سه‌رۆكوه‌زیرێ هه‌رێما باشوورێ كوردستانێ، ئیرۆ ب سه‌رۆكوه‌زیرێ ئیراقێ راگهاند كو نابیت ب تو ئاوایی مووچه‌یێن فه‌رمانبه‌ران تێكه‌لی سیاسه‌تێ بهێنه كرن و گۆت كو ئه‌ڤه مافه‌كێ ره‌وا یێ خه‌لكێ كوردستانی یه.
حكوومه‌تا هه‌رێما كوردستانێ د به‌یانه‌كه نڤیسكی دا، ناڤه‌رۆكا جڤینا نێڤبه‌را مه‌سروور بارزانی و مسته‌فا كازمی به‌لاڤ كر و تێدا دیار كر كو سه‌ره‌دانا سه‌رۆكوه‌زیرێ ئیراقێ بۆ هه‌رێما كوردستانێ ئاماژه‌یه‌كا ئه‌رێنی یه بۆ چاره‌سه‌ر كرنا پرسگرێكێن نێڤبه‌را هه‌ولێر و به‌غدایێ، تایبه‌ت پرسگرێكێن بودجه، په‌ترۆل و ده‌ڤه‌رێن كوردستانی و هه‌روه‌ها مافێن دارایی یێن هێزێن پێشمه‌رگه‌یان.
د داخۆیانییا حكوومه‌تا كوردستانێ دا وها هاتییه نڤیساندن: «مسته‌فا كازمی ته‌كه‌زی ل سه‌ر وێ یه‌كێ كر كو كریزێن نێڤبه‌را حكوومه‌تا كوردستانێ و حكوومه‌تا فه‌ده‌رال، نه‌تنێ مووچه و بودجه‌یه و گۆت كو ئه‌و بهێڤی نه ئه‌ڤ كریز یێن ئاسێ مایی د پاشه‌رۆژه‌كا نێز دا ل سه‌ر بنگه‌ها ده‌ستووری بهێنه چاره‌سه‌ر كرن».
مه‌سروور بارزانی ب مسته‌فا كازمی راگه‌هاند كو مووچه‌یێن فه‌رمانبه‌رێن كوردستانێ یان هه‌ر ده‌ڤه‌ره‌كا دی یا ئیراقێ مافه‌كێ ره‌وا یێ خه‌لكی یه و نابیت تێكهه‌لی كێشه و گرفتێن سیاسی بهێته كرن.
هه‌روها دوپات كر كو هه‌رێما كوردستانێ و ئیراق ب گشتی تووشی ئاسته‌نگ و قه‌یرانێن دارایی و ره‌وشه‌كا نه‌لبار یا ساخله‌میێ بووینه، به‌رهه‌ڤییا خۆ بۆ كارێ هه‌ڤبه‌ش بۆ چاره‌سه‌ر كرنا وان قه‌یرانان ب ئاوایه‌كی كو د به‌رژه‌وه‌ندییا خه‌لكی دا بیت نیشان دا.
مه‌سروور بارزانی دوپاتی ل سه‌ر چاره‌سه‌ر كرنا پرسگرێكا بوجه‌ی و په‌ترۆلێ و ده‌ڤه‌رێن كوردستانی یێن ده‌رڤه‌ی ئیداره‌یا هه‌رێمێ و مافین ده‌ستووری یێن هێزێن پێشمه‌رگه نێشان دا، ب تایبه‌ت ئه‌كتیڤ كرنا میكانزما هه‌ماهه‌نگییا ئێمناهیێ ل نێڤبه‌را پێشمه‌رگه‌ی و سوپایێ ئیراقێ ل ده‌ڤه‌رێن كوردستانی.
ل همبه‌ر سه‌ره‌دانا مسته‌فا كازمی، مه‌سروور بارزانی ئاماژه كر كو هاتنا شاندێ ئاست بلند یێ ئیراقێ بۆ كوردستانێ، ئاماژه‌یه‌كا ئه‌رێنی یه بۆ چاره‌سه‌ر كرنا پرسگرێكان ل سه‌ر بنه‌مایێ ده‌ستووری و دروست كرنا میكانزمه‌كا نوو بۆ په‌یوه‌ندیێن هه‌ولێر و به‌غدایێ.
سه‌رۆك وه‌زیرێ ئیراقێ راگه‌هاند، سه‌ركه‌فتنا هه‌ر به‌شه‌كێ ئیراقێ سه‌ركه‌فتنه بۆ ته‌ڤاهییا وه‌لات و گۆت: «ئه‌ز گه‌شبینم كو ب هاریكاری و هه‌ماهه‌نگییا نێڤبه‌را پێكه‌هاته‌یێن به‌شێن ئیراقێ، دێ شێین ب سه‌ر ئاسته‌نگ و كریزێن نها زال بیبن و تێگه‌هشتنه‌كا نوو و باش بۆ چاره‌سه‌ر كرنا قه‌یرانان بهێته چێكرن».
