په‌كه‌كێ پیۆن کرن شاهـ و ژبۆ ڤه‌شارتنا خیانه‌تا لاهۆر هه‌ولێن پر مه‌زن دان
پەکەکێ دەما کو کەرکووک هاتییە داگیر کرن، د هەموو دەزگەهێن خوە یێن راگهاندنی دا حکوومەتا هەرێمێ و په‌ده‌كه وەکە بەرپرس ددا دیار کرن، پەکەکێ دخواست ب ڤی ئاویی خیانەتا لاهۆر جەنگی و پاڤێل تالەبانی ب ڤەشێرە، پەکەکە ب وێ هێزا خوە یا مەزن د وارێ چاپەمەنیێ دا ئەڤ یاریا خوە یا سێحربازیێ ب ئاوایەکی ئەکتیڤ ب کار ئانی و ل باکورێ کوردستانێ ڤێ سێحرێ باندۆرا خوە ل سەر گەل دروست کر، لێ بەلێ پەکەکە نەدکاری ب تەنا سەرێ خوە ڤێ لەییستۆکێ ب رێڤە ببە، ئیرانێ و جەمیل باییک ژ بۆ ب کار ئانینا «پیۆنێ» خوە ئانكو «سەربازێ شەترەنجێ» لاهۆر شێخ جەنگی هەر تشتێ ب دەستێ وان ڤە هاتی ئەنجام دا، ئانکو پیۆن کرن شاهـ.
ژ بەر ڤێ سه‌ده‌مێ کارێ پەکەکێ یێ یەکەمین ژ بۆ لاهۆر جەنگی ئەڤ بوو کو ئەو کر کاراکتەرەک سیاسی و کەتن د ناڤا هەولدانەکی دا کو د ناڤا ناڤدێرێن سیاسی یێن کورد دا جهەکی ژ بۆ لاهۆر دروست بکن، ژ بەر ڤێ یەکێ گاڤا یەکەمین خواستن رۆلا وی یا خیانەتا کەرکووکێ ڤەشێرن، پەکەکێ بوویەرێن کەرکووکێ هەموو بەرەڤاژی کرن، یەنەکێ ب خوە ژی دانپیدان ب وێ پەیمانا خوە یا دگەل ئیراقێ دە چیکری کر، مەلا بەختیار و کەسێن نیزی وی ژ بەر خیانەتا کەرکووکێ خوە ژ ئەرکێن خوە یێن حیزبی دوور خستن.
د وێ دەمێ ده و ژ بۆ کو یەنەکێ ژ ڤێ قرێژێ پاقژ دەربێخە، پەکەکە ژ یەنەکێ پێتر بۆ «یەنەکەیی»، هەموو هێزا خوە یا رێخستنی ژ بۆ پالپشتییا یەنەکێ ب کار خست، ژ بۆ کو لاهۆر وەکە کارەکتەرەک سیاسی تەڤ بگەرە پەکەکێ پڕ خەبات مەشاندن، ل سەر دەستکەفتێن رۆژئاڤا خواستن لاهۆر وەکە رەمزەکێ یەکیتییا نەتەوه‌یی بدەن نیشان دان، ب قاسی کو دەما لاهۆر د ناڤا گەلێ باشوور دە دکەڤە رۆژەڤێ دە دچە رۆژئاڤا و دگەل مەزلووم عەبدی وێنەیەکی خوە د سۆشیال مەدیایێ دە بەلاڤ دکە و دخوازیت هەموو گونەهێن خوە ب ڤی وێنە ب پەچینیت، لاهۆر جەنگی ب ئالیکارییا ئیرانێ، پەکەکێ و حکوومەتا ئیراقێ د دژاتی کرنا حکوومەتا هەرێمێ دە پڕ رادیکالتر بوو، ئەو دزانە کو رۆژەک ژ رۆژان وێ حەسابا خیانەتا کەرکووکێ لێ وەرە پرسین لەوما ژی ژ بۆ کو ل پەی خوە چ دەلیلان نەهێلە دخواست هەموو یەکیتی د بن دەستهلاتا وی دە بە.
