كابووسا ره‌ڤاندنێ ل عه‌فرینێ ب داوی نایێ

كۆمێن چه‌كدارێن گرێدای تركیێ ل سه‌ر ره‌ڤاندنا جوانێن عه‌فرینێ به‌رده‌وامن و ئیرۆ 3 كه‌س هاتنه‌ ره‌ڤاندن، دوو ژێ برایێن هه‌ڤن.

ل گۆر نه‌رینگه‌ها سووری یا مافێن مرۆڤان، ئیرۆ رۆژا سێشه‌می 22/9/2020ان، كۆمێن چه‌كدارێن گرێدای تركیێ، 3 جوانێن ناڤچه‌یێن ماباتێ و جندرێسێ یێن هه‌رێما عه‌فرینێ ره‌ڤاندنه‌ و ژ بۆ جییه‌كێ نه‌دیار برنه‌.

ده‌ست نیشان كر، یێك ژ وان كه‌سێن كو هاتنه‌ ره‌ڤاندن ب ناڤێ محه‌مه‌د حاجی حه‌سه‌نه‌ و ژ بال پۆلیسێن له‌شكری ڤه‌ دوهـ هاتییه‌ ره‌ڤاندن.

هه‌روه‌ها دوو جوانێن دن كو برایێن هه‌ڤن ب ناڤێ ره‌شید خورشید و دیدار خورشید ژ گوندێ کۆرا یێ سەر ب جندرێسێ ڤە رەڤاندنه‌، چەکداران پەرە و ئۆتۆمبیلەکە وان دزین و پشترە ئەو ب بەر جھەکی نەدیار ڤە برن.

هه‌ر ل ڤێ ده‌ربارێ ده‌، رێخستنا مافێن مرۆڤان ئاماژە دا، گەلەک جاران گرۆپێن چەکداران ژ بۆ پەرەیان ژ وەلاتیێن کوردێن ئەفرینێ بستینن، وان ب تومەتا پێوەندییا ب رێڤەبەریا خوەسەر رە تومەتبار دکن و درەڤینن.