د به‌رده‌وامییا په‌ڤچوونێن نێڤبه‌را سوپایێ تركیێ و گه‌ریلایێن په‌كه‌كێ دا، د 24 ده‌مژمیرێن رابووری دا، 4 گه‌ریلا جانێ خوه ژ ده‌ست دا، ل باكورێ ولات ژی دربه‌كێ گران ب عه‌سكه‌رێ ترك كه‌تییه.
ئێریشێن ده‌وله‌تا ترك یێن ب سه‌ده‌ما په‌كه‌كێ ل باشوورێ كوردستانێ به‌رده‌وامن، دوهـ رۆژا یه‌كشه‌می 30/8/2020ێ باله‌فرێن جه‌نگ ل ده‌ڤه‌را زاپێ دایه، د ئه‌نجامێ دا 4 گه‌ریلایان جانێ خۆ ژ ده‌ست دا، جهێن وان هاتنه ژ ناڤ برن.
ل باكورێ كوردستانێ ئۆپه‌راسیۆنا كو سوپایێ تركیێ ل بایه‌زیدێ ده‌ست پێ كری به‌رده‌وامه، دوهـ شه‌رێن گران ل وێ ده‌رێ چیبوون، ئاگاهیێن كو هه‌په‌گێ به‌لاڤ كرین ئاماژه دكه‌ن 8 عه‌سكه‌ر هاتنه كوشتن.
ناڤه‌ندا راگه‌هاند و چاپه‌مه‌نیێ یا هه‌په‌گێ د داخویانییه‌كا نڤیسكی دا ئه‌شكه‌ره كرییه، ل بایه‌زیدێ ب دووراتییا چه‌ند مه‌تران گه‌ریلایان ل عه‌سكه‌رێن ترك دایه، 8 عه‌سكه‌ر هاتنه كوشتن و 2 سه‌نگه‌رێن وان هاتنه ژ ناڤ برن.
باله‌فرێن ترك پاش ڤێ ئێریشێ ده‌ردوورا ناڤچه‌یێ هه‌ده‌ف كر و شه‌واته‌كه مه‌زن چێبوو.
د داخویانییا هه‌په‌گێ دا وها هاتییه: ل 17 ته‌باخێ باله‌فران ل ده‌ڤه‌را زاپێ دایه و گه‌ریلایه‌كا وان ب ناڤێ شیلان كۆچه‌ر جانێ خوه ژ ده‌ست دابوو.
ده‌وله‌تا ترك و پارتییا كاركه‌رێن كوردستانێ هه‌ر د ماوێ چه‌ند رۆژه‌كان دا، ب داخویانیێن نڤیسكی ئامارێن زیانێن جانی یێن هه‌ڤ به‌لاڤ دكه‌ن، لێ به‌لێ چ چاڤكانیێن سه‌ربخۆ نكارن وان ئاماران سه‌ر راست بكه‌ن.
