دو سال دەرباس بوون لێ خیزانێن ھەر دو گرتیان ھێژ ژ جهێ دەفنکرنا وان نە ھاتنە ئاگەھدار کرن

دو سال دەرباس بوون لێ خیزانێن ھەر دو گرتیان ھێژ ژ جهێ دەفنکرنا وان نە ھاتنە ئاگەھدار کرن

دویەمین سالڤەگەرا دارڤەکرنا زانیار و لوقمان مۆرادی د دەمەکی دا دەرباس دبیت کو مالباتێن وان هێژ ژی ل هیڤیا نووچەیێن جھێ ڤەشارتنا زارۆکێن خوە نە.

دو گەنجێن کورد ب تاوانا دژاتیکرنا رژێما کۆمارا ئیسلامی یا ئیرانێ و ب دادگەھەکرنەک نە حەق ژ لایێ دادوەر سەلەڤاتی ڤە ب دارڤەکرنێ ھاتن مەحکووم کرن. دۆزگەرێ تەھران ئیدیعا کر کو ئەو دو کەس ئەندامێن پارتیا کۆمەلە نە و ئەو ب تاوانا هەولدانێن دژی ئەولەھیا نەتەوەیی، دەربازکرنا نەقانوونی یا سنۆر و هەبوونا چەکان د مالێ دا هاتینە تاوانبار کرن. سەرباری ڤان تاوانبارکرنا، ئەو پێش نها ب کوشتنا ئیمامێ نڤێژا ئەینیێ یێ باژێرێ مەریوانێ ھاتبوون تاوانبارکرن، ھەر چەند ئەڤ ئیدیعا قەت ل دادگەھێ نەھاتە ئیسباتکرن.

لێ بەلێ پارێزەرێ ڤان دو گەنجان دۆزا دۆزگەر و چالاکیا وان یا سیاسی رەد کر. وی گۆت کو لوقمان پێش نها ژی شەش مەھان ب تاوانا پشتگریکرنا پارتییا کۆمەلێ هاتبوو حوکم کرن، لێ پشتی سەربەستبەردانا وی ئەو تنێ ب کارووبارێن خێزانێ ڤە مژوول بوو و چو چالاکیەکا سیاسی ئەنجام نەددا. پارتیا کۆمەلێ ژی د داخویانیەکێ دا ئەندامەتیا وان د ناڤا پارتییا خوە دا رەد کر.

ل دوو کارڤەدانێن توند یێن خەلکی ل دژی سزایێ دارڤەکرنا ڤان دو گەنجێن کورد، تەلەڤیزیۆنا کۆمارا ئسلامی یا ئیرانێ، ب بکارئینانا سیناریۆیا دانپێدانێن دوبارە یێن ب زۆری، ڤیدیۆیەک ژ ڤان دو گەنجان بەلاڤ کر کو تێدا ئەڤ دو گەنجە دانپێدانێ ب کوشتنا ئیمامێ نڤێژا خودبێ یێ مەریوانێ دکەن.

ل دوور وەشاندنا دانپیدانێن زانیار و لوقمان مۆرادی دا ل سەر تەلەڤیزیۆنێ، وان دو گەنجان نامەیەک ژ راپۆرتۆرێ تایبەتێ مافێن مرۆڤان ل ئیرانێ رە نڤیساندبوو و دیار کربوو کو ئەڤ دانپیدانە د بن ئیشکەنجەیێ دا ژ وان هاتینە وەگرتن و بەلاڤکرن.

زانیار گۆتبوو کو لیکۆلینەران ئەو ب دەستدرێژییا سێکسی ب رێکا “بوتلکرنێ” تەھدید کریە. لوقمان ژی باس ل ئیشکەنجەیا د بن چاڤدێریا ئۆفیسا ئیستخباراتا سنە دا کر. وان ھەمان شرۆڤە د نامەیەکی دا ژ بۆ سادق لاریجانی، سەرۆکێ بەرێ یێ دادوەریێ نڤیساندبوو. ل گۆری قانوونێ، دانپیدان تنێ ب ھەبوونا دادگەھەک دادپەروەر و ئامادەبوونا دادوەری دهێتە قەبوولکرن. ل گۆری قانوونا ھەیی یا ئیرانێ ژی، پێویستە پێش دارڤەکرنێ خێزان ژ جەزایێ تاوانباری بهێتە ھایدار کرن، و پارێزەرێ کەسێ تاوانبار ژی دشێت د دەما دارڤەکرنێ دا ئامادە بیت. لێ نە ب تنێ پارێزەر نە ئامادە بوو، بەلکو پشتی دارڤەکرنێ ب وان ھاتە راگەهاندن کو دێ جەنازە ل گورستانا “بحشتا زەھرا” یا تەھرانێ هێنە ڤەشارتن.

هەرچەند کو تا نها دو سال ل سەر ب دارڤەکرنا ڤان جوانان دەرباس دبیت لێ تا نها مالباتێن وان ژ جیهێ ڤەشارتنا وان نە ھاتنە ئاگەھدار کرن.