هەڤسەرۆکێ پژاكی: مە تو پسگرێک دگەل ئیرانێ نینن
نڤیسین: کارۆ هەورامان
بەشا چاره‌مین
سیامەند موعینی، هەڤسەرۆکێ پارتییا ژیانا ئازاد یا کوردستانێ پژاکێ، د بەشداریکرنەکێ دە ل بەرنامەیا «راڤە» ل کەنالێ «ئاریەن» یێ پەکەکێ، راگهاند ترکیه دخوازە پرسگرێکان د ناڤبەرا پژاکێ و ئیرانێ دە دروست بکه، داکو شەرێ هەڤدو بکن.
هه‌موه‌خت هەڤسەرۆکێ پژاكێ، کۆمەک مژارێن دن دەرخستن هۆلێ کو دبە ئەم پێتر شیرۆڤەیان بۆ بکین، سیامەند د بەشەکە دن یا ئاخافتنێن خوە دە ئێماژە ب ئێریشێن «کۆنە ماسی» یێ کر و وەکە بخوازە رەواتیێ ب ئێریشێن ترکیێ بدە راگهاند د ڤێ ئێریشێ دە 4 گەریلایێن پژاكێ هاتنە هەدەف کرن.
پژاك: یێن کو ژ بال ترکیێ ڤە هاتنە ئارمانج کرن، گەلێ سڤیل نەبوو بەلکو 4 گەریلایێن مە بوون کو ژ بۆ کارەک رێخستنێ د ئەرکێ خوە دە بوون و کنجێن مەدەنی ل بەر وان بوون
ئاژانسا ANF یا پەکەکێ، د راپۆرەکێ دە ئێماژە ب گرینگترین ئاخافتنێن هەڤسەرۆکێ پژاكێ د وێ بەرناما تەلەفزیۆنی دە کر و نڤیساندییە: «هەڤسەرۆکێ پژاكێ باس ل ئێریشێن سەیرانگەها “کونە ماسی” کر و راگهاند: 4 هەڤالێن مە د دەما ئەرکێ خوە دە کو ب مەبەستا کارەکی رێخستنێ ل کونەماسی یێ رە دەرباس دبوون و کنجێن مەدەنی ژی د بەر وان دە بوون، لێ بەلێ ژ بال دەولەتا ترکیێ ڤە ئێریشی وان هات کرن».
سیامەند موعینی ب باس کرن ل ئێریشا کونەماسی، کو وها دیارە یەک ژ ئارمانجێن سەرەکە یێن بەشداربوونا وی د بەرنامەیا تەلەفزیۆنی دە ژی و د هەموو مەدیا و چاپەمەنییا پەکەکێ دە ژی هات پارڤەکرن، وەکە جیەکە ب تەمامی مەدەنی و دوور ژ ناڤچەیا شەر، بەرتەکێن دژوار ل پەی خوە ئانین و زەختەکە زیدە ل سەر رایەدەرێن ئەنقەرەیێ دروست کربوو، ب تایبەتی بەلاڤبوونا ڤیدیۆیا ئێریشێ و یاریێن زارۆکان و قوربانی بوونا ژن و زارۆکان د ڤێ ئێریشێ دە، وها کر کو پرانییا ناڤەند و چالاکڤان و رێخستنێن مافێن مرۆڤان ڤێ ئێریشێ پرۆتەستۆ بکن و ل سەر مەزلوومیەتا کوردان بێنە دەنگ.
لێ بەلێ ئەمێ دبینین کو پژاكێ ل دەستپێکێ ب راگهاندنەکێ و پشتره ب ڤان ئاخافتنێن سەرۆکێ پژاكێ ئالیکارییا ترکیێ دکە و دبێژە جڤاکا ناڤدەولەتی: «یێن کو ژ بال ترکیێ ڤە هاتیە ئارمانج کرن، گەلێ سڤیل نەبوو بەلکو 4 گەریلایێن پژاكێ بوون کو ژ بۆ کارەک رێخستنێ د ئەرکێ خوە دە بوون و کنجێن مەدەنی ل بەر وان بوون».
