سه‌رۆكێ شاره‌دارییا به‌یرۆتێ ئه‌شكه‌ره كر كو سێ یه‌كا شێنیێن به‌یرۆتێ بێ مال مانه و زرارێن ته‌قینێ ب 4 ملیار دۆلارێن ئه‌مه‌ریكی تێن خه‌ملاندن، ماكرۆن ژی دبێژه یه‌كێتییا ئه‌ورۆپا ب مه‌رج وێ ئالیكارییا لبنانێ بكه.
هه‌ركو دچه هه‌ژمارا قوربانیێن ته‌قینا رۆژێن رابووری ئا به‌نده‌را به‌یرۆتێ پێتر زه‌لال دبن، ئیرۆ رۆژا پێنجشه‌می 6/8/2020ان، جه‌مال عیتانی سه‌رۆكێ شاره‌دارییا به‌یرۆتێ ئه‌شكه‌ره كر، ب سه‌ده‌ما ته‌قینێ نێزی سێ یه‌كا شێنیێن باژارێ به‌یرۆتێ بێ مال و حال مانه و ل سه‌ر جاده‌یان ژیانێ ده‌رباس دكن.
هه‌موه‌خت گۆت: ته‌قینا به‌نده‌را به‌یرۆتێ زرار ب قاسی 4 ملیار دۆلاران گهاندنه ژێرخانه‌یا باژار و مه‌ودایا زراران ل بازنه‌یه‌كه پێتری 10 كیلۆمه‌تری یه و ئه‌شكه‌ره كر، بێ ئالیكارییا ولاتێن ئه‌ره‌بی و ناڤده‌وله‌تی، لبنان نكاره ڤه‌گه‌ره ره‌وشا به‌ری ته‌قینێ.
ژ ئالییه‌كێ دن، ئیرۆ ئیمانوێل ماكرۆن سه‌رۆكێ فره‌نسایێ ب سه‌ردانه‌كه له‌زگین گها به‌یرۆتێ و د ده‌ركه‌تنه‌كه مه‌یدانی ده، ته‌عقیبا زرارێن ته‌قینا به‌نده‌را به‌یرۆتێ كرن.
ماكرۆن د داخوه‌یانییه‌كێ ده گۆت كو فره‌نسا وێ سه‌ركێشییا پێڤاژۆیه‌كێ ژ بۆ ئالیكارییا لبنانێ ل یه‌كێتییا ئه‌ورۆپایێ بكه، لێ به‌لێ ب مه‌رجێ ده‌ست پێ كرنا چاكسازییه‌كه بنگه‌هین ئا هه‌مه‌ئالی، ماكرۆن هه‌ر وها گۆت ئه‌و ده‌ستپێشخه‌رییا لهه‌ڤهاتنه‌كه سیاسی ئا نوو ژ بۆ سه‌ركرداتییا لبنانێ بكه.
به‌ریا دو رۆژا ته‌قینه‌كه ب هێز ل به‌نده‌را به‌یرۆتێ چێبوو، ب وێ سه‌ده‌مێ ب سه‌دان كه‌سان جانێ خوه ژ ده‌ست دا و ب هه‌زاران بریندار كه‌تن، هه‌ر چه‌ند كو لبنانێ ئیلان كر كو ته‌قین ب سه‌ده‌ما مادده‌یێ نه‌ترات ئه‌مۆنیۆم بوو، لێ به‌لێ ئامه‌ریكایێ گۆمان هه‌نه كو كریاره‌كه ته‌رۆری به.
