«پەکەکێ کەچا من دزی، دەما خواستی باز بدە، کوشت»

«پەکەکێ کەچا من دزی، دەما خواستی باز بدە، کوشت»
  • نڤیسین: کارۆ هەورامان

  • بەشا سێیەمین

چۆمسكی ئالیگرێ هزرا ئۆجەلانە

بەلاڤبوونا نووچەیا رەڤاندنا کەچەکە 13 سال یا رۆژهلاتێ کوردستانێ و پشتره‌ راگهاندنا نووچەیا جان ژ دەست دایینا وێ ب مالباتا وێ ژ بال پارتییا کارکەرێن کوردستانێ ڤە، ڤەجنقینەک دن بوو ل سەر خەتەربوونا پیلانێن پەکەکێ و هەڤپەیمانێن وێ، جارەک دن ڤێ نووچەیێ ستراكچه‌را رۆژهلاتا کوردستانێ هەژاند، یا ژ ڤێ کریارێ نەخوەش تر ئەو هێنجەت بوون کو دوڤچوویێن هه‌زرا خوار و خیچ و دژە نەتەوە یا ئاپۆی ژ بۆی کارێن دژە مرۆڤاتی یێن پارتییا خوە دگرن.

 دوڤەلانکێن پەکەکێ ل جیێ کو داخوازا لێبۆرینێ بکن و دان پێدانێ ب شاشێتیێن خوە بکن، وەکە هەر جار میتۆدا خاپاندنا خەلکێ و سەردابرنا وان ب کار ئانی و داییکەک دل سۆتی د گرتەیەک ڤیدیۆیی دە کو هێسران دبارینە ژ بەر کارێ پەکەکێ، لێ بەلێ ئالیگرێن پەکەکێ د بەرسڤێ دە دبێژن: «ئەڤ مالبات د وارێ ئابوورێ دە هەژارن چۆمسكی ئالیگرێ هزرا ئۆجەلانە».

قوربانییا ئەڤ جار یا پەکەکێ/پژاکێ وەکە هەموو جاران مالباتەک ولاتپارێز یا کوردانە کو کۆلاڤێ سلۆگانێن پەکەکێ چوویە سەرێ وان و ب ڤێ دیتنێ کو ئەڤ رێخستن ژ بۆ کوردستانێ تەکۆشینێ دکە، هەموو شیانێن خوە ژ بۆ خزمەت کرنا گەریلایێن پارتییا کارکەرێن کوردستانێ کو ب ئاوایەک ئازاد ل رۆژهلاتێ کوردستانێ تەڤ دگەرن، تەرخان کرینە.

پەکەکێ کەچا 13 سال رەڤاند چیا، پشتره‌ و ده‌ما كو وێ خوه‌ستی بره‌ڤیت ئه‌و كوشت و ب دایكا وێ ره‌ گۆتن كو شه‌هید كه‌تییه‌

دایکا کەچی د گرتەیەک ڤیدیۆیی دە دبێژە: «پەکەکێ ل جیێ وان هەموو خزمەت و باشیێن مە، کەچا من یا 13 سال دزی و رەڤاند چیا، پاش ڤێ یەکێ هەرچەند من لاڤا ژ پەکەکێ کرن تو زانیارییەک ل سەر رەوشا کەچا من نەدا من و ل داویێ ژ من رە گۆت ئەو شەهید کەتییە، جیێ شەهید کەتنا وێ ژی ب راستی ژ من رە نابێژن، لێ یا راست کەچا من د دمەکی دە کو دخوەست ژ دەستێ وان خەلاس ببە و برەڤە ژ بال پەکەکێ ڤە هاتییە کوشتن».

«ئەسرین محەمەد» یا بەرنیاس ب «سۆنیا»، کەچەک 13 سال بوو، ئەو ئەنداما مالباتەک ولاتپارێز یا باژارێ سەردەشتێ ل رۆژهلاتێ کوردستانێ بوو، ل هاڤینا سالا 2017ان ژ بال پژاکێ ڤە هات رەڤاندن، مالباتا وێ کو پڕ خزمەت ژ بۆ گەریلایێن پەکەکێ/پژاکێ ئەنجام دابوو، پڕ جاران خوەست زارۆكا خوە ببینن یان هەر هیچ نەبە ژ وان رە ببێژن کەچا وان ل کو دەرێ یە، لێ بەلێ وەکە هەموو مالباتێن گەریلایێن پەکەکێ ئەو بێ بەرسڤ مان.

