70 گه‌نجێن ئێزدی د زیندانێن په‌كه‌كێ دا نه‌

قائیمقامێ شه‌نگالێ ئه‌شكه‌ره‌ كر، 70 وه‌لاتیێن ئێزدی ل ڤێ داویێ به‌رزه‌ بوونه‌ و پاش لێگه‌رین و ل دویڤچوونێ ئه‌شكه‌ره‌ بوو كو ئه‌و د زیندانێن په‌كه‌كێ دا نه‌.

قائيمقامێ شه‌نگالێ مه‌حما خه‌لیل ژبۆ پیگه‌ها (باسنیوز) داخویانی دایه‌ و دبێژیت: ل ڤێ داویێ 70 گه‌نجێن ئێزدی یێن شه‌نگالێ به‌رزه‌ بوونه‌، لێ به‌لێ خه‌لكێ شه‌نگالێ دبێژن، ئه‌و د زیندانێن نهێنی یێن په‌كه‌كێ دانه‌.

هه‌روه‌ها گۆت: په‌كه‌كێ زیندانێن نهێنی ل شه‌نگالێ هه‌نه‌، پێتری 70 گه‌نجێن ئێزدی كو خوه‌جهێن شه‌نگالێ نه‌ به‌رزه‌ بوونه‌، مالباتێن وان ته‌كه‌ز كرنه‌ پاش دویڤچوونێ ئه‌شكه‌ره‌ بوو كو ئه‌و د زیندانێن په‌كه‌كێ دانه‌.

قائیقامێ شه‌نگالێ ده‌ست نیشان كر كو د سه‌ر هه‌موو كاره‌سات و ده‌رده‌سه‌ریێن ب سه‌رێ گه‌لێ ئێزدی و شه‌نگالێ دا هاتین وه‌كه‌ كۆمكوژی، دزین و تالانكرنا مالێ وان و ئاواره‌بوون، نها گه‌لێ شه‌نگالێ ژ زیندانێن نهێنی یێن په‌كه‌كێ و گۆرێن ب كۆمه‌ل د نالیت.

تێ زانین پاش بوویه‌رێن 16 ئۆكتۆبه‌را 2017ێ، چه‌كدارێن ب ناڤێ یه‌كینه‌یێن به‌رخوه‌دانا شه‌نگالێ یا گرێدای په‌كه‌كێ مل ب ملێ حه‌شدا شه‌عبی ڤه‌ د شه‌نگالێ دا جێگیر بووینه‌، ژ وێ ده‌مێ ڤه‌ ئاواره‌یێن شه‌نگالێ ب ئه‌گه‌را په‌كه‌كێ و هێزێن گرێدای وێ نه‌شێن ڤه‌گه‌رن وارێن خوه‌.

ل ڤێ داویێ هه‌ژماره‌كا خوه‌پێشاندانان ل شه‌نگالێ و دۆربه‌را وێ هاتنه‌ كرن و گه‌لێ ناڤچه‌یێ داخوازا ده‌رخستنا په‌كه‌كێ كرن، د به‌رسڤا وان دا په‌كه‌كێ خوه‌پێشاندان پاشڤه‌ برن و هه‌ژماره‌كا گه‌نجان ده‌سته‌سه‌ر كرن.