ئەڤ داخوەیانییا سیامەند موعینی نەتەنێ بەهانە ژ بۆ ڤێ ئێریشا ترکیی دروست کر، بەلکو ژ نها پێدە گەر ترکیە ل ناڤچەیێن دن یێن کوردستانێ ژی گەلێ سڤیل هەدەف بکە، ئەڤ جارە جڤاکا ناڤدەولەتی وێ پڕ ب گۆمان لێ بنێرن و پشتراست نابە کو قوربانی گەلێ سڤیلن یان دیسان گەریلایێن پەکەکێ و پژاكێ بوون و ب کنجێن مەدەنی د ئەرکێ خوە یێ عەسکەری دە بوون.
پژاك و ئیران دۆستێن هه‌ڤن و تركیه دخواز وان به‌رده هه‌ڤ
بەشەک ژ داخوەیانییا هەڤسەرۆکێ پژاكێ د ڤێ بەرنامەیا تەلەفزیۆنی دە راستییەک تێدە هەیە کو ژ بۆ ڤێ یەکێ پێویستە ل سەر بسەکنین و زیدەتر زەلال بکین.
سیامەند موعینی د بەشەکە ئاخافتنێن خوە دە دبێژە: “دەولەتا ترکیێ شەرەکە هەموو ئالی دگەل گەلێ کوردستانێ دایە دەست پێ کرن و هەموو تەکۆشینا وێ ژ بۆ ڤێ یەکێ یە کو ئیرانێ بێخە د ناڤا شەرەکی دە دگەل بزاڤا مە “پژاكێ”.
هەڤسەرۆکێ پژاكێ د ڤان ئاخافتنێن خوە دە هاوار دکە كو پژاكێ تو پرسگرێک و شەر دگەل رەژیما ئیرانێ دە نینە و ترکیە رۆلەک خەراب دگێرە و دخوازە وان بشەر بخە، گەر ئەڤ ئاخافتنە ژ بال رێخستنێن پارچەیێن دن یێن کوردستانێ ڤە وەرن کرن، دبە ئاخافتنەکە پڕ سەیر نەبە ژ بەر کو مادەم مەیدانا خەباتا وان د ناڤا ئەردنیگارییا ئیرانێ دە نینە، تشتەک نۆرمالە دگەل ئیرانێ تو پرسگرێکا وان نەبە! پڕ نە لۆژیکه کو ببێژە مە دگەل ئیرانێ تو پرسگرێک نینە و خەرابکار دخوازن مە ب شەر بخن، دبە ب تەنێ د فەلسەفەیا پەکەکێ و ئیمرالیێ دە بگونجە کو بەشەکی ژ گەلێ ولاتەک داگیرکری بگهینی رزگاریێ و ئازادیێ، لێ بەلێ د هەمان دەم دە تە تو پرسگرێکەک دگەل دەولەتا داگیرکار ده نەبە!!
سیامەند موعینی، په‌یوەندیێن د ناڤبەرا تەهرانێ و پەکەکێ/پژاكێ ده پشتراست دکە
پێویستە رزگاریخواز و ولاتپارێزێن کوردستانێ سپاسییا سیامەند موعینی، هەڤسەرۆکێ پژاكێ بکن ژ بەر کو راستییەک حاشاهەلنەگر باس کرییە، بێ گۆمان راستی ئەڤ نینە کو تو دێ بکاری رۆژهلاتێ کوردستانێ ئازاد بکی و تو پرسگرێکەک ژی ژ بۆ تە دگەل ئیرانێ دروست نەبە.
بەلکو راستی ئەڤە کو د ئەساس دە ئارمانجا پەکەکێ/پژاكێ رزگاربوونا نەتەوه‌یی نینە، نە ل رۆژهلاتا کوردستانێ نە ژی ل په‌رچەیێن دن یێن کوردستانێ، فەلسەفەیا ئاپۆچێتیێ د ئەساسا خوە دە باوەری ب پرسا نەتەوه‌یی یا کوردان و خەباتا وان یا رزگاریخواز نینە و د چارچووڤەیا ئیدیەما «براتییا گەلان» و ئیدیەمێن دن ئێن وەکە ڤی، تەکۆشینێ دکە حەز و ئارمانجا رزگاریخوازانە یە نەتەوه‌یا کورد ب کەڤنەشۆپ و پاشکەتی ب ناڤ بکە.