 حەسەن محەمەدی و مەریەم خزری، باڤ و دایکێن ئەسرینێ، د گلی نامەیەکێ دە داخوازێ ژ حکوومەتا هەرێما کوردستانێ و ئیرانێ و سازیێن ناڤدەولەتی دکن داکو ل پرسا وان خوەدی دەرکەڤن، لێ بەلێ ئەڤ گلی نامە وەکە هەموو گلی نامەیێن دن تو باندۆرەکێ ل پەکەکێ ناکە.

د چەندین رۆژێن رابووری دە مەریەم خزری، دایکا ئەسرینێ، ب رێیا گرتەیەک ڤیدیۆیی نووچەیا جان ژ دەست دانا کەچا خوە پارڤە کرییە و تێدە گۆتییە: «هەرچەند كو پەکەکە بێ کو ئیماژێ ب جیێ وێ بکن ب تەنێ ب وان رە راگهاندییە کو ئەسرین شەهید کەتییە، لێ د راستی دە ئەسرینێ خوه‌ستییە ژ دەستێ پەکەکێ برەڤە و ژ بال ڤێ رێخستنێ ب خوە ڤە هاتییە شەهید کرن».

مەریەم خزری دبێژه‌: «ئەڤ کلتوورا خوەسەپێن یا پەکەکێ/پژاکێ کو ژ گراڤا ئیمرالیێ و ناڤێ ئاپۆ هێزا خوە دستینە، ل رۆژهلاتا کوردستانێ تو پێگە و پێشەرۆژەک نابە».

سەرپێهاتییا تەراژەدی یا ئەسرینا بچووک، جارەک دن جڤاکا رۆژهلاتا کوردستانێ هەژاند، بوویەرا رەڤاندنا ئەسرینێ نە ب تەنێ جارەکە دن پەردە ل سەر دژە ئینسانی بوونا پەکەکێ هلدا، بەلکو ئەو کارەساتێن تەراژەدی ژی ل بیرا مە ئانین کو د بەرێ دە پارتییا ئاپۆ ل دژی زارۆکێن کوردستانێ ب گشتی و رۆژهلاتا کوردستانێ ب تایبەتی ئەنجام دانە.

چالاکڤانێن سیاسی و مەدەنی، رۆشەنبیر و بەشەکی بەرچاڤ ژ خۆرتێن رۆژهلاتا کوردستانێ، ژ بلی شەرمەزار کرن و ئیدانەکرنا کارێن دژە ئینسانی یێن پەکەکێ، تەکەز کر کو ئەڤ چاندا خوەسەپێن یا پەکەکێ/پژاکێ کو ژ گرەڤا ئیمرالیێ و ب ناڤێ ئاپۆ هیزا خوە دستینە، ل رۆژهلاتێ کوردستانێ ت پێگەهـ و پێشەرۆژەک نابە.

رۆژهلاتیێ تام باکور

دووڤكه‌تیێن په‌كه‌كێ/پژاكێ ل رۆژهلات دگۆتن كو ئەسرین ژ بەر برچی بوونێ چوویە چیا پێویستییا وێ ب پەکەکێ هەبوو!!

ئەو هەژمارا هندک یا کەسێن ل رۆژهلاتا کوردستانێ ئالیگرییا پەکەکێ دکن و زۆر ئالاڤێن وان ژی هەنە ژ بۆ ئالیکاریکرنا وان ب رێیا سازیێن ئەولەهی یێن ئیرانێ، تەکۆشینێ دکن ب پەچنینا ڤێ مژارێ، جینایەتێن پارتییا کارکەرێن کوردستانێ ل رۆژهلاتێ کوردستانێ بڤەشێرن.

