پارتیا دەمۆکراتا کوردستانێ (PDK) و یەکیتیا نیشتمانییا کوردستانێ (YNK) پشتی جڤینا ھەر دو ئالیان، داخویانیەکە ھەڤبەش راگھاندن.
د داخویانیا ھەڤبەش دە ھاتیە ئەشکەرەکرن: “ھەر دو ئالیان ل ھەڤ کرن کو ناڤەرۆکا رێکەفتنا سیاسییا PDK و YNK وەرە جیبجیکرن کو د ٤ێ ئادارا ٢٠١٩ان دە ھاتبوو ئیمزەکرن.”
ھەروھا ھاتیە دەستنیشانکرن: “بریار ھات دایین کو جڤینا بەرفرەھا ھەر دو پۆلیتبیرۆیان، د دەمەکە نێز دە ل سەرۆکاتیا ھەرێما کوردستانێ ل ھەولێرێ وەرە کرن.”
داخویانیا ھەڤبەشا پەدەکێ و یەنەکێ ب ڤی ئاوایی یە:
رۆژا سێشەمێ ١١ێ تەباخا ٢٠٢٠ان، شاندا تایبەتا گۆتووبێژێ یا یەکیتیا نیشتمانییا کوردستانێ (YNK) و پارتیا دەمۆکراتا کوردستانێ (PDK) ل باژارێ دوکانێ جڤیان و چەند مژارێن ل سەر پەیوەندیێن ھەر دو ئالیان ئاخڤین و گۆتووبێژ کرن و بریارێن پێویست دان.
یەکەم: ھەر دو ئالیان ل ھەڤ کرن کو ناڤەرۆکا رێکەفتنا سیاسییا PDK و YNK وەرە جیبجیکرن کو د ٤ێ ئادارا ٢٠١٩ان دە ھاتبوو ئیمزەکرن و ژ ھەموو ئالیان ڤە ب گشتی و ب تایبەتی د مژارا پارلەمەنتۆ و حکوومەتێ دە، ب ئاوایەکی کو ئالیکارێ حکوومەت و سازیێن وێ ببن، ژ بۆ سەرکەفتنا ب سەر رەوشا تەدروستیێ دە کو ڤیرووسا کۆرۆنایێ دەرخستیە ھۆلێ و ھەروھا د بارێ ئابۆری و دەبارا وەلاتیان و باشکرنا وان دە.
دویەم: ھەر دو ئالیان ل ھەڤ کرن کو پشتەڤانیا حکوومەتا ھەرێما کوردستانێ بکن ژ بۆ حکومرانیا ل سەرانسەرێ کوردستانێ، ژ بۆ ڤێ ژی رێکەفتنا ئیداری یا ناڤبەرا ھەر دو ئالیان وەرە جیبجیکرن و ھەروھا ل ھەر جھەکی کو کێشەیەک دەرکەڤە ھۆلێ، ب ھەڤ فێمکرن و ئالیکاریا ناڤبەرا ھەر دو ئالیان ب لبەرچاڤگرتنا ئالیێن بەشدارێن دن ل ھکوومەتێ، چارەسەری وەرە دیتن.
سێیەم: راگھاندنا ھەر دو ئالیان خوە دوور بکن ژ شێوازا نڤیساندن و بەلاڤکرنا ئالۆزی و تێکدانا ژ ھەموو جورە کانالێن راگھاندنێ.
چارەم: ھەر دو ئالیان ل ھەڤ کرن کو ژ بۆ جیبجیکرنا بەندا Aیا د خالا ٦ەما رێکەفتنا سیاسییا ھەر دو ئالیان دە، لەز بکن. ژ بۆ ڤێ مەبەستێ ژی، لژنەیا تایبەت و پسپۆر ژ ھەر دو ئالیان وەرە پێک ئانین، دا کو ئالیکاریا حکوومەتا ھەرێما کوردستانێ و زێدەتر خزمەتکرنا وەلاتیێن ھەرێما کوردستانێ بکە.
پێنجەم: دەربارێ یاسا ھلبژارتنێ و ھلبژارتنێن پێشوەختێن پارلەمەنتۆیا ئیراقێ دە، ھەر دو ئالیان ل ھەڤ کرن کو ھەمان ھەلوەستێ نیشان بدن، کو دەزگەھێن ھلبژارتنێ یێن پارتیا دەمۆکراتا کوردستانێ (PDK) و یەکیتیا نیشتمانییا کوردستانێ (YNK) ب ھەڤبەشی و ب شێور، ل گەل تیمێن ھەر دو ئالیانێن ل حکوومەت و پارلەمەنتۆیا ئیراقێ، ل سەر ڤێ مژارێ بخەبتن و پێشنیازێن گونجاو بدن پۆلیتبورۆیێن ھەر دو ئالیان.
شەشەم: ژ بۆ کو ئەم ژ دەمێ سوود وەربگرن و بریاران بلەز جیبجی بکن، بریار ھات دایین کو جڤینا بەرفرەھا ھەر دو پۆلیتبیرۆیان، د دەمەکە نێز دە ل سەرۆکاتیا ھەرێما کوردستانێ ل ھەولێرێ وەرە کرن.
یەکیتیا نیشتمانییا کوردستانێ
پارتیا دەمۆکراتا کوردستانێ
