێن چاکسازیێ ل هەرێما کوردستانێ کەتینە قۆناغا جی ب جی کرنێ دە، بێ گۆمان داگیرکه‌رێن کوردستانێ ئەو قاس نەزان نینە کو د ڤێ راستیێ نەگەهن کو ب جی ب جی کرنا ڤان چاکسازییان وێ کوردستانەکە بهێز دروست بە، هەر ژ بەر ڤێ یەکێ دخوازن رێ نەدن کورد وێ کوردستانا بهێز ببینن و ب ئاگر، تۆپ، بالەفر، تانک و خۆرۆجییان بەردەوام ل باشوورێ ولات تێخن.
یاکو جیێ داخێ یه، بەشدارییا هنەک ب ناڤ ئالیێن کوردە د سەرخستنا پیلانا داگیرکه‌ران دە
یاکو جیێ داخێ یه، بەشدارییا هنەک ب ناڤ ئالیێن کوردە د سەرخستنا پیلانا داگیرکه‌ران دە ژ بۆ لاوازکرنا حکوومەتا هەرێما کوردستانێ، جیێ داخێ یە کو هنەک کەسان دبینین کو خوە ب کورد دزانن و داخوازا نەمانا حکوومەتا کوردستانێ دکن.
بێ گۆمان کەس حاشاتیێ ل وێ یەکێ ناکە کو حکوومەتا هەرێما کوردستانێ کێماسیێن خوە هەنە، ژ هەموویان پێشتر و پێترتر حکوومەت ب خوە باس لێ دکە و دانپێدانێ پێ دکە، پر زەلالە دەما حکوومەتەک باس ل پرۆژەیێ چاکسازیێ دکە، به‌را هەر تشتی واتەیا وێ ئەڤە کو دانپێدان ب هەبوونا کێماسییان کرییە، لێ هنەک کەس کو باش فێم دکن شوورێ چاکسازیێ وێ گەندەلکاران ژ ناڤ ببە، ژ بەر ڤێ یەکێ دژاتییا وێ دکن و باس ل گوهەرینا حکوومەتێ ژی ناکن بەلکو باس ل ژ ناڤ برنا وێ دکن.
ڤی ئالی کو د دەمێ خوە دە ل 16ێ ئۆکتۆبەرێ کەرکووک فرۆشت و نها دەرکەتییە هۆلێ کو ب ملیاران دۆلار و ب تەنان زێر ژ ئیرانێ بۆ وان هاتینە رەوانەکرن ل همبه‌ری ئیخانەتا وان، هەر دەمێ بزانن حکوومەت ب وان نایێ ژ ناڤ برن باس ل لامەرکەزی بوونێ دکن و دخوازن ڤێ پەرچەیا کوردستانێ ل همبەرخواستەکێن خوە یێن نەرەوا و سۆزێن دەولەتێن داگیرکه‌ر په‌رچە بکن.
وەکە ژیانا مرۆڤان، د دیرۆکا هەر نەتەوه‌یه‌کێ دە ده‌رفه‌ت پر زۆر نینە، گەر نکارین قازانجێ ژێ ببینین و ژ دەست مە بچه، ب ڤی ئاوایی ئەم نکارین بپاریزین، گەر دەرفەتا ره‌فه‌راندۆمێ ب ئیخانەتا مە ب خوە ژ دەست مە نەچووبایە، بێ گۆمان دا رەوش وێ دەمێ پر باشتر بە ژ نها، گەر ڤێ دەرفەتێ ژی ژ دەست بدین و ل جیێ پشتەڤانی کرنا کوردستانێ و یەکرێزی و بهێزکرنا ناڤمالا کوردی و هەولدان ژ بۆ رزگاریێ، بکەڤین داڤێن داگیركه‌ران و ب فیتکا خۆرۆجییان د سەردا بچین، وێ تووشی کارەساتەکە وها بین کو حەتا، حەتا دیرۆک نەفرەتان ل مە ببارینە.
