پەیاما مەسعوود بارزانی ل سەر شەشەمین سالڤەگەرا کۆمکوژیا شنگالێ

پەیاما مەسعوود بارزانی ل سەر شەشەمین سالڤەگەرا کۆمکوژیا شنگالێ

سەرۆک مەسعوود بارزانی ب ھەلکەفتا شەشەمین سالڤەگەرا کۆمکوژیا شنگالێ پەیامەک بەلاڤ کر.

ئیرۆ ٣ تەباخێ یە و ٦ سال ب سەر کۆمکوژیا کو ھۆڤێن داعشێ ئانین سەرێ کوردێن ئێزیدی و دەڤەرا شنگالێ، رە دەرباس دبە.

سەرۆک بارزانی ب ڤێ ھەلکەفتێ پەیامەک بەلاڤ کر. پەیاما وی وھایە:

“ب ناڤێ خوەدایێ مەزن و دلۆڤان

ئیرۆ شەش سال ل سەر کارەساتا تاوانا کۆمکوژیا شنگالێ دا دەرباس دبە. کارەساتەک کو تێدا تەرۆریستێن داعیش ب ئاوایەکە درندانە تاوانێ بەرانبەر خووشک و برایێن مەیێن ئێزیدیان ئەنجام دان. ئەو تاوان برینەکە کوورە ل سەر لاش و جەستەیا گەلێ کوردستانێ و تو دەمەکێ نایێ ژ بیر کرن. ل ڤێ کارەساتێ دا ئێزیدی ژ بەر کوردبوونێ و ژ بەر ئۆل و بیر و باوەریێن خوە کەتنە بەر لەھیا رک و ھۆڤ و بێ ویژدانیا تەرۆریستان. ئەو تاوانبارێن داعشێ یێن ل دژی خووشک و برایێن مە یێن ئێزیدی ئەنجام دانە بەردەوامیا وان زنجیرە کارەسات و تاوانان بوو کو ب درێژاھیا دیرۆکێ دە ل سەر گەلێ کوردستانێ ھاتیە ئەنجام دان.

ل ڤێ سالڤەگەرا دلتەزین دا ب بلندی بیرئانینا شەھیدان و قوربانیێن شنگالێ دکین. ھەمان دەمێ دە وان پێشمەرگەیێن قەھرەمان ژی ب بیر تینین کو ب خوینا خوە شنگالێ و چیایێ شنگالێ ژ دەستێ تەرۆریستان ئازاد کرن و مەردانە تۆلا وێ کارەساتا دلتەزین ژ تەرۆریستان کرن.

ب پێویستی دزانم ل ڤر دا جارەکە دن تەکەز ل وێ یەکێ بکم کو ب ھەموو شیانەک ڤە پشتەڤانیا داخوازیێن خووشک و برایێن ئێزیدیان دکم بۆ کو ئەو ب سەربلندی ڤەگەرن سەر مال و وارێن خوە و ژیانەکە بەختەوەر و ئارام و دووری ل سیتەمکاری و چەوساندنا وان ھەبێ و بکارن کاروبارێن خوە ل ناڤچەیێن خوە برێڤە ببن. جھێ داخەکە زێدەیە دەڤەرا شنگالێ ژی پشتی روودانێن شانزدەھێ جۆتمەھێ کەتیە بن باندۆرا پلانا نەحەزێن خەلکێ کوردستانێ. ئەڤ دەم ژ بۆ ئەوەیە رێ ل کارەساتێن دن و خوین رژاندنا د ناڤبەرا ئێزیدیان بێ گرتن و وھا رێکەفتن ھاتە کرن کو کۆنترۆلا شنگالێ بدن ئێزیدیان و ئێزیدی ھەر ب خوە ئیدارەیا شنگالێ و ناڤچەیێن خوە بکن، لێ بەلێ ھەتا نھا ژی حکوومەتا ئیراقێ پابەندی وێ رێکەفتنێ نەبوویە و شنگال کەتیە دەستێ خەلکەکە دن. ھەر ژ بۆ وێ یەکێ ژی ھەتا نھا ئێزیدیێن دەڤەرا شنگالێ ژ ژیان و پاشەرۆژا خوە پشتراست نینن و ڤەنەگەریانە ناڤچەیێن خوە و ھەر ل رەوشا کۆچبەری و ژیانا وارگەھان دا مانە کو ل راستیێ دا ئەڤە زولمەکە مەزنە.

ژ بۆ وێ یەکێ پێویستە داوی ب ڤێ رەوشا نە خوەزاییا شنگالێ بێ ئانین و شنگال ڤەگەرە دەست خوەدیێ خوەیێن رەسەن و پێویستە رێکارێن وھا بێنە گرتن کو ئێدی کارەسات و زولم و تاوان ل دژی ئێزیدیان و پێکھاتێن دن دووبارە نەبێ.

ل سالڤەگەرا کارەساتا کۆمکوژیا شنگالێ دا دلێ من بەردەوام ل گەل خووشک و برایێن ئێزیدیانە و ھەڤخەمێ کەسوکارێن قوربانیێن وێ کارەساتا دلتەزینم. ھەزاران سلاڤ ل گیانێ پاکێ شەھیدێن شنگالێ و ھەموو شەھیدێن رێیا ئازادیا کوردستانێ.

مەسعوود بارزانی

3.8.2020″