باله‌فرێن جه‌نگ یێن ده‌وله‌تا تركیێ ئێریشێ چیایێ گاره و ئاڤاشین یێن ل باشوورێ كوردستانێ كر، زیانێن مه‌زن ب په‌كه‌كێ كه‌تن.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ژ دوهـ رۆژا چارشه‌می هه‌یا ئیرۆ، باله‌فران چیایێ گاره‌ی و ناڤچه‌یا ئاڤاشینێ ل سینۆرێ پارێزگه‌ها دهۆكێ بۆردۆمان كرنه، خالێن په‌كه‌كێ هاتنه هه‌ده‌ف كرن.
د ئێریشان دا ئاگاهی خوه‌یا دكه‌ن كو 4 گه‌ریلایان جانێ خوه ژ ده‌ست داییه، جهێن وان هاتنه ژ ناڤ برن.
د ڤێ ده‌ربارێ دا، وه‌زاره‌تا پاراستنا نه‌ته‌وه‌ی یا تركیێ ل حه‌سابا خوه یا تویته‌رێ ئه‌ڤ ئاگاهی به‌لاڤ كرنه و گۆتییه كو 4 گه‌ریلا د ئێریشا گاره و ئاڤاشینێ دا هاتنه هه‌ده‌ف كرن.
ئه‌ڤ ئێریش هه‌موه‌ختا بۆردۆمانا دوهـ رۆژا چارشه‌می ل گوندێ كانی مه‌زنێ یێ ل ده‌ڤه‌را به‌رواری بالا دهێت كو باله‌فران 2 مووشك ل ئاقارێ گوند ل نێزیكی مالێن ولاتییان دابوون.
پاش ده‌رباسبوونا 2 مه‌هان ل سه‌ر ئێریشا تركیێ ل سه‌ر باشوورێ كوردستانێ، په‌كه‌كه رۆژ بۆ رۆژێ شه‌رێ خوه و تركیێ نێزی گوند و باژارۆكان دكه‌ت، ولاتیێن باشوور ب تایبه‌ت یێن پارێزگه‌ها دهۆكێ نه‌رازینه و دخوازن په‌كه‌كێ ژ گوند و ناڤچه‌یێن وان دوور بكه‌ڤیت ژ بۆ كو نه‌كه‌ڤن به‌ر ئێریشان.