 ئەڤ کێمپەیدا دوڤەلانکێن ئۆجالان کو ل رۆژهلاتێ کوردستانێ دە ب «رۆژهلاتی یێن باکور تەوەر» دهێن ناس کرن، ژ بۆ ڤەشارتنا کارێن قرێژ یێن پەکەکێ، هنەک هێنجەت ب کار دئینان کو ئیزایا وێ ژ جینایەتێ ب خوە ب ژان تر بوو، هنەک ژ وان دگۆت مالباتا ئەسرینێ هەژار و بەلەنگاز بوون و ئەسرین ژ بەر برچی بوونێ چوویە چیا پێویستییا وێ ب پەکەکێ هەبوو!! ل ڤڕ ئینسان حێبەتی دمینە کو دەمارگرژی و ئایۆلۆژیەک چ قاس دکارە ویژدانا ئینسانان لاواز بکە و نەهێلە کو زارۆیێ ئینسانەکێ برەڤینی و پشتره‌ ببێژی داکو ژ برچیبوونێ نەمرە مە ئەو رەڤاندییە!

پرسیار ئەڤە وەکە چاوا ل ڤیدیۆیا مەریەم خزری داییکا ئەسرینێ دە ب زەلالی ئیماژە پێ دکە و هەر وها یێن کو مالباتا حەسەن محەمەدی ناس دکن، مالا ڤێ مالباتێ ل گوندێ «کەچەل ئاوا» یە و بەردەوام جیێ ڤەحەویان و پێدانا خوارن و پێویستیێن گەریلایان بوویە، ئانکو گەر ئەو قاس هەژار بوون چما گەریلا هەرتم ل سەر سفرەیا وان بوون و پێتر بارێ وان گران کرییە و ئەو پێتر هەژار کرینە؟ هه‌موه‌خت ئەڤ پرسە ژی دروست دبە گەلۆ هوون ب خوە نابێژن فەلسەفەیا ئاپۆچیتیێ خۆرتان بەر ب سەنگەرێن پەکەکێ دکێشە لێ چەوا دبە ئەسرین ژ بەر برچی بوونێ بەر ب پەکەکێ چوویە؟ گەلۆ پەکەکە رێخستنەکە مافیاواری یە کو کەسێن برچی ل جەم خوە کۆم دکە و ل جیێ پیدانا خوارنێ و جیێ مانێ، وەکە ئاموورێن شەر بکار دئینە و شەری ب وان دکە؟ گەلۆ راستە کو دبێژن پەکەکە شیرکەتا شەرە و ب پەرە شەری ژ بۆ دەولەتان دکە؟

هەر کەس باش دزانە کو د وان پرتووکێن ب ناڤێ ئۆجالان هاتینە نڤیسین یەک ژ سەرەکەترین مژاران «پەروەردەیا ئیدۆلۆژیکە»، ئانکۆ پەروەردە کرنا ئیدۆلۆژیک یا زارۆکان بەشەکی ئەساس ژ وان نه‌رینانه‌ کو ئالیگرێن پەکەکێ و ئۆجالان ب فەلسەفەیا ئاپۆچیتی ب ناڤ دکن.

گەلۆ دبە ئۆجالان و پەکەکە فێم نەکن تەڤلی کرن و بەشداریکرنا زارۆکان د شەر دە چ قاس باندۆرەک خراب ل سەر ناڤ و ئیعتیبار و سومعەتا شۆرشا رزگاریخوازا کورد و چاندا کوردستانێ ل ئاست ناڤچەیێ و ل ئاستا ناڤدەولەتی دە دکە؟ گەلۆ دبە ئۆجالان و دوڤەلانکێن وی ئەو قاس نەزان بن کو باندۆرا خەراب و نیگەتیڤ یا زارۆیێن شەر ل سەر پێشەرۆژا کوردستانێ و جڤاکا کوردی فێم نەکن؟ ب نەرینا من ئەو باش ژ باندۆر و ئەنجامێن خه‌راب و نیگەتیڤ یێن بەشداری پێ کرنا زارۆیان د شەر دە ل سەر نها و پێشەرۆژا کوردستانێ فێم دکن، هەر ژ بەر ڤێ یەکێ بەردەوام زارۆکان د رەڤینن و وان چەکدار دکن.