ئانکو دەما رۆشەنبیر و نڤیسكار و خەباتکارێن بزاڤا رزگاریخوازا کورد باس لێ دکن و دبێژن پەکەکە/پژاك بەشەکن ژ پرۆژەیا ئیرانێ و داگیرکارێن دن یێن کوردستانێ بۆ ژ رێ دەرکرنا خەباتا رزگاریخوازا گەلێ کورد، ئەڤ هەر قاس راستییەک پڕ تەعل ژی بە، لێ بەلێ پێویستە گەلێ کورد و ب تایبەتی گەلێ رۆژهلاتێ کوردستانێ قەبوول بکن.
ئاخافتنێن سیامەند وەکە سەرۆکێ پژاكێ هەر چەند بێ گۆمان ژ ساویلکە بوونا خوە باس کرینە، لێ بەلێ سەلمینەرا وێ راستییا تەعل و بەلگەیەک حاشاهەلنەگرە کو په‌یوەندیێن د ناڤبەرا تەهرانێ و “پەکەکێ/پژاكێ” پشتراست دکە، هەرچەند نیشانێن ڤان ئالیکارییان ژ بۆ هەژمارەک زێدە ژ گەلێ رۆژهلاتێ کوردستانێ رە زەلال بوویە، لێ بەلێ پێویستە کەسێن کو هنه‌ك گۆمان ژی هەبە ل سەر په‌یوەندیێن د ناڤبەرا “پەکەکێ/پژاكێ” و ئیرانێ دە ئێدی پشتراست بە کو خەتەرەیا پژاكێ ل سەر پێشەرۆژا خەباتا رزگاریخوازا کوردان، خەتەرەیەک جددی یە.
گەر هەبوونا بنگەهێن “پژاك/پەکەکێ” ب ئەشکەرە ل ناڤچەیێن رۆژهلاتا کوردستانێ و ب ئازادی هاتن و چوونا ئازادانە یا گەریلایێن پژاكێ ئەو پشتراست نەکربن، پێویستە ئێدی ئیعتیرافا سەرۆکێ پژاكێ مە پشتراست بکە کو پژاك دوژمنا ئیرانێ نینە، گەر ئیعتیرافا سەرکردەیێن دن یێن پەکەکێ ل سەر هەبوونا ئۆفیسا نوونەراتییا پەکەکێ ل تەهرانێ و نەخوەشخانەیا ڤێ پارتیێ ل ئۆرمیێ، ئەو پشتراست نەکربن ژ په‌یوەندیێن د ناڤبەرا پەکەکێ و تەهرانێ دە، ئێدی دەما ڤێ یەکێ هاتییە «ئەم نەبین سێنییا گەرمتر ژ خوارنێ» و ب ڤان ئاخافتنێن سیامەند موعینی فێم بکین کو پژاك پرۆژەیەک هەڤبەش یێ پەکەکێ و ئیرانێ یە و هەدەفا وێ ژ بلی دژاتیکرنا بزاڤا رزگاریخوازا رۆژهلاتێ کوردستانێ و ژ رێ دەرکرنا حەزا سەرخوەبوون خوازیێ ل وێ په‌رچەیا کوردستانێ و درێژ کرنا ته‌مه‌نا کۆمار ئیسلامی یا ئیرانێ یە، نە تو تشتەک دن.
گەر سیامەند راست دبێژە چما ئێریشی ئیرانێ ناکە و رۆژهلاتێ کوردستانێ ئازاد ناکە؟
دیارە پاشان سیامەند موعینی گەفان ل ئیرانێ دکە و دبێژە: «گەر کارێن ترکیێ باندۆرێ ل ئیرانێ بکە و بخوازە شەرێ مە بکە، ل وێ دەمێ پژاك وێ شەری ببە د ناڤا کووراتییا باژاران ده، هه‌موه‌خت ئیماژە ب ڤێ یەکێ ژی دکە کو ئیران لاوازە و نکارە شەرێ پژاكێ بکە! ئەڤ یەک ژی پڕ زەلالە سلۆگانا ڤێ یەکێ کو ئەو وێ شەر ببن ناڤا باژارێن دەولەتێن دوژمن، ئاخافتنەک ئێکسپایەرە کو پەکەکێ پێش داگیرکرنا عەفرینێ و سەرێ کانیێ و ناڤچەیێن دن ئێن رۆژئاڤا کوردستانێ، باس دکر و مە ب چاڤێ سەرێ خوە دیت ترکیێ ئەو ناڤچە و باژار داگیر کرن، لێ بەلێ تو دەنگەک ژ پەکەکێ نەهات نە ل چیا نە ژی د ناڤا تو باژارەکی ترکیێ دە.
