بۆمبه‌ك ب ترومبێلێن هه‌ڤپه‌یمانان ڤه‌ ته‌قی

بۆمبه‌ك ب ترومبێلێن هه‌ڤپه‌یمانان ڤه‌ ته‌قی

بۆمبه‌كا چاندی ئیرۆ ب كاروانه‌كێ ترومبێلێن هێزێن هه‌ڤپه‌یمانییا ناڤده‌وله‌تی ڤه‌ ل ئیراقێ ته‌قییا، ب وێ سه‌ده‌مێ كه‌سه‌ك بریندار بوو، حزبوللا یا ئیراقی ب ئه‌نجامدانا ته‌قینێ سووچباره‌.

ناڤەندا مەدیایا شەری یا ئیراقێ د داخویانیەکێ دا دیار كر كو ئیرۆ رۆژا یه‌كشه‌می 13/9/2020ان، ل گوندەکی گرێدای پارێزگەھا سه‌لاحه‌ددینێ، بۆمبەیەکا چاندی ب کاروانێ ھێزێن ھەڤپەیمانییا ناڤده‌وله‌تی ڤه‌ ته‌قییا.

ل گۆر داخویانیێ ئەڤ کاروانێ هه‌ڤپه‌یمانان، سه‌ربازی بوو و ئالیكاریێن لۆجستی ڤه‌دگوهاستن.

د ئه‌نجاما ته‌قینێ دا، شۆفێرێ ترومبێله‌كا هه‌ڤپه‌یمانان كو هه‌مولاتییه‌كێ ئیراقی یه‌ بریندار كه‌ت و زرار ب كاروانێ ترومبێلان كه‌تییه‌.

ژ دەستپێکا سالا 2020ێ ڤە، ل ئیراقێ هێرشێن سەر ھێزێن ئەمریکی و ھەڤپەیمانان زێدە بوونە، حزبوللا یا ئیراقی ب ڤان هێرشان دهێته‌ تاوانبار كرن.