ئێریشه‌كه‌ مه‌زن ل باكورێ كوردستانێ ده‌ستپێكر

ئێریشه‌كه‌ مه‌زن ل باكورێ كوردستانێ ده‌ستپێكر

ده‌وله‌تا تركیێ ئیرۆ ئێریشه‌كه‌ مه‌زن ل باكورێ كوردستانێ ل دژی په‌كه‌كێ ل هه‌رێما چیایی ئا ئامانسۆسێ ئا ناڤچه‌یا هاتایێ ده‌ستپێكر و پێتر ژ هه‌زار عه‌سكه‌ران تێده‌ به‌شدارن.

ل گۆر ئاگاهیێن ده‌ستێ مه‌، ئیرۆ رۆژا چارشه‌می 12/8/2020ان، 1448 جه‌ندرمه‌، له‌شكه‌ر، پۆلیس و جه‌رده‌ڤانێن ترك ئۆپه‌راسیۆنه‌كه‌ نوو ل سینۆرێ پارێزگه‌هییا هاتایێ ل دژی پارتییا كاركه‌رێن كوردستانێ ده‌ستپێكر، ئه‌ڤ ئۆپه‌راسیۆن ل هه‌رێما چیایی ئا ئامانسۆسێ تێ مه‌شاندن.

ئارتەشا ترکیێ د مەھەکێ دە ل هه‌ر یێك ژ پارێزگه‌هیێن شرنەخێ، جۆلەمێرگێ، ئاگری و دێرسمێ ژی ٤ ئۆپەراسیۆنێن وەکه‌ ئا ھاتایێ دانە دەستپێکرن.

ل گۆر ئاگاهیێن وه‌زاره‌تا كارێن ناڤخوه‌ ئا تركیێ، د وان 4 ئۆپه‌راسیۆنان ده‌، 15 گەریلایێن په‌كه‌كێ جانێ خوە ژ دەست دانە،  30 شکەفت، ستارگەھ و دەپۆ ھاتنە وێران کرن و دەست ب سەر گەلەک چەک، جەبلخانە و خوارن و ئالاڤیێن ژیانێ ده‌ ھاتنە گرتن.

ئەڤ ھەیامەکە ئارته‌شا ترکیێ ئۆپەراسیۆن، لڤ و تەڤگەرێن خوە نەتەنێ ل باکورێ کوردستانێ ل ھەمبەری په‌كه‌كێ زێدە کرنە، د ھەمان دەمێ دە ل باشوورێ کوردستانێ دە ژی ئۆپەراسیۆنێ خوە زێدە کرنە و رۆژانه‌ ئێریشێن هه‌وایی پێكتینه‌.

ژ 15 مه‌ها خزیرانا ئیسالێ،  ئارته‌شا تركیێ 50 كیلۆمه‌تر درێژاهی و 30 كیلۆمه‌تر كووراهی ده‌رباسی هنه‌ك ژ ناڤچه‌یێن پارێزگه‌هییا دهۆكێ ئا باشوورێ ولات بوویه‌.

پوستێن ھەمان بەش