ئه‌ڤ زلام پر ژ ئه‌ردۆگان دلگرانه‌

پاپایێ ده‌وله‌تا ڤاتیكانێ، ل ده‌ربارا گوهه‌رینا «ئایا سۆفیایێ» ئیرۆ داخوه‌یانی دا و گۆ كو ئه‌و پڕ ژ ڤێ هه‌نگاڤا ده‌وله‌تا تركیێ دل گرانه‌.

پاپا فره‌نسیس، ئیرۆ رۆژا یه‌كشه‌می 12/7/2020ان، د گۆتارا خوه‌ دا كو ل قادا «قدیس بوترس» پێش كێش كر گۆت: «هزرا من دچه‌ سته‌نبۆلێ، ئه‌ز فكرا ئایا سۆفیا دكم و هه‌ست ب ژانه‌كه‌ هه‌ری ب ئێش دكم».

تێ زانین ئه‌ڤ دبه‌ یه‌كه‌مین به‌رسڤا پاپا فره‌نسیس ل ده‌ربارا بریارا دادگه‌ها ده‌وله‌تا تركیێ یا گوهه‌رینا «ئایا سۆفیایێ» ژ بۆ مزگه‌فتێ تێ حه‌ساب كرن.

دادگه‌ها بلند یا تركیێ ل پێنجشه‌مییا رابووری 9/7/2020ان بریارا حكوومه‌تا تركیێ یا سالا 1934ان هلوه‌شاند و بریار دا «ئایا سۆفیا» ژ مووزه‌خانه‌ ببه‌ مزگه‌فت.

ئه‌ڤێ بریارێ باندۆره‌كه‌ هه‌رێ زێده‌ ل ئاستا تركیێ و جیهانێ ل په‌ی خوه‌ ئانی، پشتره‌ سه‌رۆكێ تركیێ گۆ كو مه‌ «ئایا سۆفیا كره‌ مزگه‌فت، هه‌ر وه‌كه‌ باپیرێ مه‌ سولتان محه‌مه‌د فاتح ئه‌م وه‌سیه‌ت كرین».

ره‌جه‌ ته‌یب ئه‌ردۆگان هه‌ر وها گۆت بوو: «ب ئانه‌هییا خوه‌دایێ مه‌زن، ئه‌مێ یه‌كه‌م نمێژا ئینیێ ل 24 ڤێ مه‌هێ ل ئایا سۆفیایێ ب هه‌ڤره‌ بكن».

«ئایا سۆفیا وه‌كه‌ ئاڤاهی ل سالا 537 وه‌كه‌ كلێسه‌ هاتبوو ئاڤا كرن، لێ پاش كو ئۆسمانییان سته‌نبۆل گرتی، ل سالا 1453ان ئه‌ڤ جییه‌ ژ بۆ مزگه‌فتێ گوهه‌رتن، پاش ژ ناڤ چوونا ده‌وله‌تا ئۆسمانی و دامه‌زراندنا ده‌وله‌تا تركیێ ئه‌تاتۆركی، «ئایا سۆفیا» ژ بۆ مووزه‌خانه‌ هاتبوو گوهه‌رتن.