هه‌ڤژینا سه‌لاحه‌ددین ده‌میرتاش ئه‌شكه‌ره كر، ئالیێن ده‌وله‌تێ رێ نه‌دان ده‌میرتاش هه‌ردوو كچێن خۆ ببینیت كو ژ بۆ دیتنا بابێ خۆ سه‌ردانا زیندانان ئه‌درنه‌یێ كربوون.
باشاك ده‌میرتاش هه‌ڤژینا سه‌رۆكێ به‌رێ یێ پارتییا ده‌مۆكراتیك یا گه‌لان هه‌ده‌پێ كو د زیندانا ئه‌درنه‌یێ دایه، ل حه‌سابا خۆ یا تویته‌رێ نڤیساندییه: ده‌ستوور نه‌هاته دان كو ده‌میرتاش هه‌ردوو كه‌چێن خۆ ببینیت كو ژ بۆ دیتنا بابێ خۆ وان سه‌ره‌دانا زیندانا ئه‌درنه‌یێ كربوو.
د تویتا باشاکێ دا وه‌ها هاتییه نڤیساندن: کارکەرێن کو د شەرت و مەرجێن گران دا نەچارن کار بکه‌ن، کەدکارێن سازیێن گشتی، خەباتکارێن سەکتۆرێن تایبەت، مەرۆڤێن د فرۆکەیان دا ل تەنشتا ھەڤ روودنێن، کەسێن بەشداری چالاکی و میتینگێن دەستھلاتێ دبن، كۆرۆنا ناگھە وان! لێ د ھەڤدیتنێن گرتیێن گرتیگەھان دا کو درابە و جام د ناڤبەرێ دا ھەنە، ل گەل دانینا ماسکەیێ ژی، كۆرۆنایێ دگه‌هینن حەزکریێن خوە!.
سه‌حه‌لاددین ده‌میرتاش ژ سالا 2016ان د زیندانا ئه‌درنه‌یێ دایه، كه‌چێن وی ده‌لال و دلدا كو ژ بۆ دیتنا بابێ خوه سه‌ردانا زیندانێ كربوون، رێڤه‌به‌رییا زیندانێ ب به‌هانه‌یا كۆرۆنا ڤایرۆسێ نه‌هشتن ئه‌و بابێ خۆ ببینن.