بزاڤا تەسفییەکرنا یەنەکێ
لاهۆر جەنگی و گرۆپا خوە ب ئالیکارییا ئیرانێ، یەنەکە ژ نووڤە «ڤەسازکر» ژ بۆ پارتییا خوە سیستەمەک کو نەهێت فەهم کرن چێکر و هنەک سازیێن نوو ژ بۆ تەسفییەکرنا هنەک کادرێن سەرەکە ئاڤا کرن، یەک ژ ڤان سازییان کو پڕ مەزن دیار دکە لێ بەلێ چ باندۆرا خوە نینە «سەرۆکاتییا مەجلیسا سیاسی یا بلندە»، کۆسرەت رەسوول ژ بۆ سەرۆکاتییا وێ هات هلبژارتن، هەر چەند وها دیار کر کو ئەڤ کار وەکە حەیسییەت بەخشین ژ بۆ کۆسرەت رەسۆل ئەنجام دایە، لی د راستی دە ئەڤ ئەرکە تەسفییەکرنا کۆسرەت رەسوول بوو ژ کارێ پارتیێ، پێش رەفەراندۆمێ ژی کۆسرەت رەسوول ژ بەر ئالیگرییا رەفەراندۆما سەرخوەبوونێ ژ پال قاسم سولەیمانی ڤە هاتبوو تەهدید کرن، قاسم سولەیمانی گۆتبوو: «گەر کۆسرەت رەسوول پشتەڤانییا رەفەراندۆمێ بکە، ل دەمەکی نێز ئەزێ بچم تازییا وی»، حکوومەتا ئیراقێ ژی ب بریارا دەستەسەر کرنا کۆسرەت رەسوول پشتەڤانییا ڤێ ته‌هدیدا قاسم سولەیمانی کر.
د ناڤا یەنەکێ دە کەسێن کو ژ رەوشا خوە نەرازی وەکە «حاکم قادر، دلێر سەید مەجید و شێخ جەعفەر شێخ مستەفا» د ناڤا پارتیێ دە هاتن بێدەنگ کرن، یەنەکە نها وەکە پارتیەکە بێ هزر ل دووڤ کارێ رۆژانە کەتی ژ میسیۆنا پارتایەتیێ دوور و نەدیار چ دخوازە خوەیا دکە، ب گۆتنەکە زەلالتر گەر ئەم ببێژین ب قاسی لاهۆر جەنگی مەزن بووی ئەو قاس ژی یەنەکە بچیک بوویە.
شوورێ دەمۆکلێس ل سەر رێڤەبەرییا هەرێما کوردستانێ
د ئەفسانەیێن یۆنانا کەڤنار دە «دەمۆکلس» وە دزانە کو بوونە مەلک تشتەک پڕ هێسانە، ژ بەر ڤێ مەلکێ «سیراکۆزا»، «دیۆنسۆس» پڕ هێرس دبە، ژ بەر ڤێ ژی ژ بووی دەما رۆژەکێ کورسیکا خوە ددە دەمۆکلێس، ل هنداڤی کورسیکی ژی شوورێ خوە ب داڤەکا مۆیێ هەسپی ڤە گرێ ددەت، ب ڤێ پەیامێ دخوازە ببێژە دەمۆکلێس کو کارێ وی نە هند هێسانە، دبە هەر دەمێ ئەو شوور بکەڤە، لاهۆر جەنگی ژی نها وەکە وی شوورێ دەمۆکلێس ل سەر سەرێ حکوومەتا هەرێمێ و دەستکەفتێن وێ دهەژە، نەدیارە کو وێ چ دەم ئەو شوور وێ ژ وی موی ب ڤەرسە، ئارمانجا وی یا سەرەکە گوهەرتنا سیستەما حکوومەتا هەرێما کوردستانێ یە، دخوازە کیمیایا حکوومەتا هەرێما کوردستانێ بگوهەرە.