ئەڤ سلۆگانە بوویە سلۆگانەک کو دووڤەلانکێن پەکەکێ پێ فێر بوونە و بەردەوام دوبارە دکن، گەر نا ئەو ب خوە ژی باش فێم دکن کو تو جاران کار ب ڤی سلۆگانی نەهاتییە کرن و نایێ کرن، دیارە پەکەکێ پرۆژەیەکی ترکیێ ب ناڤێ شەرێ خەندەکان ل باکورێ کوردستانێ «نە د ناڤا باژارێن ترکان دە» جی ب جێ کر و مە دیت ژ بلی وێرانییا زیدەتر یا کوردستانێ، قوربانیکرنا خۆرتێن شۆرشگێر و خوەدی هەستێن نەتەوه‌یی، ترس و دەربەدەر کرنا زێدەتر و بێ هێڤی بوونا کوردان ل وێ په‌رچەیا کوردستانێ، تو دەرەنجامەکە پۆزەتیڤ ژ بۆ کورد و کوردستانێ ل پەی خوە نەئانین.
لێ ئەوێ کو دبێژە کۆمارا ئیسلامی یا ئیرانێ نکارە شەری دگەل پژاكێ بکە و وها دیار دکە کو پەکەکە ل رەژێما ئیرانێ بهێزترە، ڤێ پرسیارێ دئافرینه کو گەر سیامەند راست دبێژە چما ئێریشی ئیرانێ ناکە و رۆژهلاتێ کوردستانێ ئازاد ناکە؟
ئەو هیزا کو ئیران نکارە شەر دگەل بکە و ژێ دترسە و دکارە کۆمارا ئیرانێ ژناڤ ببە وێ تو دەمێ وەرە بکارئانین؟ گەلۆ ئەو خەنجەرا رۆژا بەرتەنگییا یە؟ یان ژی پژاك ناخوازە رەژیما ئیرانێ ژناڤ ببە و کوردستانا رۆژهلات ئازاد بکە؟
ل گۆر راپۆرا ANFێ د بەشەکە دن یا ئاخافتنێن خوە دە، سیامەند موعینی باس ل هەماهەنگییا د ناڤبەرا میتا ترکیێ و ئیستیخباراتا ئیرانێ و پاراستنا پەدەکێ کرییە و گۆتییە: «میتا ترک و ئیتیلاعاتا ئیرانێ و پاراستنا پەدەکێ ماسەیەک هەبەش هەیە و جار جار ب هەڤرە دجڤن و ل سەر رەوشا کوردان گۆتوبێژان دکن، ب تایبەتی ژی کار ل سەر لێدانا دربەکێ ل پژاكێ دکن».
برێڤەبەرێن پەکەکێ دخوازن دەستێ خوە یێ پیس ب رێخستنێن نەتەوه‌یی یێن رزگاریخواز پاکژ بکن
ل دەستپێکێ پیویستە باس ل ڤێ یەکێ بکین کو پیکهاتەیا «میتا ترک و ئیتیلاعاتا ئیرانێ» دگەل پاراستنا پەدەکێ، د ناکۆکییان دە نە و نکارن ب هەڤرە د یەک ئەنی دە کۆم ببن، ژ بەر کو بەرژەوەندیێن وان هەڤ ناگرن، ل بیرا مەیە ل دەما کوشتنا قاسم سولەیمانی گرینگترین کەساتیێ هەرێمی یێ ئیرانێ و خەتەرترین تەرۆریستێ جیهانێ، ئامەریکا سپاسییا هەرێما کوردستانێ کر و ئەڤ بابەت دهات باس کرن کو پاراستنا پەدەکێ، هەڤکاری و زانیاری ب ئامەریکا و ئیسرائیلی دابن و مە دیت ژی کو ئیرانێ د ئێریشێن خوە یێن مۆشەکی دە ژ بۆ تۆلهلدانا قاسم سولەیمانی، هەولێر هەدەف کر.