 پەکەکە ل دەما هەیی هەیا نها ب زانابوون ل دژی کوردستانێ تەڤ دگەرە، گەر دۆر ژ دەمارگرژی و پەرگیری و ب لۆژیک و مەنتق بفکرین وێ ببینین کو خوە یەک هزر و کارێ پەکەکێ نینە کو خێرەک ژ بۆ کوردستانێ تێدە بە؟

ئالیگر و سەرکردەیێن پەکەکێ ل جیێ دانپێدانێ ب شاشێتیێن خوە و لێبۆرین خوەستن ژ وان مالباتێن کو زارۆکێن وان ب سەدەما ڤێ رێخستنێ جانێ خوە ژ دەست دانە، هەر جارێ و ب هێنجەتەکێ مژارێ بەرەڤاژی دکن، د بەرسڤا دایکا ئەسرینا جانگۆری دە و دەما کارێن زارۆک رەڤاندنێ یێن پەکەکێ دهێن رەخنەکرن، دبێژن فەلسەفەیا ئاپۆ جیهان حێبەتیێ خوە کریە و چۆمسكی ئالیگرێ هزرا ئاپۆیە!!

وها هزر بکن کو مۆسیلینی و هیتلەر و ستالین ژی ئالیگرێن هزرێن ئۆجالانن، لێ ئەڤ یەک وێ چ دەردەکی ژ دایکەکێ ره‌ دەرمان بکە کو کەچا وێ یا 13 سالی وەرە رەڤاندن و پشترە وەرە کوشتن و نزانە تربا وێ ل کۆ دەرێ یە؟ ئەڤ یەک وێ چ دەرد ژ رۆژهەلاتێ کوردستانێ و په‌رچەیێن دن یێن کوردستانێ دەرمان بکە کو زێدەترین زرار ب وان گهیشتنە ب سەدەما پەکەکێ و سیاسەتا وێ دژە نەتەوه‌بوونا کوردان؟ ئەڤ یەک چەوا دکارە ئێشانا داگیرکارییا عەفرینێ و سەرێ کانیێ رحەت بکە؟ گەلۆ دبە ب ڤێ سەفستەیێ چیایێ شەکیف و خواکورک و جاسۆسان و دەهان جیێن دن یێن ستراتەژی یێن کوردستانێ کو ب سەدەما پەکەکێ د دەستێ کوردان دە نەمانە جارەکە دن وەرن رزگارکرن؟

زارۆکێن 11 و 12 سال داخباری فەلسەفەیا ئاپۆ بوون و ب حەزا خوە ته‌ڤلی رێخستنا په‌كه‌كێ بوونه‌!!

پەکەکێ چەندین سالان پێش نها کۆمەک ژ زارۆکان ل گوندێ «نێ» یێ ناڤچەیا مەریوانێ ل رۆژهلاتێ کوردستانێ رەڤاندبوون. دەما  گەلێ رۆژهلات فشار ل پەکەکێ کری، راگهاندنا پەکەکێ ڤیدیۆیەک ژ وان زارۆکان پارڤەکر و خوەست وها نیشان بدن کو ئەڤ زارۆکێن 11 و 12 سالی داخباری فەلسەفەیا ئاپۆ بوون و ب حەزا خوە جوونە ناڤا رێخستنا پەکەکێ دە، یا بالکێش ئەو بوو هەر د وێ ڤیدیۆیێ دە زارۆک د ئەساس دە هەر ناڤێ ئاپۆ نزانن و دەما داخوازێ ل وان دکن ببێژن «بژی سەرۆک ئاپۆ» زارۆک دبێژن: «بژی سەرۆک ئاکۆ».!

پرسیارا گرینگ ئەڤە کو ئەڤ سەناریۆ یا زارۆک رەڤاندنێ و پشترە خەلک ب نەزان حەساب کرنا پەکەکێ وێ چ دەم ب داوی بە؟ گەلۆ دەما ڤێ یەکێ نەهاتییە کو گەلێ کورد ب گشتی و گەلێ کورد ل رۆژهلاتێ کوردستانێ ب تایبەتی هەلوەستەک جدیتر ل همبەر ڤان کارێن قرێژ یێن پەکەکێ نیشان بدن؟ گەلۆ رێخستنێن چالاک د وارێ مافێن مرۆڤ و زاۆک و ژنان دە، هەیا کەنگی دخوازن دەنگێ خوە ئەو قاس بلند نەکن کو جڤاکا ناڤدەولەتی وی دەنگی ببهیسە؟