مەها نیسانێ حکوومەتا هەرێما کوردستانێ ب رێنمایێن ل دژی ڤیرۆسا کۆرۆنایێ ڤە مژوول بوو، پارێزگەها سلێمانیێ ژی ب بریارا جودابوونا ژ حکوومەتا هەرێمێ ڤە مژوول ببوو و ب ڤێ بریارێ خوەستن دەستێ حکوومەتا هەرێمێ لاواز بکن، د ڤێ مەها خزیرانێ دە ژی، حکوومەتا هەرێما کوردستانێ د بن دۆرپێچا گەفێن دەولەتێن هەرێمی دا یە، ژ ڤان گەفان یا یەکەم گەفا وەزیرێ کاروبارێن دەرڤە یێن ترکیێ مەولوود چاویشئۆغلو بوو، د بنگەهـ دە ژ نەرازیبوونا پارتیێن رۆژئاڤا ل شەڤا 18ێ خزیرانێ گۆت کی دگەل پەیەدێ شریک بە ئەمێ وی ب پەکەکە بزانین و ئەمێ هه‌مان سه‌ره‌ده‌ریێ دگەل وی بکین، ئەڤ گەفا وی ژ بۆ پەدەکێ و حکوومەتا هەرێما کوردستانێ بوو، رۆژا 21ێ خزیرانێ جەمیل باییک ژی د گۆتارەکا خوە دە گۆت: «ل ناڤا گەلێ باشوور دە یێن کو ئاگاهییان ددن دەولەتا ترکیێ، ئەم دێ وان بکوژین و جەزا بکین»، ئەڤ گۆتار د تەلەفزیۆنا پەکەکێ دە هات وەشاندن، ئەڤ گەفا جەمیل باییک ل سەر ئیستیقرار و ئارامییا د ناڤا هەرێما کوردستانێ دە بوو، ل پەی وی رە لاهۆر جەنگی ژی گەف کرن، ل 22ێ خزیرانێ حکوومەتا هەرێما کوردستانێ ژ بەر کریزا ئابووری بریار دا ژ بۆ مەهەکێ مووچەیێن فەرمانبەران 21٪ قوت بکن، ل 23ێ خزیرانێ ساعەت 3 شەڤ یەنەکێ ب بریارەکێ ئەڤ بریارە پەژراند و گۆت ئەمێ ئالیکارێ ڤێ بریارێ بین، لێ د دەمەکی کن دە هەڤسەرۆکێ یەنەکێ لاهۆر شێخ جەنگی ئەڤ داخوەیانییا پۆلتبیرۆیێ ژ مالپەرا فەرمی و هەمو کانالێن راگهاندن و سۆشیال مەدیایا یەنەکێ دە راکرن، پشتی چەند ساعەتان ژی لاهۆر جەنگی د حەسابا خوە یا تویته‌رێ دە ئەڤ نڤیساند: «سەکرتاریەتا ئەنجوومەنا سەرکردایەتییا یەنەکێ وێ بجڤە، گەر حکوومەتا هەرێما کوردستانێ د گەل بەغدا رێکەفتنەکێ پێک نەئینە ئەم وەکە یەنەکە بەرپرسیارییا مووچە دایینێ ناهلگرین، و هەمان دەم دا خوە ڤەکێشان ژ حکوومەت و پارلامانتۆیا هەرێمێ وێ یەک بە ژ بژاردەیێن ل بەر دەستێن مە به».
لاهۆر ب دەستهلاتداریێ سەرخوەش بوویە و ب ڤێ سەرخوەشیێ ئێریشی هەموو دەستکەفتیێن کوردستانێ دکە
ئەڤ تویت وەکە تویتەک نۆرمال تێ دیتن، لێ بەلێ پلانا د بن ڤێ تویتێ دە ڤەشارتی ب قاسی خیانەتا کەرکووکێ خه‌ته‌ره، ژ بەر کو دەماکو لاهۆر ئەڤ تویت وەشاندی، پشتی چەند ساعەتان شاندا حکوومەتا هەرێما کوردستانێ د بن سەرۆکاتیا قوباد تالەبانی ده ژ بۆ هەڤدیتنەکی پر گرینگ دچوو بەغدایێ، لاهۆر وەکە هەردەم دیسا بەرێ خوە دابوو بەغدا و ب ڤێ تویتا خوە پەیام ددا بەغدا کو ئەز پشتەڤانێ وەمە، ئەڤ شاندا حکوومەتا هەرێما کوردستانێ ژی بێ ئەنجام ڤەگەریان، د راستی دە خیانەتا کەرکووکێ ب داوی نەبوویە، هێژان بەردەوامە، لاهۆر شێخ جەنگی ب ئەرکێ دەستهلاتداریێ سەرخوەش بوویە و ب ڤێ سەرخوەشیا خوە ئێریشی سەر هەموو دەستکەفتیێن کوردستانێ دکە.
