پەکەکێ بریارا شەری ل دژی حکوومەتا ھەرێما کوردستانێ دایە
پەکەکە دخازیت نە ژ داگیرکەرا بەلکو ژ کوردستانا ھاتیە رزگارکرن پارچەیەکا ئاخێ ب دەست بێخیت
پەکەکێ کو بریارا شەری ل دژی حکوومەتا باشوورێ کوردستانێ دایە گەلەک نیشان ژێ ھەنە. گەلەک کەس وەها هزر دکەن کو پەکەکە ڤێ ناکەت. لێ بەلێ ئەگەر مرۆڤ د ناڤا گۆرەپانا ھەرێمێ دا جیھێ پەکەکێ و کێشەیێن وێ یێن بنیاتی باش ئانالیزە بکەت، دێ بینیت کو پەکەکە شەرێ دژی حکوومەتا ھەرێما کوردستانێ ژ بۆ خۆ وەکو کێشەیا مان و نەمانێ دبینیت. دێ شێت ڤێ پلانا خۆ سەربێخە یانژی نە، ھێزا وێ چەندە و هتد… ئەڤە مژارێن جهێ گەنگەشە ل سەر کرنێ نە. لێ د راستی دا پەکەکە دخازیت مانا خۆ ل سەر نەمانا حکوومەتا ھەرێما کوردستانێ ئاڤابکەت.
ئەگەر ترکیا داگیرکەر بیت گەلۆ ئیران چییە ؟
پەکەکە ھەر دەم ئارگومانان د ئافرینیت دا کو رامانا خۆ یا پێشبازیێ ل دژی باشوورێ کوردستانێ دیار بکەت. ئەو دخوازیت کارڤەدانێن گەلێ کورد ل دژی کۆلۆنیالیزما ترکان کو ڤان سالێن دوماهیێ زێدە بوویە بکار بینیت. د بن ھەر شەرت و مەرجەکێ دا، پەکەکە ب بەردەوامی رێڤەبەرییا باشوور و سیاسەتمەدارێن وێ تاوانبار دکەت کو د گەل دەولەتا ترکیێ دا پەیوەندی ھەنە. ئەو هەبوونا ڤێ یەکێ وەکو سەبەبەک ژ بۆ دەستپێکرنا شەر ل دژی حکوومەتا باشوور نیشان ددەت. لێ بەلێ، د راستی دا ھێشتا پەکەکە ژ دەولەتا ترکیێ نە ڤەقەتیایە. نھا ژی لێدگەرن کو دگەل دەولەتا ترکیێ دا گۆفتوگوویان ئەنجام بدەن. گەر نوکە ئەردۆگان رابیت و ببێژیت وەرن ئەم ئێک دو ببینین، ھەما بێ شەرت و مەرج دێ چن ھەڤدیتنان ئەنجام دەن. لنگێ پەکەکەێ یێ لەگال ھەدەپە ھێشتا ژی پلانان ددانیت کو دەولەتا ترکییێ دیمۆکراتیک بکەت.
پەکەکە ھەر رۆژ بانگەوازییا دییالۆگێ د گەل ترکان دکەت. ل تەنشت ڤێ ژی ئەم ھەموو دزانین کو پەکەکە و ترک لگەل ھەڤ دناڤا پەیوەندییەکیا ب گوماندانە. نموونە پەکەکە ئیدارا دەولەتا ترک ئاکەپێ-مەھەپێ فاشیست دبینیت، گەلۆ پەکەکە سەرۆکێ ئیرانێ رووحانی دیمۆکرات دبینیت؟ داگیرکەرێن کوردستانێ نە ب تنێ دەولەتا ترکە د پلانا داگیرکرنا باشوورێ کوردستانێ دا لنگێ دویێ ژی دەولەتا ئیرانێ یە. گەلۆ پەکەکە دخازیت پێشیێ ل داگیرکرنا باشوور بگریت یان ژی بنگەھێ داگیرکرنا ئیرانێ ئامادە بکەت. بێ گومان دەستهەلاتا دەولەتا ئیراق و ئیرانێ ل سەر باشوور ھەیە پەکەکە دخازیت خۆ ژی بکەتە ھەڤپشکا وان.
تشتێ ل شنگالێ کری دخازیت ل ھەولێرێ ژی بکەت
پەکەکێ ئەڤ شێواز ل شنگالێ جەرباند. پارچەک ژ ھەرێما کوردستانێ ژێڤەکر ب پالپشتییا دەولەتا ئیراق و ئیرانێ شنگالێ ب رێڤە دبەت. نوکە دخازیت ئەو تشتێ ل شنگالێ جەرباندی ژ بۆ ھەموو باشوورێ کوردستانێ بجەربینیت. پەکەکە باشوورێ کوردستانێ یا د بن سەروەرییا دەولەتا ئیراقێ دا دخازیت و هزردکەت کو دەسهەلاتدارییا خۆ خۆرت بکەت. ژبەر وێ ژی پەیوەندی یێن سیاسی و دیپلۆماتیک پێش تێخیت.
گەر ھوون بەرێ خۆ بدەنە راستییێ ئەڤ ھەولدانێن ئەنجوومەنێ باژێرێ سلێمانیێ کو دخاست باژێرێ سلێمانیێ ب ئیراقێ ڤە گرێدەن، بانگەوازیا شاسووار عەبدولواحد داکو خەلک دەرکەڤیتە جادێ و ب بەردەوامی حکوومەتا ھەرێما کوردستانێ ئارمانجکرن، نە تشتەکێ ژ نیشکەکێ ڤە یە. ئەڤە ھەولدانە ھەموو ژ ئێک ناڤەندێ دهێنە برێڤەبرن.
