سەرۆکێ فەرەنسایێ ئیمانووئێل ماکرۆن رۆژا پێنجشەمێ 10/9/2020ان تەکەز کر ” پێویستە کارڤەدانەک ئێکلاکەر ل دژی ئەردۆگان ئەنجام بدەین “.
ماکرۆن ئاماژە ب کریارێن ئیستیفزازی یێن ترکیێ ل رۆژھلاتا دەریایا سپی کر، وی دەستنیشان کر کو پێویستە ئەنقەرە رێزێ ل سەروەریا ئەورۆپا و یاسایا ناڤنەتەوەیی بگریت ژ بەر کو خەتێن سۆر دیارن.
ل گۆری ماکرۆن، جڤینا ئیرۆ یا سەرۆکێن حەفت وەلاتێن یەکیتیا ئەورۆپی یا ل سەر رەوشا نوھایا ل رۆژھلاتا دەریایا سپی وێ ژ بۆ پەیداکرنا هەلویستەک هەڤبەش یا یەکیتیا ئەورۆپی یا ل دژی ترکیێ بیت.
تێکەلیێن د ناڤبەرا ترکیێ و یەکیتیا ئەورۆپایێ دا ژ بەر گەلەک مژاران ئالۆز بوونە، د ناڤ وان دا لێگەریانا نەفت و گازێ ل رۆژھلاتێ دەریایا سپی، کو د ناڤبەرا ئەنقەرێ ژ لایەکێ ڤە و قبرس و یەونانیستانێ ژ لایەک دی ڤە کو دو ئەندامێن یەکیتییا ئەورۆپایێ نە ئالۆزی چێکرینە.
ماکرۆن بانگ ل ئەورۆپا کر کو ب رەنگەک یەکگرتی و ئاشکرا ل دژی ترکییێ باخڤن، کو ئێدی ترکیا وەکو ھەڤکار ناهێتە هەژمارکرن.
