4 گه‌ریلا و 2 به‌رپرسێن په‌كه‌كێ كه‌تن به‌ر ئێریشان

4 گه‌ریلا و 2 به‌رپرسێن په‌كه‌كێ كه‌تن به‌ر ئێریشان

شه‌ر و په‌ڤچوونێن ده‌وله‌تا تركیێ ل دژی پارتییا كاركه‌رێن كوردستانێ ل باشوور و باكورێ ولات ده‌وام دكن، ل بدلیسێ 6 گه‌ریلا كه‌تن به‌ر ئێریشان، 2 ژێ به‌رپرسن.

وه‌زاره‌تا ناڤخوه‌ یا تركیێ ئیرۆ رۆژا دووشه‌می 7/9/2020ان ئه‌شكه‌ره‌ كر، د ئێریشا دوهـ ده‌ كو ل سینۆرێ پارێزگه‌ها بدلیسێ هاتبوو ئه‌نجام دایین، 6 گه‌ریلا بوونه‌ ئارمانج، 2 ژێ به‌رپرسێن په‌كه‌كێ نه‌ و د لیستا داخوازكریێن ده‌وله‌تێ ده‌ جی دگرتن.

ده‌ست نیشان كر، یه‌ك ژ وان گه‌ریلایان  ناڤێ ئۆزله‌م ئاتساكا ب كۆد ناڤێ رۆناهی دێرسمی كو به‌رپرسا شاخا ژنان یا په‌كه‌كێ بوو ل بدلیسێ و دلیستا ره‌نگ پرته‌قالی یا داخواز كرییان ده‌ بوو.

هه‌روه‌ها گه‌ریلایێ دن كو كه‌تییه‌ به‌ر ئێریشان ب ناڤێ ردوان ئێریلما ب كۆد ناڤێ ئازاد شۆرش بوو و د لیستا گه‌ور ده‌ جی دگرت.

هه‌په‌گێ بالێ له‌شكر یێ پارتییا كاركه‌رێن كوردستانێ تو ئاگاهی ل ده‌ربارا ژ ده‌ست دایینا وان 6 گه‌ریلایان ل بدلیسێ نه‌دانه‌.