شەر نە ل دژی داگیرکەرا، ل دژی کووردستانێ
ب کورتی پەکەکە دزانیت کو نەشێت ببیتە خۆدانا پارچەیەکا ئاخێ. نوکە دخوازیت پارچەیەکا ئاخێ ژ ھەرێما رزگارکری و ئازاد ئانکو ژ باشوورێ کوردستانێ دەست خۆ ڤە بینیت. گەر ئەو ژی چەنەبوو لسەر چەند ھەرێمان دەستھەلاتدارییا خۆ جێبەجێ بکەت. پەکەکە ئەو شەرێ کو نەشێت ل دژی داگیرکەرا ئەنجام بدەت نھا دخازیت ل دژی ھەرێما کوردستانێ، ئەنجام بدەت.
ژبەر ڤێ ژی د پلانا پەکەکێ دایە حەتا هەیڤا ئەیلۆلێ بکەڤیتە ناڤ بزاڤەکا سەربازی دا. ژ بەر ڤێ ژی دێ د گەلەک ئالیاندا کار کەت. دەستپێکێ دێ هەولدەت بەهانەیەکی بۆ شەرێ دژی پێشمەرگا دروست بکەت. ب ڤێ سەدەمێ ژی گەریلا برینە نێزیکی باژێرێن وەکو ئامێدیێ، شێلادزێ و سیدەکان و ل وێرێ ب جیھ کرینە داکو شەری دروست بکەت. ب شێوازەکێ دێ بنگەھێ شەری دناڤبەرا گەریلا و پێشمەرگەیان دا بئافرینیت.
ب پلانەکا ھەڤبەش د باژێران دا “نەوەی نووێ” بانگەوازییا خوەپیشاندان و ئالۆزییا دکەت پەکەکە ژی ب رێکا چەند گەنجێن کو ھاتینە پەروەردە کرن ڤە دێ کوشتنێ و نەئارامیێ د ناڤا خەلکی دا دروستکەت. و د ھەموو باژێران دا بێ جیاوازی دێ دژواری هێتە بکارئینان. ھێزێن خۆجھی ژی ئاگەھداری ڤێ پیلانا پەکەکێ نە. یا ھەری دوماهیێ کو ل باژێرۆکێ زاخۆ ھاتیە جەرباندن ژی بەشەک ژ ڤێ پیلانا قرێژی بوو. شەڤا ٢٠ی تەباخێ شۆفێرێن بارهەلگرا ژبەرکو سەفەرێن وانا ژ بۆ ناڤا کوردستانێ و ئیراقێ ھاتبوون راوەستاندن خاستن ئیدانە بکەن لێ چەند دووڤەلانکێن پەکەکێ یێن چەکدار ئەڤ بوویەرە وەکو خۆپێشاندانەکا ل دژی حکوومەتێ دا نیشاندان. ئاسایێشا ھەرێمێ چەند ژ ڤان دووڤەلانکان کو چەک د دەستی دا بوون، گرتن. دێ بەردەوامییا ڤان کریاران ژی ھەبیت. ئارمانجا پەکەکێ ل باشوورێ کوردستانێ ئەوە کو ئالۆزی و نەئارامیێ دروست بکەت. کو حکوومەتا ھەرێمێ نەشێت کاری خۆ ب رێڤە ببەت داکو ئەڤە ژی ببیتە ئەگەر کو حکوومەتا ئیراقێ ب بەهانەیا دەست تێوەردانا بوویەران بهێتە ناڤ باشوورێ کوردستانێ.
دیمەنێ دویەمین یێ خیانەتا کەرکووکێ
بێگومان ئەڤ پیلانە بوویەرێن کەرکووکێ دئنیتە بیرا مە. دەما کو سالا 2017 بوویەرێن کەرکووکێ رووی دای پیلان ئەڤە بوو: سوپایێ ئیراقێ دا رێکێن دناڤبەرا سلێمانییێ و ھەولێرێ گریت. سوپایێ ئیراقێ هندی شیابا دا بەرەڤ پێش چیت. ژ لایێ سلێمانییێ دا ژی لاھۆر جەنگی و کۆما وی دا کۆدەتایەکێ ل سەر ئێکەتیا نیشتیمانی یا کوردستانێ پێکئینن. ھەمان دەم دا ژ ھەرێما کوردستانێ ژی جوودا بن. رامانا ڤێ ژی ژناڤچوونا حکوومەتا ھەرێما کوردستانێ بوو.
بێگومان ئەڤ پیلانە نە هند یا ب ساناھی بوو نەژی هند یا سڤک بوو. لێ بەلێ هێلێن وێ یێن سەرەکی ئەڤە بوون. بەرخۆدانا پردێ ئەڤ پیلانا نەیارا ژناڤبر.
نھا ئەو پیلانا 2017ێ یا کو دخواست ل سەر دەستێ لاھۆر جەنگی پێک بینن، ڤێ جارێ دخوازن ب پیلانەکا ھێشتا مەزنتر ڤێ چەندێ پێک بینن. ئەڤ جار پەکەکە سەرکێشیا ڤێ پیلانێ دکەت.
وەختەکێ کو رێڤەبەرییا ئیراقێ و ھەرێما کوردستانێ دەست ب ھەڤدیتنان دکەت، ئەڤ پیلانە دهێتە بکار ئینان ئەڤ چەندە گەلەک جھێ شک و گومانایە. پێویستە پەکەکە دەست ژ ڤان یاری و پیلانگێرییان بەردەت.
