داودئۆغلۆ: ھەتا کورد ئازاد نەبن ئەم نەشێین ئارام بین

داودئۆغلۆ: ھەتا کورد ئازاد نەبن ئەم نەشێین ئارام بین

ئەحمەد داودئۆغلۆ، سەرۆکێ گشتی یێ پارتیا پێشەرۆژێ راگەھاند: “ل ترکیایەکا کو کورد خوە تێدا ئازاد، وەکھەڤ و ئارام نەبینن، ژ مە چ ئێک نەشێت ئارام بیت.”

سەرۆکێ گشتی یێ پارتیا پێشەرۆژێ ل باژارێ وانێ یێ باکورێ کوردستانێ د کۆنگرەیا پارتیا خوە دا ئاخڤت.

داودئۆغلۆ بال کێشا سەر قەیوومێن کو ل جهێ سەرۆکێن شارەداریێن پارتیا دەمۆکراتیکا گەلان (ھەدەپێ) هاتینە دانان و گۆت: “مخابن، ژ لایەکێ تیرۆرا پەکەکێ، ژ لایێ دی کەسێن ب ڤێ تیرۆرێ دژین، ژ بۆ وە، ژ بۆ ترکیێ و گەلێ مە، ئارامی، داد و ژیانەکا ب روومەت، گەلەک دیت. ئەوێن ل بەرامبەر سندۆقێ چیا داتینن بەر وە، ھوون دەنگێ خوە بدنە کێ ژی، ب دانانا کۆمیسەرەکێ کەجەکێ داخوازێن خوە ب جیهـ ئینان. دەستھلاتا نھا و هەڤبەشێن وێ ژی، دەما دیتی نەشێن دەنگێ وە وەربگرن، ژ بۆ وە قەیووم فرێکرن و دەست دانا سەر ئیرادەیا وە.”

ئەحمەد داودئۆغلۆ گۆت: “پارتیا پێشەرۆژێ ژ بۆ ب دوماهی ئینانا سیستەمێ کەجەکێ و سیستەمێ قەیوومان ب رێ کەفتیە. انشالله دەما ئەم وەکو پارتیا پێشەرۆژێ، ل وانێ رێڤەبەریا شارەداریێ ب دەست خوە ڤە بینین، ئەم دێ دوماهیێ ب ڤێ دوبەرەکیێ بینن.”

سەرۆکێ گشتی یێ پارتیا پێشەرۆژێ ئاشکرا کر: “ئەم وەکو پارتیا پێشەرۆژێ د وێ باوەریێ داینە کو پێویستە تەنێ ب بریارا دادگەھێ سەرۆکێ شارەداریێ ژ کارێ وی بهێتە لادان.” ھەروھا گۆت: “ل شوونا سەرۆکێ شارەداریێ کو ژ کاری دهێتە دوورخستن، وەزارەتا ناڤخوە قەیوومان دئینیت و ئەڤە ل دژی ئیرادەیا گەلی یە. د ڤێ چارچۆڤەیێ دا، ل شوونا سەرۆکێ شارەداریێ کو ب بریارا دادگەھێ ژ کاری ھاتیە لادان، دڤێت ئەندامەکێ ئەنجوومەنا شارەداریێ بهێتە دیارکرن، کو ئەو ژی ب رێیا ھلبژارتنان ھاتیە.”

“ل ترکیێ پرسا کوردان ژ بەر کێمبوونا مافێن دیمۆکراتیکە”

ئەحمەد داودئۆغلۆ ل سەر پرسا کوردان ژی دیار کر: “پرسا کوردان ب ئەسلێ خوە ژ بەر کێمبوونا مافێن دیمۆکراتیکێن ل وەلاتێ مە دەرکەفتیە و ئەڤ کێمبوونە ب رەنگەکێ نەرێنی دهێتە بکارئینان. چارەسەری ژی ئەوە کو رێ ل جیاوازکرنا دناڤبەرا ناسنامەیان دا بهێتە گرتن.”