سەرۆکێ کۆمیسیۆنا تەندورستیێ یا ئەنجوومەنا شورا یا ئیرانی خەبەر ژ ئالیکاریا زێدەتری یەک میلیار دۆلاری یا “ئایەتۆڵاھ سیستانی” دا ژ بۆ ئیرانێ داکو ب ڤی پەرە ئیران بکارە رەوشا بەلاڤبوونا ڤیروسا کۆرۆنایێ ل ئیرانێ کۆنترۆل و باشتر بکە.
ل گۆری ئاژانسا نووچەگھانیا ئیرنا، حوسەیین عەلی شەهریاری د جڤینەک رۆژنامەڤانی دە ل زاھەدان رۆژا پێنجشەمی، ٦ێ تەباخێ، ٢٠٢٠ دیار کر: “ڤیروسا کۆرۆنا بوویە سەدەما پرسگرێکان، لێ ئەم ھەول ددن گەلەک پرسگرێکان ب رێیا کانالا وەزارەتێ و رێخستنێن خێرخوازیێن تەندورستی چارەسەر بکن، دا کو کێماسی کێم ببن.”
نوونەرێ زاھەدان ل پارلامەنتۆیێ وھا دۆماند: نێزیکی یەک میلیار دۆلار ژ نڤیسگەھا “ئایەتوڵاھ سیستانی” ڤە ژ بۆ رووبرووبوونا شەرێ ل دژی کۆرۆنا ل وی وەلاتی ھاتیە بەردەستکرن، کو ژ ڤی پەرە ئالاڤێن پزیشکی ژ بۆ ھن باژارێن وەکە سیستان و بلوچستان ھاتیە مەزاختن.
ھێژایی ببیرخستنێیە کو لێڤەگەرێن ئۆلی یێن شیعەیان ئیددیئا دکن کو داھاتا وان یا دارایی ژ ھێلا چاڤکانیێن “کەسێن ئۆلی یێن بەرنیاس، زەکات، و خێرێن دن” تێ دابینکرن.
ئەڤ ئالیکارییا سیستانی د دەمەکی دەیە کو عیراق نها د رەوشەکە ئابووری و جڤاکی و سیاسی یا هەرە خراب دە دەرباس دبە و رۆژانە ل عیراقێ ژبەر نەبوونا خزمەتگۆزارییان و هەبوونا دزی و گەندەلیێ خوەپێشاندان تێن لدارخستن.
