جه‌یشولعه‌دل نێچیركا باش كر

فه‌رمانداره‌كێ پاسداران تێ كوشتن

فه‌رمانداره‌كێ سپایێ پاسداران یێ ره‌ژیما ئیرانێ هات كوشتن وه‌ختا كو ل شه‌ڤا ده‌رباسبوویی ئه‌ره‌به‌یا وی ب بۆمبه‌كێ هاتییه‌ هه‌ده‌ف كرن.

ئاژانسا فارس یا ده‌وله‌تا ئیرانێ ئه‌شكه‌ره‌ كر، ل شه‌ڤا ده‌رباسبوویی 29/6/2020ان بۆمبه‌ك د رێیا ئه‌ره‌به‌یا فه‌رمانداره‌كی سپایێ پاسداران ل ناڤه‌ندا باژارۆكێ زاهیدان یێ گرێدای پارێزگه‌هییا سیستان و به‌لۆجستانێ هاته‌ ته‌قاندن و هات كوشتن.

هه‌ر ئیرۆ تێله‌فزیۆنا ده‌وله‌تا ئیرانێ ئه‌شكه‌ره‌ كر، فه‌رمانداره‌كی سپایێ پاسدارن ل گه‌ل زێره‌ڤانێ خوه‌ د وێ ئێریشێ ده‌ هاتنه‌ كوشتن، لێ به‌لێ ناڤێن وان ئه‌شكه‌ره‌ نه‌كر و ته‌نێ گۆت كو ئه‌و فه‌رماندارێ پاسداران بوو ل ناڤچه‌یێ.

هه‌روها ده‌ست نیشان كر، ئه‌ڤ ئێریش ژ ئالیێ رێخستنا ب ناڤێ «جه‌یشولعه‌دل» پێكهاتییه‌.

رێخستنا «جه‌یشولعه‌دل» ل شوباتا سالا رابووری ژی ئێریشی ئه‌ره‌به‌یێن سپایێ پاسداران ل بلۆجستانێ كربوو و ب وێ سه‌ده‌مێ 27 له‌شكرێن ره‌ژیمێ كوشتبوون.

«جه‌یشولعه‌دل» د به‌رێ ده‌ ب ناڤێ «جند الله» د هاتن ناس كرن، ب رێخستنه‌كا جیهادی تێ حه‌ساب كرن و خه‌باتێ ژ بۆ تێكبرنا ده‌ستهلاتا ئیرانێ دكه‌.