قارایلان: بلا ترکیە ئێرش نەکە، ئەم ئامادەنە ل سینۆر تو چالاکیێ نەکن

فەرماندارێ بریارگەھا ناڤەندا پاراستنا گەل – نەپەگە دبێژە، مە ل حەفتەنینێ دربێن کوژەک ل لەشکەرێ ترکیێ دانە و گەر لەشکەرێ ترکیێ وەرە زاپێ ئەمێ وان بن ئاخ بکن.

موراد قارایلان فەرماندارێ بریارگەھا ناڤەندا پاراستنا گەل و ئەندامێ دەستەیا رێڤەبەر ئا کۆما جڤاکێن کوردستانێ- کەجەکێ، ب هلکەفتا 36ەمین سالرۆژا دەستپێکرنا شەرێ چەکداری یێ پەکەکێ ل 15ی تەباخا سالا 1984ان داخویانیيەک بەلاڤ کر و تێدە راگهاند: ژ بەر کو ئەم ل باکورێ کوردستانێ شەر دکین، ل ناڤچەیێن حەفتەنینێ، خواکورک و زاپێ شەر روو ددە.

فەرماندارێ بریارگەھا ناڤەندا پاراستنا گەل موراد قارایلان ل سەر سالڤەگەرا 36ان ئا پێنگاڤا 15ێ تەباخێ پەیامەک وەشاند و گۆت: “ژ بەر کو ئەم ل باکورێ کوردستانێ شەر دکن، ل حەفتەنینێ، خاکورکێ و زاپێ شەر دقەومە، مە سۆز دان کو ئەمێ دەستکەتیێن گەلێ کوردستانێ ھەموویان بپارێزن، ئەمێ بپارێزن، ل پێش چاڤێن مە دژمن تێ داگیر دکە، رێ چێدکە و ب رەنگەکی مایندە ب جھ دبە، ئەم ل دژی ڤێ شەر دکن، ئەم دەستکەتیێن گەلێ باشوورێ کوردستانێ، گەلێ باشوورێ کوردستانێ، خاکا ئیراقێ دپارێزن”.

قارایلان گۆت: “ئەم ژ گەلێ خوە، ب تایبەتی گەلێ باشوورێ کوردستانێ، گەلێ ئەرەبێ ئیراقێ دخوازن کو پشتگریێ بدن مە، ئەم ب بریارن کو ڤی دژمنی تێک ببن”.

تەکەز کر بلا ئارتێشا ترکا داگیرکەر ژ خاکا ئیراقێ، ژ خاکا باشوورێ کوردستانێ ڤەکشە، بلا ئێرش نەکە، ئەم ئامادە نە کو ل سەر سینۆر تو چالاکیێ نەکن، لێ بەلێ دڤێ ئەو ژی ئێرش نەکن.

کارایلان ژ بەر جان ژ دەست دانا دو فەرماندارێن سوپایێ ئیراقێ د ئێریشا ئاسیمانی یا ترکیێ ل باشوورێ کوردستانێ سەرساخی ل گەلێ کوردستانێ و ئیراقێ کر و راگهاند: “خوینا وان فەرمانداران وێ ل ئەردێ نەمینێ و ئەمێ بەرسڤا ڤێ ئێریشێ بدین”.

قارایلان هەر وها راگهاند، ئەم پێداگیرن ل سەر شکاندنا دوژمن و د ڤێ دەربارێ دە ئەم بانگ ل گەلێ باشوور و گەلێ ئەرەب ئێ ئیراقێ دکن کو ئالیکارییا مە بکن.

ئەڤ گەفێن قارایلان فەرماندارێ بریارگەھا ناڤەندا پاراستنا گەل د دەمەکی دە نە کو وەزارەتا بەرگرییا ترکیێ ل رۆژا 15/6/2020ان ئۆپەراسیۆنا ئاسیمانی یا ب ناڤێ “پەنجا ئەلهو” بۆ سەر پێگەهێن پەکەکێ ل باشوورێ کوردستانێ دەست پێ کر، و ل رۆژا 17/6/2020ان ئۆپەراسیۆنەکە دن ب ناڤێ “پەنجا پلنگ” ل ناڤچەیێن حەفتەنینێ ل سینۆرێ باژارێ زاخۆ دەستپێکر و هەیا نها ژی بەردەوامە.

پێش نها ژی قارایلان چەندین جاران گەف ل دەوله‌تا ترکیێ کرینە، بۆ میناک پێش دەستپێکرنا ئێریشا ترکیێ ژ بۆ سەر باژارێ عەفرینێ، کارایلان راگهاند: “گەر دەولەتا ترکیێ تێکەڤە عەفرینێ، ئەمێ شەر ببن ناڤ جەرگێ ترکیێ و دێ ل ناڤا باژارێن مەزن ئێن ترکیێ دە شەر بکین”، لێ بەلێ هەیا نها گەفێن قارایلان و رایەدارێن دن ئێن پەکەکێ ل دژی ترکیێ ژ بلی ئاخافتنێ د وارێ پراکتیک دە تونە بوونە و تو جاران گەفێن خوە د وارێ پراکتیکی دە جیبجی نەکرنە، بەرەڤاژی دەولەتا ترکیێ هەر کو دچە پێتر ئاخا کوردستانێ داگیر دکە و پەکەکە ژی هەر کو دچە پێتر خوە نێزی باژارێن باشوورێ کوردستانێ دکە، ب ئاوایەک وها کو پەکەکە بوویە پرا دەرباسبوونا دەولەتا ترکیێ ژ بۆ باشوورێ کوردستانێ.