پارتییا كاركه‌رێن كوردستانێ، ل شه‌نگالێ ده‌ست ئاڤێتییه چێكرنا خه‌نده‌كان، ژ بۆ كو گه‌ریلایێن خوه ژ ئێریشێن تركیێ بپارێزه.
ل گۆر ئاگاهیێن ده‌ستێ مه، پاش ده‌ست پێ كرنا ئێریشا سه‌ر باشوورێ كوردستانێ كو تركیێ ل 15/6/2020ان دایه مه‌شاندن، په‌كه‌كێ ل شه‌نگالێ ده‌ست ئاڤێتییه كۆلانا خه‌نده‌كان ژ بۆ كو گه‌ریلا تێده ژ ئێریشێن هه‌وایی یێن تركیێ پاراستی بن.
ئه‌ڤ خه‌نده‌ك په‌كه‌كێ ب كووراتییا 10 مه‌ترویان ل بنارا چیایێ شه‌نگالێ، سینۆرێ سنۆنێ، خانه‌سۆرێ، باب شلۆ و سه‌كینیێ چێكرنه.
ئه‌ڤ هه‌نگاڤا په‌كه‌كێ هه‌موه‌ختا ده‌ست پێ كرنا پێڤاژۆیا ڤه‌گه‌رینا مالباتێن ئێزدی ژ كامپێن ئاواره‌یی ئێن ل دهۆكێ ژ بۆ وارێن وان ل شه‌نگالێ تێ.
ده‌وله‌تا تركیێ، ل 15 مه‌ها رابووری مه‌زنترین ئێریشا سه‌ر په‌كه‌كێ ل باشوورێ كوردستانێ ده‌ست پێ كر، د یه‌كه‌م ئێریشا هه‌وایی ده، 151 پێگه‌هێن په‌كه‌كێ ل شه‌نگال، مه‌خموورێ و ناڤچه‌یێن دن ئێن هه‌رێما باشوور هاتن هه‌ده‌ف كرن.
ئیرۆ 34 رۆژ ل سه‌ر ئێریشێ ده‌رباس دبن، لێ به‌لێ زرارا ڤێ ئێریشێ ل سه‌ر گه‌لێ باشوور و شێنیێن گوندێن دهۆكێ پێتره، ژ به‌ر كو هه‌یا نها نێزی 50 گوندان ل سینۆرێ زاخۆ، كانی ماسێ، دهۆكێ، ئامێدی و به‌رواری بالا هاتنه ڤالا كرن.
ژ ده‌ستپێكا ئێریشێ هه‌یا دوهـ رۆژا شه‌می 18/7/2020ان، تركیێ 135 جاران ئێریشێن هه‌وایی و به‌ژاهی ل سه‌ر باشوورێ كوردستانێ كرنه.
