گونده‌كێ كانی ماسێ هات بۆمبه‌باران كرن

گونده‌كێ كانی ماسێ هات بۆمبه‌باران كرن

 ئێریشێن ده‌وله‌تا تركیێ ل سه‌ر باشوورێ كوردستانێ كو ب سه‌ده‌ما په‌كه‌كێ نه‌، به‌رده‌وامن و ئیرۆ گونده‌كێ ده‌ڤه‌را كانی ماسێ ل سینۆرێ پارێزگه‌هییا دهۆكێ كه‌ت به‌ر ئێریشان.

چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره‌ كر، ئیرۆ رۆژا پێنجشه‌می 10/9/2020ان، تۆپهاڤێژێن ده‌وله‌تا تركیێ، حه‌ره‌كه‌تا گه‌ریلایێن په‌كه‌كێ ل سینۆرێ گوندێ ب ناڤێ ئۆرمانێ یێ گرێدای ده‌ڤه‌را كانی ماسێ هه‌ده‌ف كرنه‌.

ده‌ست نیشان كر، ئه‌ڤ ئێریش ئێڤارا ئیرۆ ل ساعه‌ت 5:00 چێبوویه‌، ئاگاهی ل ده‌ربارا زرارێن په‌كه‌كێ نینه‌ لێ به‌لێ، زرار ب ئاقارێ گوند كه‌تییه‌ ژ به‌ر كو ئێریش ل نێزی مالێن گوندییان پێكهاتییه‌.

ئێریشا ئیرۆ یا كانی ماسێ هه‌موه‌ختا سه‌ردانا سه‌رۆك وه‌زیرێ ئیراقێ مسته‌فا كازمی ژ بۆ پارێزگه‌هییا دهۆكێ تێ.

ئێریشێن ده‌وله‌تا تركیێ ل سه‌ر باشوورێ كوردستانێ ژ 15 مه‌ها خزیرانا ئیسالێ به‌رده‌وامن، پارتییا كاركه‌رێن كوردستانێ ژی ژ بۆ كو گه‌ریلایێن خوه‌ ژ ئێریشان بپارێزیت، حه‌ره‌كه‌تا وان خستییه‌ ناڤا گوندان دا و ب وێ سه‌ده‌مێ گوندێن سینۆرێ پارێزگه‌ها دهۆكێ ب به‌رده‌وامی تێن هه‌ده‌ف كرن.