پارلامەنتۆیا عەرەبی ل دژی ترکیێ بانگ ل جڤاکا ناڤدەولەتی کر

پارلامەنتۆیا عەرەبی ل دژی ترکیێ بانگ ل جڤاکا ناڤدەولەتی کر

 پارلامەنتۆیا عەرەبی ل دژی ئۆپەراسیۆن و ئێرشێن ترکیێ یێن ل ناڤ ئاخا باشوورێ کوردستانێ شەرمەزار کرن. کۆمکارا عەرەبی ژی جارەکە دن پشتەڤانیا خوە ژ ھەر پێنگاڤەکا ئیراقێ راگھاند کو د قادا جڤاکی ناڤدەولەتی دە ل دژی ترکیێ باڤێژە.

سەرۆکێ پارلامەنتۆیا عەرەبی در. مەشعەل بن فەھم ئەل سلمی، ئێرشێن ترکیێ شەرمەزار کرن و بانگ ل ئەنجوومەنا ئاسایشا ناڤدەولەتی کر کو ئێرشێن ترکیێ راوەستینە.

ئەل سلمی تەکەز کر کو ئێرشا ل سیدەکانێ و ئۆپەراسیۆنێن دنێن ترکیێ یێن ل ناڤ ئاخا باشوورێ کوردستانێ، “بنپێکرنەکە زەلال ئا یاسایێن ناڤدەولەتی و سەروەریا ئیراقێ یە.”

سەکرەتەرێ گشتییێ کۆمکارا عەرەبی ئەحمەد ئەبو گایت ژی نەرازیبوونا خوە ل ھەمبەر ئێرشا ترکیێ یا ل سیدەکانێ دەربری و گۆت، “ئەم ئێرشا ترکیێیا ل ھەرێما سیدەکانێ کو بوو سەدەما شەھیدوونا دو فەرماندار و لەشکەرەکی ژ ھێزێن چەکدارێن ئیراقێ ب توندترین شێوە شەرمەزار دکن.”

سەکرەتەرێ گشتییێ کۆمکارا عەرەبی ژی تەکەزی ل سەر وێ کر کو “ترکیە یاسایێن ناڤدەولەتی و سەروەریا ئیراقێ بن پێ دکە” و گۆت، “ئەم پشتەڤانیا ھەر پێنگاڤەکا ئیراقێ دکن کو د قادا ناڤدەولەتی دە ژ بۆ راوەستاندنا ئێرشێن ترکیێ و پاراستنا سەروەر، ئەولەھی و سەقامگریا خوە داڤێژە.”