ئیرانێ کارمەندەکێ خوە ب جینایه‌تا سیخۆریێ دارڤەکر

ئیرانێ کارمەندەکێ خوە یێ خانەنشین ب تاوانا سیخورییێ دارڤەکر

بەردەڤکێ دادوەريیا ئیرانێ ئيرۆ رۆژا سێشەمێ 14/7/2020ان راگھاند کو کارمەندەک خانەنشین ئێ وەزارەتا بەرگرییا ئیرانێ ل سەر سووچێن موخابەراتێ ھاتە دارڤە کرن.

ل گۆری ئاژانسا نووچەگھانییا ئیسنا، قۆلامحۆسەین ئیسماعیلی خەبەر ژ دارڤەکرنا کارمەندەکێ خوە ئێ خانەنشین د ھەفتەیا رابووری دە ب تاوانبارییا “سیخوریێ” ژ بۆ دەزگەھێ ئیستخباراتی یێ ئامەریکی راگھاند.

ب گۆتنا قۆلامحۆسەین ئیسماعیلی، ئەڤ کەس خانەنشینێ وەزارەتا پاراستنێ بوو و گەلەک سالان د ڤێ وەزارەتێ دە خەبتی بوو و د سالا 1995ان دە ب خانەنشینی یا پێش وەخت ھاتبوو خانەنشین کرن.

ئیسماعیلی ئیدیعا کر کو ئەو زلام د سالێن خوە یێن داوین یێن کار و پشتی خانەنشین بوونێ دە کەتییە بن خزمەتا CIA یا ئەمریکی و ژ بەر کو وی زانیاری ل سەر بەرنامەیێن مووشەکی یێن ئیرانێ ھەبوون ھن ژ وان زانیارییان فرۆتنە CIA و پەرە وەرگرتبوون، ژبەر ڤێ یەکێ ئەو ھاتبوو گرتن، دادگەهکرن و بریارا دارڤەکرنێ ل سەر هات دایین و سزایێ وی ژی ھەفتەیا رابووری ھاتە جی ب جی کرن، بەردەڤکێ دادوەرییا ئیرانێ ناڤێ ڤی کەسی ب ناڤێ «رەزا ئەسکەری» راگھاند.

ئیرانێ بەرێ ژی چەند کارمەندێن وەزارەتا بەرگریێ ب سووچا سیخۆریێ دارڤە کرنە، نێزیکی سالەکێ بەرێ، د 24ێ تیرمەھا 2019ان دە، رێخستنا دادوەرییا ھێزێن چەکدارێن ئیرانێ بێی زانیاریێن ب ھوورگلی راگھاند کو «جەلال حاجی زاڤار»، کارمەندێ گرێبەستێ رێخستنا ئاسیمانی ئێ وەزارەتا بەرگریێ ھات دارڤەکرن.

بەردەڤکێ دادوەرییا ئیرانێ د داخویانییا خوە دە ئیدیعا کر کو ئەڤ کارمەند ژ بۆ CIA و حکوومەتا ویلایەتێن یەکبوویی سیخۆری دکر.