ژ پەکەکێ ئەخلاق دباریت!

دبیت د ناڤا پارتیێن کوردستانێ دا، پارتیا کارکەرێن کوردستانێ “پەکەکە” تاکە پارتی بیت کو هندە باس ل پەروەردێ و ئاڤاکرنا شەخسیەتا تاکێ کورد بکە، پەکەکە هندە د ڤێ چەندێ دا پرۆپاگندایێ دکەت کو کەسەک نە شەهرەزا بیت دێ وەسا هزرکەت کو پەکەکێ زانینگەهێن تایبەت بۆ فێرکرنا ئەخلاقی ژ بۆی تاکێن کورد ڤەکرینە و تێدا پەروەردەیا ئەخلاقی ددەتر لایەنگرێن خوە، لێ بەلێ گەلۆ کیژ ئەخلاق و کیژ پەروەردە!؟

ل دەف پەکەکێ ئەخلاق ب تەنێ د ئاپۆچیتیێ و ب درەوا ب ناڤ “براتیا گەلان دا” ب دوماهی دهێت، ژ دەرڤەی ڤان دویان هیچ تشتەک دی ئەخلاق نینە، نە دیانەت ئەخالقە، نە کوردایەتی ئەخلاقە، نە رێزگرتن ژ ئالا کوردستانێ و نەتەوی بوون و ریزگرتن ژ سەرکردەیێن کورد و مرۆڤێن مەزن ئەخلاقە.

پەکەکە ب رەنگەکێ رێخستی کار ل سەر ڤێ چەندێ دکەت، ئەو لایەنگرێن خوە ب گشتی و ب تایبەتی لایەنگرێن خوە یێن ل ئەورۆپایێ و باشوورێ کوردستانێ وەسا پەروردە دکەت کو هیچ تشتەک ژ بلی ئۆجەلان ب تەنێ د ڤێ دونیایێ دا ل جەم وان پیرۆز و ب روومەت نەبیت، داکو ببی کوردەک ب روومەت ل جەم پەکەکێ پێویست دکەت حەتا ئاستا پەرستنێ تە باوەری ب ئاپۆ هەبیت و وەکە چەوا موسلمان ریزێ ل محەمەد پێغەمبەر دگرن و باوەری پێ هەیە، چەوا کریستییان رێزێ ل عیسا پێغەمبەر دگرن و باوەری پێ هەیە هتد… پێویستە لایەنگرێن پەکەکێ ژی ب وی ئاست و باوەریێ رێزێ ل ئۆجالان بگریت و پێ باوەر بیت، لێ بەلێ نابیت ریزێ ل هیچ ئێک ژ سەرکردە و رەوشەنبیر و مەزنێن دی یێن کوردان بگری، هەر دەما کو تە ئێک ژ وان ل جیهەکێ دیت کامیرەیا خوە دەرخە و بێ رێزیێ پێ بکەت و دیمەنێن ڤی کارێ خوە یێ قرێژ بگرە داکو ل سۆشیال مەدیایێ دا پارڤە بکەی و پەکەکە تە وەکو مرۆڤەک ب هێز، خوەدی ئیرادە و ولاتپارێز نیشان بدەت.

باشترین بەلگە ل سەر ڤێ ئاخافتنا مە دبە ئەڤ ڤیدیۆیە بیت، د ڤێ ڤیدیۆیێ دا ب باشی دیار دبیت ئاستا پەروەردا ئەخلاقی یا لایەنگرێن پەکەکێ چەندە، هەرچەند ئەڤ ڤیدیۆ میناکەکە ژ هەزاران میناکێن دی یێن ب ڤی رەنگی لێ بەلێ وەکو مە گۆتی ب باشی تێدا دیار دبیت کو پەکەکە لایەنگرێن خوە ب چ رەنگ پەروەردە دکەت.

د ڤێ ڤیدیۆیێ دا لایەنگرەکێ پەکەکێ ل ئەورۆپایێ بێ رێزیەک بێ وێنە ل برێز “کەریم سلێمان” ئەندامێ جڤاتا رۆحانی یا ئێزدیان دکەت ب تەنێ ژ بەر ڤێ یەکێ کو کەریم سلێمان دبێژیت: “نەتەوا من کوردە، ئۆلا من ئێزدی”، لێ ئەڤ ئالیگرێ پەکەکێ کو ب کامیرەیا خوە دیمەن کشاندینە ب ئاوایەک هەری نەجوان بێ کو رێ ب وی بدە بەرەڤانیێ ژ خوە بکە و ئاخفتنا خوە ببێژیت ئێریشی وی دکەت و ناهێلیت بەرسڤ بدەت.

تێ زانین کو پێش نها ژی هندەک ژ ئالیگرێن پەکەکێ د ناڤا پارلامانتۆیا ئەورۆپایێ دا ل دژی پێشمەرگەیێن کوردستانێ چالاکی ئەنجامدابوون و ئەو ب کەسێن خراب و تەرسۆنەک ب ناڤ کربوون، هەر وەها د دەما سەرەدانکرنا وەفدێن حکوومی یێن سەر ب حکوومەتا باشوورێ کوردستانێ ژ بۆ ئەورۆپایێ ژی دیمەنێن ب ڤی ئاوا یێن کو تێدە ئالیگرێن پەکەکێ بێ رێزیێ و ئاخافتنێن کێم دبێژن دوبارە دبن.