دۆنالد ترامپ سەرۆک کۆمارێ ئامەریکایێ ئیرۆ رۆژا شەمی 4/7/2020ان، سوود ژ ئاخافتنا خوە یا دەستپێکرنا رۆژا سەرخوەبوونا ئامەریکایێ وەرگرت و تێدە ئێریشەک توند کر سەر دژبەرێن خوە، و شکاندن و ژناڤبرنا پووت “پەیکەر”ان د ناڤا خوەپێشاندانێن دژە نەژادپەرێسیێ دە «تەکۆشینەک بەرفرەهـ ژ بۆ خەراب کرنا ناڤێن قارەمانێن دیرۆکا ئامەریکا» ب ناڤ کر.
سەرۆکێ ئامەریکایێ د ئاخافتنا خوە یا ب هلکەفتا جێژنا رۆژا سەرخوەبوونا ئامەریکایێ دە ب ئاوایەک توند ئێریشی خوەپێشاندەرێن دژی نەژادپەرێسی یێ کر و بێ کو تو ئێماژەیان ب بەلاڤبوونا زێدەتر یا ڤیروسا کۆرانێێ ل ئامەریکایێ بدە، تەکەز کر کو خەباتەک ژ بۆ «خەراب کرنا دیرۆکا ئامەریکایێ» د وارێ جی ب جی کرنێ دایە.
ترامپ د ڤێ ئاخافتنا خوە دە کو ل قونتارا چیایێ راشمۆر پێشکش کر راگهاند: “گەلێ مە راستی خەباتەک بێ رەحمانە بوویە ژ بۆ ژناڤ برنا دیرۆکا مە، خراب کرنا ناڤێ قارەمانا و ژناڤ برنا بهایێن مە و خستنە بن باندۆرا فەرهەنگی یا زارۆیێن مە.”
ل گۆر گۆتنا ترامپ، زرتەپۆزێن هێرس بوویی خەبات کریە پووتێن بابکالێن مە یێن دامەزرینەرێن ئامەریکایێ خەراب بکن و پێلەک ژ شیدەتێ ل ناڤا باژاران دە دروست بکن.
ترامپ ل داکۆتایا باشوور، ل پێش روویێن هاتیە کۆلان ئێن سەرۆکێن بەرێ ئێن ئامەریکایێ راگهاند: “ئەڤ بینا یێن دیرۆکی تو جاران ناهێن وێران کرن، ئەڤ قارەمانە تو جاران ژناڤ ناچن.”.