پرسیار زەلالە و پێویست ب تو سەفستائیێ ناکە، پارتییا کارکەرێن کوردستانێ پەکەکە زارۆک ژ هەمبێزا گەرما مالباتا وی رەڤاندییە، ئەو ب زۆرداری چەکدار کرییە و پشترە وەکە دایکا کەچا بچووک دبێژە، دەما خوەستی ژ دەستێ پەکەکێ باز بدە، گەریلایێن پەکەکێ ل وێ خستیە و ئەو کوشتیە، پێویست ب تۆ هێنجەتان ناکە یان ئەڤە تو هەڤرایی دگەل پەکەکێ و وێ هان دده‌ی زارۆکێن زێدەتر برەڤینە و وان بدە کوشتن یان ئەڤە هەستەک ئینسانی و نەتەوه‌یی د هوندرێ تە دە هەیە و ڤی کارێ قرێژ شەرمەزار دکی و هەموو ئاوایەکێ دخەبتی داکو زارۆکێن کێمتر ببن قوربانیێ سیاسەت و پەروەردەیا ئایدۆلۆژی و زارۆک رەڤاندنا ئاپۆ و پارتییا کارکەرێن کوردستانێ.

گه‌لێ رۆژهلات ژیره‌ كۆلاڤێ په‌كه‌كێ و ئیمرالیێ ل سه‌ر خوه‌ ناكن، جیێ هزرا خوەسەپێن یا «براتییا گەلان» و زارۆک ره‌ڤاندنێ د چاندا رۆژهلات ده‌ نینه‌

تشتا كو بالا مرۆڤ دکشینە ئەڤە پەکەکە دخوازە ب باسکرن ل ئێریشێن ترکیێ بۆ سەر ئاخا باشوورێ کوردستانێ، ل پێلا هەستێن نەتەوه‌یی یێن گەلێ کورد ل رۆژهلاتێ کوردستانێ سوار ببە و ب ڤێ یەکێ بەهانەیان ژ بۆ کارێن خوە یێن دۆر ژ ئینسانییەتێ پەیدا بکە، لێ وها دیارە پەکەکێ گەلێ رۆژهلات ناس نەکرییە، وها دیارە کارڤەدانا کوردێن رۆژهلات ژ بۆ رەفەراندۆما سەرخوەبوونا کوردستانێ و مژارێن دن یێن نەتەوه‌یی ل بیرا وان نەمایە و فێم ناکە گەلێ کورد ل رۆژهلاتێ کوردستانێ گهشتییە ئاستەک وها ژ خوەناس کرنا نەتەوه‌یی کو بکارە ڤێ یەکێ فێم بکە کو پەکەکە و ترکیە ب رێیا ئیمرالیێ بەرچاڤ دکن.

 خۆرتێن کورد ل رۆژهلاتێ کوردستانێ و رۆشەنبیر و خەباتکارێن ڤێ پارچەیا کوردستانێ ژ ڤێ یەکێ هۆشیارتر و ژیرترن کو پەکەکە ب هێنجەتا ئێریشێن ترکیێ ل سەر هەرێما باشوورێ کوردستانێ بکارە وان بخاپینە و کارێن وێ یێن دژە ئینسانییەتێ بپەچینە، پەکەکە و رێڤەبەر و ئاغایێن وێ و ئەو نادر کوردێن «رۆژهلاتی یێن باکورتەوەر» پێویستە جارەکی ژ بۆ حەتا حەتا ڤێ راستیێ فێم بکن کو چاندا رۆژهلاتێ کوردستانێ چاندەک نەتەوه‌یی، دەمۆکراتیک، ئینسانی، ئینسانپەروەر و ب ئەخلاقە و تو جییەک ژ بۆ هزرا خوەسەپێن یا دژە نەتەوە «براتییا گەلان» و زارۆک رەڤین و دژەئەخلاق تیدە نابە.

د بەشا چارەم دە وێ تەکۆشینێ بکین شیرۆڤەیەکێ ژ بۆ داوی گوفتوگۆیا «سیامەند موعینی» بکین کو ژ بال پەکەکێ ڤە وەکە سەرۆکێ پژاکێ هاتییە دانان و یەک ژ شەرتێن مانا وی د پۆستا خوە دە ئەڤە کو دژی هزرا نەتەوه‌یی و شوناسخازی و سەرخوەبوونا کوردان داخویانییان بدە.

ل بەندا مە بن