٤٥٠ کرێگرتیێن سووری یێن گرێدایی ترکیێ ژ لیبیایێ ڤەگەریانە ترکیێ

٤٥٠ کرێگرتیێن سووری یێن گرێدایی ترکیێ ژ لیبیایێ ڤەگەریانە ترکیێ

رەوانگەھا سووری یا مافێن مرۆڤان راگەھاند کو کۆمەک نوو یا کرێگرتیێن سووری یێن سەر ب ترکیێ ڤە ولاتێ لیبیا بجهـ هێلا و ڤەگەریانە ترکیێ پشتی تامام بوونا پەیمانا بەشداربوونا وان د شەرێ دا.

ل گۆری راپۆرتێ، کۆما یەکەمین یا ژ ٤٥٠ کەسان پێک دهێت ب مەبەستا ڤەگەریانا ستەنبۆلێ هاتینە شاندن ژ بۆ بالافرگەھا ناڤنەتەوەیی یا مۆئایتقا یا تەرابلۆسا پایتەختا لیبیایێ.

رەوانگەھا سووری یا مافێن مرۆڤان دبێژیت پشتی کو ئەڤ هێزە دگەهنە باژێرێ ستەنبۆلێ، دێ ب مەرەما بجیهکرنا وان ل دەڤەرێن د بن دەستێ لایەنێن لایەنگرێن ترکیێ دا ل بەراڤێن حەلەبێ، هێنە شاندن ژ بۆ سووریێ.

د ڤێ ناڤبەرێ دا، چاڤکانیەکێ ل باژارێ مسراتە یا لیبیایێ دیار کر کو ١٠٩ کرێگرتیێن سووری ب بالەفرەکا لیبیایی دەرباسی ترکیێ بوونە.

ل گۆری رەوانگەھا سووری یا مافێن مرۆڤان، حەتا نھا ھەژمارا لەشکەرێن ل لیبیایێ ھاتیە بجیھکرن ١٧ ھەزار و ٤٢٠ کرێگرتی نە، د ناڤ وان دا ٣٥٠ زارۆکێن بن ١٨ سالییێ دا ھەنە.

حەتا نھا، نێزیکی ٦٧٠٠ کرێگرتیێن ژ کۆمێن گرێدایی ترکیێ پشتی ب دوماهی هاتنا پەیمانێن وان و وەرگرتنا مووچەیێن خوە ڤەگەریانە سووریێ، ئەڤ یەک د دەمەکی دایە کو ترکیا ھێژ بەردەوامە و پتر کۆمێن کرێ گرتی دروست دکەت و وان ڤەدگوھێزیتە وارگەھێن مەشقکرنێ.