گەلۆ ئالیگرێن یەنەکێ وێ چ بکن؟
پەکەکە و ب تایبەتی عەبدوللا ئۆجەلان ژ سالا 93 و ڤڕدە دخوەستن گرۆپەکێ ژ یەنەکێ قوت بکن و ب پالپشتییا وان ل هەرێما کوردستانێ دە جییەکێ ژ بۆ خوە دروست بکن، هەر چ قاس مام جەلال و عەبدوللا ئۆجالان ب پەیوەندیێن خوە دگەل یەک باش بن ژی خه‌ته‌را پەکەکێ تو جاران بەرچاڤ بەرزە نەدکر، وی دزانی کو د بەریکا خوە دە دیپشکی دگێرینە لێ بەلێ پشتی نەخوەشکەتنا مام جەلال، پەکەکێ ژ بۆ خوە وەکە فرسەتەک دیت و یەنەکە ل گۆر بەرژەوەندیێن خوە بکار ئینان، دبێژە یەنەکێ ئەز ل دژی په‌ده‌كێ مە و ل سەر ڤی ئەساسی دخوازە تەعویزان ژ یەنەکێ وەرگرە و ب پالپشتییا یەنەکێ د باشوور دە وەکە هیزەکە سیاسی خوە ددە نیشاندان و هەمان دەم یەنەکە ژی ب پالپشتییا پەکەکێ دخوازە خوە ل سەر لنگان بگرە، لێ بەلێ هەر چ ببە بلا ببە ئەڤ هەردو هێز ژی ل سەر پەیمانا دگەل دەولەتا ئیرانێ دژین، ب ڤی حالی یەنەکە خلاس بوویە، تەنێ ناڤ مایە و ئیسکەلەت مایە و ناڤەرۆکا وێ ڤالا بوویە، وەکە ئامۆرەکی سیاسی د ناڤا موزەخانەییا سیاسەتێ دە جی دگرە.
کیژان دەولەت کیژان هێز بخوازە ژ لاهۆر قەهرەمانەکی ئاڤا بکە، بلا باش بزانە کو ژ وی قەهرەمان دەرناکەڤن، ئەم مالێ خوە باش ناس دکین
لاهۆر شێخ جەنگی نە کەساتییەک وهایە کو خوەدی ئارمانجەک نەتەوه‌یی بە و بکارە ل میراسێ مام جەلال خوەدی دەرکەڤە و نەخوەدیێ وێ شەخسییەتێ یە کو بکارە سەرۆکاتییا یەنەکێ بکە، چاوە ل باکورێ کوردستانێ داگیرکەرێن تورک ل سەر شارەدارییان قەیوومان ئاڤا دکن، لاهۆر شێخ جەنگی ژی ژ پال دەولەتا داگیرکار یا ئیرانێ ڤە ل سەر یەنەکێ وەکە قەیووم هاتییە تەعیین کرن، لاهۆر جەنگی ب وێ هێزا د دەستێ خوە دە و ب وان هاریکاریێن ژێرە دهێن کرن خوە وندا کرییە، ب شێوازێن مافیاواری دخوازە خەباتێن سیاسی برێڤە ببە، کیژان دەولەت کیژان هێز بخوازە ژ لاهۆر قەهرەمانەکی ئاڤا بکە، بلا باش بزانە کو ژ وی قەهرەمان دەرناکەڤن، ئەم مالێ خوە باش ناس دکین، گەلێ باشوور باش دزانە کو ژ وی لاهۆرێ ل تاخێ سەرچنار یێ ل سلێمانیێ ل سەر ماسەیێن ویسکیێ نا رابە و د ناڤا کێف و سەمایێ دا یە و بوویە مژارەکی مەگەزینێ چ سەرۆک دروست نابن، گەل باش دزانە ژ ڤی قوماشی چ سەرۆک ژ بۆ کوردان دروست نابە.
