دیپلۆماتەک بریتانی ب ڤەگوهاستنا زانیاریێن نهێنی یێن سازیێن ئەورۆپایێ ژ بۆ چینێ و وەرگرتنا هزاران یورویان ھاتە تاوانبارکرن.
دهێتە گۆتن کو لێپرسینا ل سەر فریزر کامەرۆن، دپلۆماتکارێ بەرێ و رێڤەبرێ نھا یێ سەنتەرێ ئێکەتییا ئەورۆپایێ و ئاسیایێ ل بەرۆکسلێ، کو دهێتە ئیدیعا کرن کو وی ژبۆ چینێ سیخوری دکر، بەردەوامە.
ل گۆری رۆژنامەیا سان یا بریتانی، دەزگەھێ ئیستخباراتا ناڤخوەیی یا بریتانی MI5 و پۆلیسێن بەلچیکی گومان دکەن کو کامەرۆن ب ھەزاران یورۆ ژ بۆ ڤەگوهاستنا زانیاریێن نەپەنی یێن سیاسی و ئابۆری یێن سازیێن ئەورۆپی بۆ چینێ ستاندینە. حەتا بەرپرسەکی کۆمسیۆنا ئەورۆپی ئیدیعا کر کو کامەروون گەلەک نێزیکێ پەکینێ یە.
کامەرۆن، کو ١٤ سالان د کۆمسیۆنا ئەورۆپی دا کار کرییە، ھەموو تۆھمەتێن ل دژی خوە ب بێبنگەھ و پووچ بناڤ کرن و رەد کر و گۆت: “هەگەر ھوون تەنێ دەقیقەیەکێ ل سەر ڤان ئیدیعایا بفکرن، ھوون دێ زانن کو ئەو ب راستی بێ رامانن.
کامەرۆن گۆت کو وی د چارچۆڤێ کارێ خوە یێ ل سەنتەرێ ئێکەتییا ئەورۆپا-ئاسیایێ دا، دگەل چینێ دا گەلەک تێکەلی ھەنە. وی لێ زێدە کر: “ئەز ١٥ سال بەرێ ژ کارێ فەرمی خانەنشین بووم و نەشێم بگەهم هیچ زانیاریەکا ھەستیار و نهێنی.
وی تەکەز کر کو تنێ بودجەیا کو ئەو ژ چینێ وەردگریت “هاریکارییەکا کێم یا دراڤی یا سالانەیە” کو ژ شاندەیا دیپلۆماتیکا چینێ د ئێکەتییا ئەورۆپایێ دا ژ بۆ روومالکرنا بوویەرێن گرێدایی تێکەلیێن ئەورۆپا و چینێ دستینیت.
وێبسایتا ئەمریکی یا ب ناڤێ پۆلەتیکۆ راپۆرتەک بەلاڤ کرییە و تێدا راگهاندیە، سیخوری ل گۆری قانوونێن بەلچیکی نە تاوانە، لێ بروکسەل ل سەر فکارێن کو دبیت کامەرۆن ببیتە گەف ل سەر کاربدەستێن ئەورۆپی لێپرسین دایە دەستپێ کرن. گەر دۆزگەر بخوازن ل دژی کامەرۆن دۆزێن راست ب رێڤە ببەن، ئەو دێ حەوجە بن کو بنگەھەک دی یا تاوانبارکرنێ ببینن.