یانی بێ کو بخوازم بەرەڤانیێ ژ پەدەکێ یان هەر ریخستنەکە دن بکم ئەڤ یەک راستییەک زەلالە کو پاراستنا پارتی زیدەتر نێزی ئیسرائیلێ و ئامەریکایە هەیا ئیتیلاعاتا ئیرانێ و میتا ترکیێ، گەر سیامەند گۆتبا میتا ترکیێ و ئیتیلاعاتا ئیرانێ دگەل دەزگەهێ زانیاری یێ یەنەکێ هەماهەنگیێ دکن بێ گۆمان وێ چاخێ هەم دا مەنتق زیدەتر د ئاخافتنا وی دە دیار بە و هەم ژی دا پێتر نێزی کەتواری بە و وەکە کورد دبێژن دا رێیەک چیت ڤێ یەکێ.
لێ یاکو میتا ترکیێ و ئیتیلاعاتا ئیرانێ ژ بۆ دربە لیدانێ ل پژاكێ و پەکەکێ پێویستی ب هەڤکارییا سازییەک ئیستیخباراتی یا باشوور بە، ئەو ب خوە وەکە پێكه‌نینه‌كێ تێ بەرچاڤان، ژ بەر کو پێش نها پەکەکێ ب دەهان ئەندامێن سەرکرداتییا خوە ب سووچا هەڤکاری کرن دگەل سازیێن ئیستیخباراتی یێن ترکیێ تەسفییە کرنە، هەر وەها بەشەک ژ وان کەس و جیێن کو ژ بال بالەفرێن ترکیێ ڤە تێن هەدەف کرن ئەوقاس گرینگ و نهێنی نە کو ژ بلی رایەدارێن مەزن یێن پەکەکێ تو کەسەک دن زانیاری ل سەر نینە، ئەڤ یەک ژی ئەشکەرە دکە کو ئەڤ زانیاری د راستی دە ل جەم رایەدارێن مەزن یێن پەکەکێ گهیشتنە ئیستیخباراتا ترکیێ.
یاکو په‌یوەندی ب ئیتیلاعاتا ئیرانێ ژی هەی ئەشکەرەیە کو یەک ژ خالێن سەرەکە یێن هەڤپەیمانییا ستراتەژی یا دەهان سالان د ناڤبەرا پەکەکێ و تەهرانێ ده، لیک گوهەرینا زانیاریێن ئیستیخباراتی د ناڤبەرا ئیتیلاعاتێ و پارتییا کارکەرێن کوردستانێ یە، د راستی دە ئیتیلاعات و پەکەکە هەڤپەیمانێن ستراتەژی و هەڤکارێن هەڤدونە ل دژی نەیاران.
ل داویێ ژی پێویستە ئێماژە ب ڤێ راستیێ بکین کو ئەو ئالیێ د بزاڤا رزگاریخوازا کوردی دە وەکە تەرۆریست ناڤدەرکرییە، پارتییا کارکەرێن کوردستانێ یە و برێڤەبەرێن پەکەکێ دخوازن دەستێ خوە یێ پیس ب رێخستنێن نەتەوه‌یی یێن رزگاریخواز پاکژ بکن.
شەر و بەرخوەدانا پێشمەرگەیان ل دژی هزر و کارێن تەرۆریستی و تەرۆریستان ئەوقاس بەرچاڤ و ب بهانە کو گۆمان خستنە سەر سازیێن ئەولەهیێ ل باشوورێ کوردستانێ ژ بۆ ئەنجام دایینا کارێن تەرۆریستی، سووچبارکرنەکە ئەو قاس بێ بنەما، بێ ناڤەرۆک و ئاشۆپی و دوور ژ راستیێ یە، نەسیامەند و نە تو بەرپرسەکە دن یێ پەکەکێ نکارن ب چەواشەکاریێ و درەوان روویێ وان یێ مرۆڤدوستی و ئازادیخازانە ل تاکە ستاتۆیا سیاسی یا کوردان ب ڤان تۆمەتان کرێت و نەشرین بکن.
